¹ K'alal te Apolo ay ta bay Corinto, te pabloe yak ta k'axel ta regionetik te muk'ik ta bay lum sok jich a k'ot ta bay Éfeso jich ay la staj cha-oxtul nopojeletik le'a. ² Pablo jich la yalbey: "¿ la bal a wich'ik te Espiritu Santo te k'alal la a ch'uunike?" jich la situk: "ma la jkich'tik", te jo'otike maj kayojbeytik skoplal te beluk-a te Ch'ul Espiritue. ³ Pablo jich la yal: "¿ mach'a ta swenta te ich' ja te la wich'ike?" Jich la yalik: " ja te ich' ja' te la yakbotik te Juane." ⁴ Jich te Pablo la sut te k'ope: "Te Juane ya yak ich' ja' ta swenta te yakuk sut jkot'antik. Jich kaj ta yalbeyel te ya me sk'an te yakuk xch'uunik te mach'a ya xtal ta patilal, ja te Jesus" ⁵ k'alal te ants-winiketik la yayik stojol spisin into, kaj yich'ik ja' ta swenta sbi'il te kajwaltik Jesus. ⁶ K'alal te Pablo la yak' sk'ap ta stojolik, te Ch'ul Espiritu tal ta stojolik sok kajik ta k'op ta yan k'opetik sok kajik ta yalel te sk'op te Diose. ⁷ Ay ni wan lajchaytul winiketik te k'ot ta stojolik into. ⁸ Pablo ochbael ta bay snail sk'oponel sok snopel sk'op Dios (sinagoga) sok oxeb u ma xiw ta k'op te Pabloe, yak ta sbijtesel sok ta xcholbeyel sk'oplal te bit'il ay te ajwalinel te Diose. ⁹ K'alal cha-oxtul judioetik la yich'ik tulantesbel te yot'anike sok maj xch'uunik mantal, jach'ik ta sbol k'optayel te yach'il k'op yu'un te jkajwaltike ta stojol te tsobleje. Jich la yich'ik ta ik'tayel yu'un te Pabloe, k'ejel la yik'bael te mach'a la xch'uunik. Ja kaj ta yich'ik nojptesel yu'un ta bay snail sk'oponel jun te bay la yak nojpteswanej te winik Tirano sbi'il. ¹⁰ Nat'aj cheb jawil yu'unik, jich la spasik spisil into yu'un yakuk yayik stojol te sk'op te Kajwaltik spisil te mach'atik ay ta Asia, majnax ta xchebal Judioetik sok Griegoetik. ¹¹ Te Diose yak ta yak'el ilel yuel ta swenta te Pabloe, ¹² ja' yu'un te strapo pak' sok te xchujch'ut te la stsakbeyik la yich' beyik bael ta stojol te mach'atik ayik ta chamel jich akolik ta chamel sok lok'ik bael te pukujetik ta stojolik. ¹³ sok ay nix yakik ta beel le'a bayal judioetik te mach'atik ya slok'esik pukujetik. Jichnax ta sk'anjel yot'anik, yakik ta stuntesbel te sbi'il te Jesus yu'un jich yakuk yich'ik yu'elik ta slok'esel a te pukujetik yu'un jich ya yalik: " Ta swenta te Jesus te yak ta xcholel te pabloe, ya jkalbeyex mantal te ya xlok'exbele." ¹⁴ Spisil te mach'a yakalik ta spasel into, ja juk tul snixnab te wolwanej sacerdote yu'un te judioetike. Te sbi'ile ja Esceva. ¹⁵ Ay jun pukuj te jich sutbotik yu'une: " Te Jesuse ya jnabeysba, sok nix te Pablo ya jnabeysba; yan te jaexe ¿ mach'aatika?. ¹⁶ Te winik te ay pukuj ta yot'ane wiltel ta bay ay te mach'atik lok'es pukujetik sok la yich'ik ta tsakel sok bayal majel la yich'ik yu'un. Jich yu'un lok'ikbael ta bay te nae, t'anatik bael sok exnajemik bael. ¹⁷ Spisil into pujk'bael ta spisil te Judioetik sok nix te Griegoetik te nainemik ta bay lum Efeso. Xiwik yu'un spisil into, jich kajik ta yich'el ta muk' te sbi'il te Kajwaktik Jesuse. ¹⁸ Jichnix-uk, bayal te ch'unjeletik te talik sok kajik ta xcholel sok ta yak'el nael spisil te beluk malek spasojik. ¹⁹ Bayal te mach'a snopojik tsilawanej la yich'ikbael te spak'al jun te bay la snopik spasel into sok kajik ta xchik'el ta stojol te ants-winiketik. K'alal kaj yajteyik te jayeb stojol spisil into ja lok' lajuneb yoxwinik ta mil ta sejp' sakil tak'in. ²⁰ Jich te sk'op te Kajwaltik yak nax ta spukbel-sbabel sok yu'el. ²¹ K'alal te Pabloe ts'akaj te yat'el ta bay Efeso, la snop ta yot'an sok espiritu te yax k'ax ta bay Macedionia sok ta bay Acaya jich ya xk'ot ta bay Jerusalen; jich la yal: " te me laj kot'an k'axel le'a, ya xbo'on ta bay Roma." ²² Te Pabloe la stikumbael ta bay Macedonia te Timoteo sok te Erasto ja cheb nopojeletik ja' te mach'a la yay koltaywanej. Yan stukel jil ta bay Asia jun chebuk k'aal. ²³ Sok k'ot yorail te jach muk'ul k'op ta bay Efeso skaj te yach'il be yu'un te Jesuse. ²⁴ Ay jun winik Demetrio sbi'il te yax at'ej sok sakil tak'inetik, ja' la yak'bey yat'el te mach'atik artesanoetik. ²⁵ Jich kaj ta stsobel spisil te yaj at'el sok jich la yalbey: " Winiketik, ja naojik me te bay jkat'eltik ya jtatik bayal tak'in le'a. ²⁶ Te jaexe ya awayik stojol sok ya a wilik, ma jauk nax ta bay Efeso, sok ta bay bayal tsaikal lumetik yu'un Asia, ja te winik Pablo yak ta stijel sok yak ta yik'eltel bayal ants-winik. Ja yak ta yalel te ma ba diosetik te beluk pasbilik ta sk'ab tul winik. ²⁷ Sok ma ba janax le' yaj tatik jwokoltik yu'un te me la jch'aytik te jkat'eltik, sok nix-uk te templo yu'un te muk dios Diana mayuk me sk'oplal ya sk'ot. Jich yu'un ya me stak' xch'ay spisil te bit'il muk' sk'oplale, ja te yich'ojik ta muk' ta spisil Asia sok spamal balumilal. ²⁸ K'alal la yayik stojol spisil into, ilinik yu'un sok kajik ta aw, jich kaj yalik: ¡ ja muk' stukel te Diana yu'un te efesioetik!." ²⁹ Spamal te lum ma la snaik te beluk ya spasik, sok jich bajt'ik ta ora nax ta bay yawil muk'ul tsoblej. Yu'un stsakojikixa te sjuytak ta be'el te Pabloe, ja te Gayo sok te Aristarco, te talemik ta bay Macedonia. ³⁰ Te Pabloe k'anuk ochok ta yolilal te ants-winiketike, jauk me to ma la yich' ak'el yu'un te nopojeletik. ³¹ Janix jich la yich' tikumbeyel bael k'op yu'un cha-oxtul yamigotak te Pabloe te yich'oj yat'elik ta bay te tsaekal lum yu'un Asia te manchuk ya x-och bael ta bay muk'ul yawil tsoblej. ³² Yan yantik-nax te beluk yakalik ta yalel, yu'un maj snaik te beluk ya spasik. Bayal ta tul te maj snaojik te bistuk la yich'ik ta tsobel. ³³ Ay judioetik te la yak'ik ta k'op te Alejandro ja te mach'a yakik ta stenlbael ta komon sitil yu'un yakuk xchol spisil te beluk yak k'oel ta pasel, Jauk me to te Alejandro la stij te sk'ab yu'un k'anuk kajukix ta xcholel te bistu-uk te stsobojsbaike. ³⁴ k'alal la snaik stojol te Judioe, spisilik kajik majnax ta aw, cheb ora jalajik ta yalel: " ¡Ja muk' stukel te Diana yu'un te Efesioetik!" ³⁵ Jich te secretario yu'un te lume k'alal la skom te ants-winiketike, jich kaj yal: "winiketik yu'un Efeso, ¿ Mach'a ants winik le ta bay lum te maj snaoj te ja jkanantik te muk' Diana sok te ja' lok'omba te koem-tel ta ch'ulchane?. ³⁶ Melel te beluk k'ot ta pasel maj stak' ya jmuktik, ya me jk'an lamaluk ayex sok mayuk me bek jichnax ya jpastik. ³⁷ Bistuk awik'ojiktel jai winiketik to te ma be yelk'anojik te ch'ul na sok ma ba sbolk'opteyo te antsil diose. ³⁸ Jich yu'un, te Demetrio sok te mach'atik artesanoetik ja te mach'atik yakik ta yalbey smulik jai winketik in to, jamal me te bay chap'anwanej sok le ayika te mach'atik ya xchap'anwan. Jkik'teytik te jauk ya xchap'anik ta tulutul. ³⁹ Yan te me ya a k'anik a naik stojol yantik k'opetik ya me sk'an te yich chapel ta comon tsoblej. ⁴⁰ Jich yu'un ayotikme ta le-el k'op yu'un swenta te bila jajch'ix ta orita to. ma me sk'an te ayukotik ta xiwel sok manchuk beluk ya jkjaltik xan yu'un. ⁴¹ K'alal laj yot'an ta k'op, la stikumbael te ants-winiketike.