¹ Keken itie, Kulae-manyarie, aku baparah kakolaie akan Injil, am jadie parahku akan kolaie, am jadie kolaie tarimae, ka lalamnya kolaie badirie toguh. ² Laie Injil iyah kolaie salamat, asal kolaie barigap toguh akan firman am jadie die parah akan kolaie, kacualie kolaie parcaya am sia-sia. ³ Aku jadie mamarahnya akan kolaie, mula-mula am paling penting, am jadie aku tarimae laie Kristus matie akan dusa-dusa dirie sasuaie akan Kitab Suci, ⁴ Inyae jadie diekubur, Inyae hirup mulae ka tolue arienya sasuaie Kitab Suci, ⁵ lipas iyah Inyae jadie manampa nirie-Nya akan Kefas, limah iyah akan ka dua bolas diah. ⁶ Jadie mulae diah, Inyae manampa nirie-Nya akan am lobih mulae limae ratus akan kulae-manyarie urasnya. Sabagian bakah mulae pamanya am masih hirup sampaie keken itie, tege sabagian jadie matie. ⁷ Lalue, Inyae manampa nirie-Nya mulae akan Yakobus, limah iyah akan uras rasul, ⁸ Taahir, samah berae ana amlahir hompan katikanya, Inyae yah manampa nirie ka aku. ⁹ Sabab, akutie am paling koni kan saanteroe rasul-rasul-Nya diah hontae ulih die jokue rasul laie aku manggian ungkup Hatalla. ¹⁰ Tapie, laie anugerah Hatalla, aku itieam aku metuh tie. Laie, anugerah-Nya akan aku hontae sia-sia. Aku bagawie lobih mulae urang banya, iyah hontaenya aku, tapie laie anugerah Hatalla am umae aku. ¹¹ Karnae iyah, baie laieku atawae pamanya, bebeh jam kamie malajar diah bebeh jam kolaie jadie parcaya. (Hirup Mulae Pampatie) ¹² Jakae Kristus am die kabar hirup mulae pampatie, ngapae sabagian antarae kolaie bapaner mayan arae pahirup mulae pamptie? ¹³ Jakae mayan arae pahirup mulae pampatie, Kristus yah hontae akan hirup mulae. ¹⁴ Diah, jakae Kristus hontae hirup mulae, sia-siamae kabar kamie beweh jam sia-siamae imanmu. ¹⁵ Talobih mulae, kamie die ilae jadie saksi parongka Hatalla laie kamie morie kasaksian bahwa Hatalla am mahirup Kristus, am hontae akan die hidup-Nya, jakae puna bujur urang matie hontae hidup mulae. ¹⁶ Sabab, jakae urang matie hontae hidup mulae, Kristus samah hontae hidup mulae. ¹⁷ Iyah, jakae Kristus hontae hidup mulae, sia-siamae iman mu, diah kolaie masih tege lalam dusa-dusamu. ¹⁸ Berae iyah jam, pamanya am jadie matie lalam Kristus urasnya tae siksa. ¹⁹ Jakae amdieharap dirie lalam Kristus bayae akan pahirup tie mae, dirie tiam urang-urang am basial mulae pamanya kalunen. ²⁰ Tapie keken itie, Kristus jadie hidup malae urang matie, jadie paling tuhae mulae pamanya urang parcaya am jadie matie. ²¹ sabab, samah berae pampatie mulae siku urang, makae mulae siku urang yah pahirup urang matie jadie tege. ²² Laie Adam urasnya matie, bebeh jam lalam Kristus urasnya akan hidup mulae. ²³ Tapie, tiap-tiap urang uma urutannya: Kristus jadie ampaling tuhae, lopas iyah pamanya diah Kristus hompuanya, katikae-Nya datang baulang mulae, ²⁴ Limah iyah tege ka hapusnya, iyaham katikae Inyae manyorah Kuasanya akan Hatalla Ompai dirire, katikae Inyae manggalah uras pamarentah, uras amba kuasa, am gancang gagah. ²⁵ Sabab, Inyae bakuasa marentah sampai Hatalla maomah uras musuh-Nya lowa kakie-Nya. ²⁶ Musuh amta ahirnya amdie kalah iyaham pampatie. ²⁷ Sabab, Hatalla jadie maomah sagala am tege kalowa kakie-Nya. Tapie, katikae diepaner bahwa uras amtege diah dieomah kalowa-Nya, iyah tarie hontae mulae Hatalla kanirie, amma omah sagala amtege diah lowa Kristus. ²⁸ Katikae sagalae tege diah jadie dieomah lowa Kristus, limah iyah Ana kanirie manuduk nirie akan Inyae, am manunduk urasnya lowa Kristus supaya Hatalla manggaruh-karuhnya uras tege lalamnya. ²⁹ Jakae hontae berae iyah, apae mulae amdiekaruh laie pamanya amdie panie akan urang ammatie? Jakae urang matie hontae hidup mulae sama sakali, lalue ngapae urang-urang mampanie akan pamanya? ³⁰ Diah,ngapae kamie tege lalam bahaya satiap waktu? ³¹ Kulae-manyarie, satiap arie aku salalue maharap pampatie, akan kaharatku lalam kolaie, laie aku hompuenyae lalam Yesus Kristus, Tuhan dirie. ³² Sacara kalunen, apae paulihku bakalahie malawan satua-satua ganas ka Efesus? Jakae urang matie hontae hidup, "Ayo dirie makan maraie sapuasnya laie pagie dirie matie." ³³ Hinang tatipue: "Bakawal kanam hontae baie marusak pangawie-gawian am baie." ³⁴ Renen-reneng baulang ka ambaie hinang ngaruh dusa mulae. Sabab,sabarapae urang hontae mangasene Hatalla. Aku baparah berae itie supayae kolaie malue. (Pahirup Tuwuh Rohani) ³⁵ Tapie, tege urang batanya, "Apae ulahnya urang matie yah hidup? Berae tuwuh apaekah pamanya datang mulae?'' ³⁶ Hey urang bunggol! Apae am kolaie tanam hontae akan tumuh hidup mulae, kacualie nyamatie lobih holue. ³⁷ Diah, apae am kolaie hamur bukan tuwuh am batanam iyah am tumuh tie, amba gigie homtae bakulit berae gigie gandum umakan gigie-gigie bukan. ³⁸ Tapie Hatalla mamorienya Inyae tuwuh sasuaie amdie kahona-Nya hontae-samah gigie iyah dieborie tuwuhnya kanirie-kanirie. ³⁹ Bukan uras daging-daging am samah, tapie tege suti daging kalunen, iyah bukannya daging satua-satua, iyah bukannya daging burung-burung, iyah bukannya daging laue. ⁴⁰ Tege jam tuwuh surgawie umakan tuwuh duniawie, tapie kamuliaan surgawie yah bedae mulae kamuliaan duniawie iyah gin bedae. ⁴¹ Kamuliaan mata arie babedae, kamuliaan bulan babedae, kamuliaan bintang-bintang gin babedae laie suti bintang babedae mulae bintang am bukan lalam kamuliaan. ⁴² Bebeh jam akan pahirup urang matie. Diehamur lalam pampatie, hidup mulae akan hidup sapalamatnya. ⁴³ Diehamur lalam kasusah, hidup mulae lalam kamuliaan, Diehamur lalam kaoyoh, hidup mulae lalam paonyae. ⁴⁴ Diehamur berae tuwuh jasmani, hidup berae tuwuh rohani. Jakae tege tuwuh jasmani, tege jam tuwuh rohani. ⁴⁵ Tege tatulis, "Kalunen amsulanya, Adam, jadie jiwa am hidup." Adam amta ahir jadie roh am mamorie hidup. ⁴⁶ Berae itie, am rohani bukan amsulanya. Amsulanya iyah taie am jasmani, limah iyah haruenya am rohani. ⁴⁷ Kalunen amsulanya baasal mulae bumi, iyaham mulae dabu tanah. Kalunen am kaduae baasal mulae surga. ⁴⁸ Samah bera am baasal mulae dabu tanah, berae iyah jam pamanya am baasal mulae dabu tanah. Iyah, samah berae am surgawie, berae iyah jam surgawie. ⁴⁹ Panyulanya dirie die karuh berae tompae kalunen baasal mulae dabu tanah, dirie jam akan mhonie tompae kalunen am surgawie. ⁵⁰ Aku mamaner itie akan kolaie, Kulae-manyarie, bahwa daging umakan darah hontae baulih bagian akan Karajaan Hatalla. Berae iyah jam am tahue binasa, hontae ulih bagian akan am hontae ulih binasa. ⁵¹ Dongar! Aku mamaner kolaie akan rahasia, dirie hontae akan matie urasnya, tapie dirie uras akan baubah, ⁵² sakatikae iyah, bayae sakirep matae mae, metuh tarompet taahir: limah tarompet babungie, banya urang matie akan hidup hontae binasa, diah dirie akan baubah. ⁵³ Sabab, amtahue binasa itie tahue mahonie am hontae tahue binasa. Diah, amtahue matie tahue mahonie am hontae tahue matie. ⁵⁴ Katikae amtahue binasa itie mahonie am hontae tahue binasa, diah amtahue matie itie mahonie am hontae tahue matie, makae gonapam firman am tatulis: "Pampatie jadie kalah laie kamonang.'' Yesaya 25:8 ⁵⁵ "Hey pampatie, maniham kamonangmu? Hey maut, maniham wisamu?" Hosea 13:14 ⁵⁶ Bisae maut iyaham dusa, diah kuasa dusa iyaham Hukum Taurat. ⁵⁷ Tapie dirie basyukur akan Hatalla am mamorie kamonangan malalue Tuhan dirie,Yesus Kristus. ⁵⁸ Jadie, Kulae-manyarieku saiman am kakasih, badirie toguh, hinang ragu, rajie-rajinmae bagawie akan Hatalla. Sabab, kolaie baulih mulae hasil paoyohmu hontae sia-sia ka lalam Tuhan.