¹ Ja into, k'alal k'axikixa ta bay lum yu'un Anfípolis sok Apolonia, jich k'otik ta bay lum yu'un Tesalonica, banti ay jun snail stsobjibal yu'un snopel sok sk'oponel Dios (sinagoga) yu'un judioetike. ² Pablo, jich bit'il k'ayem ta spasel, bajt' ta bay ay te judioetik, jich la ya-anik te sjun te Dios, jich la spasuley oxeb semana ta sk'alelal ich' lewa. ³ yak ta sjamulayel te sk'op te Dios sok yak ta yalel, te puersa k'ax swokol te Cristoe sok te bit'il jach'tel ta ailmeletik. Jich la yal: " Ja te Jesus te ya jcholbeyex awayik janix te Cristoe". ⁴ Ay judioetik te la xch'uunik spisil into jich la sjoinik te Pabloe sok te Silas, sok nix bayal tsobol griegoetik te k'axemto yak'ojik xch'uunjel yot'anik ta stojol Dios sok nix bayal antsetik te tulan sk'oplalik. ⁵ Yan te judioetik te mach'a ma xch'unejik, jach' sbik'tal yot'anik, jich la tsob cha-oxtul winiketik te ma ba lek yot'anik te ayik ta ch'iwich, ba stsobik bayal ants-winik, sok kajik ta yutsintiley te lume sok ta xjachel k'op. ochik ta elek' ta bay sna te Jasón, yu'un ya sk'anik stsakik sok yak'ik ta stojol te lum te Pablo sok te Silas. ⁶ k'alal la yil te ma la staik ta le'el ja la stsakikbael te Jasón sok cha-oxtul yermanotak ta stojol Dios, la yich'ik ik'elbael ta bay ay te mach'atik tulan yat'elik yu'un te lume, awunik ta yalel: " jaik into te mach'atik ya xjachuleyik k'op ta lum, janix tal xjachik k'op le' into. ⁷ Ja te mach'atik la yik' ta sna te Jason, jichikme te bit'il mach'atik ma ba ja ya spasbeyik te sk'anjel yo'tan te Cesare; ja me yakik ta yalel te ay yan ajwalil, Jesus sbi'il". ⁸ Te mach'atik stsobojsbaik sok te mach'atik tulan yat'elik bayal a lijk' sjolik k'alal la yayik stojol spisil into. ⁹ Ja'uk meto, yu'un yakuk stak' xkoliktel-a, la yich' ta sujel te Jasóne sok spisil te sjuytak, yakuk stojik sok stak'inik, jich koliktel. ¹⁰ Jai ajk'ubalabi te hermanoetik la stikunikbael te Pablo sok te Silas ta bay Berea. k'alal k'otik le'a, bajt'ik ta ta bay ay stsobjibal yu'un snopel jun sok sk'oponel te Diose (Sinagoga) yu'un te judioetik. ¹¹ Te ants-winiketik le'a bayal xan slekil yot'anik-a te bit'il ta bay Tesalonica, yu'un binax yot'anik la stsakik te sk'op Dios sok kajik ta snopel ta jujun k'aal yu'un jich ya yilik-a te me mero melelnix-a. ¹² Ta swenta spisil into bayal mach'a la xh'uunik, jich nix la xch'uunik cha-oxtul antsetik griegaetik te toyol yat'elik sok nix bayal winiketik. ¹³ K'alal te Judioetik ta Tesalonica la snaik stojol te Pablo yak xcholel te sk'op te Dios ta bay lum Berea, bajt'ik le'a sok kajik ta xjachel k'op ta bay te lume. ¹⁴ Te kermanotaktike ora nax la stikun bael te Pablo ta bay muk'ul ja', yan te Silas sok te Timoteoe jilik le'a. ¹⁵ Te mach'atik la yik'ikbael te Pabloe, k'ejelto la yik'ikbael, k'alal ta lum yu'un Atenas, le' la yik'itayik jilela. Oranax te k'alal la yich' iktayel le'a, la yak'bey bael sk'op ta stojolik te Silas sok te Timoteoe yu'un yakuk xtalik ta oranax. ¹⁶ K'alal yakik ta maliyel yu'un te Pablo ta bay Atenas, te espiritu yu'un bayal a lijk' sjol k'alal la yil te nojel ta yajkananik te lume. ¹⁷ Jich yu'un bajt' ta k'op sok te judioetik ta bay stsobjibal sk'oponel Dios sok snopel sk'op Dios (sinagoga) sok nix te mach'atik ya yich'ik ta muk' te Diose sok ta spisil te mach'atik ayik ta bay ch'iwich. ¹⁸ Janix jich la stajsba sok cha-oxtul filosofoetik Epicúreos sok Estoicos. Chaoxtul jich la yalik: "¿Beluk ya sk'an yal jai mach'a ya xjelawnax ta k'op into?", jichnix te yantik yakik ta yalel: " Ja yilel ki te mach'a ya yik'tel ta xch'uunel yantik diosetik," yu'un yak xcholbel sk'oplal te Jesus sok te bit'il cha kuxtel. ¹⁹ La yich' ik'elbael te Pabloe ta vay jun wits te sbi'ilinej Areópago, jich kaj yalik, ¿ya ba stak' jnatikstojl te beluk yach'il bijtesel awich'ojbotiktele?. ²⁰ Yu'un ya jkaytik stojol sok chikintik te yankaya te beluk yak a cholbelotike. Jich yu'un, ya jk'an jnatikstojol te beluk ya sk'an ya yale". ²¹ (Yu'un spisil te Ateniensetik sok te mach'a yan lumetik te kuxinemik le'a mayuk bi ya spasik, janax baem yot'anik ta cholel sok ta xch'amel yayel-stojol te me ay bi yach'il-aye.) ²² Jich te Pabloe tejk'aj ta bay yolil te wits Areópago sok jich kaj yal, "Te jaex winiketik ta bay Atenas, ya jkil te bayal bin a ch'unejik. ²³ Yu'un k'alal yakon k'axeltel-a, ka-jkil spisil te beluk ja pastileyojik sok te ja ch'uunejik, la jta jun skajtib mantalil te jich tsibubil le'a: " TA SWENTA JUN DIOS TE MA JNABEYSBATIKE". Jich yu'un te jaexe,te Dios te jontolnax yakatik ta xch'uunel, Ja yakon ta xchoel. ²⁴ Ja te Dios te la spas te balumilal sok spisil te beluk ay le'a, yu'un ja te Kajwaltik ja yu'un te ch'ulchan sok te balumilale, ma ba kuxul ta bay jun naj te pasbil yu'un sk'ab ant-winik. ²⁵ Sok ma ba ya smajanbey sk'ap, te ya jkuytik te ay bek ya spas falta yu'un, Ja me yak' te kuxinele sok te ja yak'bey skuxinel te ants-winike sok xan spisil te beluk kuxatike. ²⁶ Ta swenta tul nax winik, Dios la xchiknantes spisil ta chajb anst-winiketik swenta yu'un ya xkuxinik sok ya snojesik te muk'ul lumetik le ta balumilal. Ja la xchajp'an ta ne'elal to te jayeb jawil ya xkuxinik sok te bay ya xkuxinik, ²⁷ yu'un yakuk sle'ik-a te Diose, jich ya yilik te ma ya sk'anik, te yakuk xba yalbeyik sbi'il te Diose sok te me ya sk'an ya staik ta le'ele. Melel ma ba k'ejelto ay ta stojoltik. ²⁸ Ja kuxulotik ta swenta sok te bit'il yaj tijabtik sok te bit'il ayotik ta k'inale, jichnix te bit'il yaloj tul winik te ya yal nichimal k'op: "Te jo'otikuke ja me stsumbalotik te Diose". ²⁹ Jich yu'un, te jo'otik te sts'umbalotik te Dios, ma me ya sk'an te jich ya jkuytik te Dios jich bit'il te oroe o jich te bit'il te platae, o jich jkuytik te bit'il ch'enetik te pasbilik jich bit'il ants winik o lok'ombaetik te lok'entel ta sjol sok pasbil ta sk'ab te ants-winiketike. ³⁰ Jich yu'un, te Diose la me yak' perdon te jayeb k'aal makal te ja sitik ta spasel te beluk ma lekuk ta pasele, jai ora to, jich me ya yalbey mantal spisil te ants-winiketik te ayik ta spamal te balumilale te yakukme sut yot'anik. ³¹ "Yu'un yak'ojbey yorail te ya slik mulil ta swenta te tul winik te mach'a stsaoj te Diose. Janix te Dios la yak' ilel yu'el ta stojol te winik into, te la xcha-kusestel ta bay aelmeletik". ³² Te k'alal te winiketik yu'un Atenas la yayik stojol te ya xcha'kuxtel te aelmeletik, cha-oxtul kajik ta slabanel te Pabloe; jixch nix ay mach'a la yal: "Te jo'otike ya jk'antik xan jkaytik stojol spisil into". ³³ Jich te Pabloe lok'bael ta yolil te tsobleje. ³⁴ Jauk meto ay cha-oxtul te la stsaklinikbael te Pabloe sok la xch'uunik spisil te beluk la yal ta k'ope, Jich te bit'il Dionisio ja tul winik te mach'a ya xchabanwan le'a, sok nix tul ants te sbi'ilinej Damaris, sok ay yantik xan a bi.