¹ Haima Pablo hareka Silas ohomarã, hasa reta Anẽipolispi, hareka Apoloniaipi. Hãma vãhẽi oho Tesalonicape, haipe'ẽi Judiore ñymbatyseape. ² Pablo jypykuarã oho jyve Judiore ñymbatyseape, hãrã mbahapy putu'uava jy'arape, ijeta pohyheshu reta, kuatia mbyparahava poryvape. ³ Mbeu kavishu reta Kristo manoñoĩ verãmba hareka kuerajyñoĩ verã. Heishu reta ko hay Hesu she ãmbeu'ãĩpea, haiñoi Mesia. ⁴ Ĩmẽimba'ẽi haire rojavare, hãrã ñimi'ĩrũmbahe reta Pablo hareka Silas, hetamba'ẽi jyve griegovare rojavare, Tumpa õmombai'iare, hareka hetamba jyve taupe mbyvetehavare tentape. ⁵ Tẽivã kova Judiore jyrojambavare heshatãã reta, hãrã õñepyrõ mbaty reta kuimbaire haipi pehupi ikoreii'iare, opa momõhe verã hoka tentape'ẽivã. Hãrã vãhẽi jyraha Jason hẽintape heka jyre Pablo hareka Silas, nohẽirã mẽiẽishu verã kuaretare. ⁶ Hãma vahẽiamashu reta Pablo hareka Silasrã, mbytyryry raha reta Jason hareka ã'ãmo jyrojavare, hãrã raha reta huvishare hẽinonde, sapuke jyre: Ko kuimbaire pyrymangãtumba'iare ko yvy jerekue, ã'ẽi ouma jyve kope, ⁷ hareka Jason myvãhẽishu reta hẽintape! Haire ñymbyvaishohe Romape'õ huvisha vasu heiva japoha verã, hei reta ẽijya yngava huvisha vasu, Hesu he'iashua! ⁸ Hẽinduma reta kovarã, kuaretare tentape'õre hareka huvishare opa poshy hareka hẽindaveã reta. ⁹ Tẽivã Jason hareka ã'ãmo jyrojavare mbyhepyshu, hãrã opa poiashi reta. ¹⁰ Pyntumarã Hesu jyrojaheare ãrẽi'ãĩte mondo reta Pablo hareka Silas Barea kyty. Vãhẽima jyraharã oho reta Judiore ñymbatyseape. ¹¹ Kovare pya kavitevembashi Tesalonicape'iare, vy'ape mẽivãhẽi reta ñẽiẽi, opa ara ñymbo'eka kavihe reta Mbyparahava, kuaa verãre añetera mbe'uha'ẽishuare. ¹² Hãrã heta'ẽi rojava hareka griegovare, kuimbai hareka taupere. Kova kuaretare hai vateve'õ tentape, opaiteva taupe hareka kuimbaire. ¹³ Judio Tesalonicape'iare kuaama Pablo hareka Silas mbeu jyre Tumpa ĩñẽiẽi Bereaperã, oho jyve reta haipe opa momohẽi kuareta heta vekua. ¹⁴ Hãrã Hesu jyrojaheare ẽirẽi'ãĩte mondo reta Pablo yyvasu hymbey kyty, tẽivã Silas hareka Timoteo pyta reta Bereape. ¹⁵ Hãma Pablo mĩ'ĩrũ rahavare oho hãndi reta tenta Atenaspeve. Haivi oujy reta veru ñẽiẽi Silas hareka Timoteo pevarã, pota areãmĩte ñymbaty hãndi verãre. ¹⁶ Pablo hãrõ ñynoĩ Atenaspe Silas hareka Timoteo, mbyvy'ã hesha hoka tenta tynyhẽiite tumpare rã'ãngakuerã. ¹⁷ Hãrã ijeta hãndi reta Judiore ñymbatyseape, Judiore hareka opaite Tumpare jyrojavare. Hãrã opa ara ijeta jyve hãndi plazape ñymbaty'õre. ¹⁸ Hãma epicureo pyrẽimboi'iheare hareka estoico ijeta pohy ijupe hãndi reta. Ĩmẽi'ẽi heiva: Mbaivara ijetahe hokava ĩñeegãtu'ia? Ĩmẽi'ẽijy heiva: Ĩme'ãmo yngava tumpare myhẽirãkua'iare. Shara mbeushu reta Ñẽiẽi kavi Hesu ryheva hareka manovã kuerajya ryheva. ¹⁹ Haivi raha reta Areopagope, haipe pyrandushu reta: Katura jaikuaa marãva pyrymbo'eahea py'ahuvara reru ore? ²⁰ Shara rĩnjetahe ore mbai py'ahuva kuaahambava, hãme rãnga pota kuaaha mbaira he'ise hokava. ²¹ Shara opaiteva Atenaspe'iare, hareka tenta yngaivi ouva haipe iko'iare, haire koñeĩ jypykuaa mbeu hareka hẽindu mbai py'ahuva. ²² Pablo pũã mbytepe Areopagoperã hei: Kuimbaire Atenaspe pẽiĩvã, ahesha pymbyveteva tumpa ha'ãngare. ²³ Shara pemombai vasuvaipi ahasarã hareka amãĩrã, ahesha pẽinte altarpe pẽinte ñẽiẽi mbyparahava heiva: ''Pẽinte Tumpa kuaambava''. Hoka pikuambava pemombai vasu pyreva, hai rãnga ambeupe. ²⁴ Hai Tumpa yvy hareka opaite'ẽipyvare japo vekua, haijy yvy hareka ara Ijarã, ikoã hai tupao kuaretare japovape, ²⁵ ikoteveãhe mbava kuareta mbai japoshu verã, hai mẽiẽi ñande tykove, yvytu ñanutũhẽi verã hareka opa mba'e. ²⁶ Pẽinte kuimbaivi rãnga opa japo tenta vasure, iko verã yvy'ĩãrẽi, hãma heishu reta mbaipeitera hareka maperapo iko, ²⁷ heka verãre Tumpa, pyvyvyheape rãĩmipo katu vãhẽishu, ajema añete hai mbyryã'ẽi ñandyhevi. ²⁸ Shara hai rupii jaiko, ñamẽiĩjaiko hareka ñaĩmejai, heiva rãĩmi peeva ñẽiẽi yvoty japo'ia reta heirã vẽikua. ''Ñande hai Tumpa ñymoñashia''. ²⁹ Tumpa ñymoñashia ñanderã, katuãpo ñandypya ñambijetarã Tumpa ñambivachehe, ita verava mashyãva, maĩnunga verava mãĩrã itaivi kuaretare japova. ³⁰ Tumpa hejareiimbashi aryka'e kuaretare kuaambape mbai japo vekua, tẽivã ã'ẽi opava retape hareka opa rupi'iare heishu oujy jykoty verãre. ³¹ Tumpa ñono pẽinte ara mbivacheka verã hekope kavi yvy jerekuepy'õ, pẽinte kuimbai rupii hai pyhẽirõ vekua, hareka heshaka hai pyhẽirõva mbivacheka verã mũpuãjy manovare mbyteivi. ³² ãma hẽinduma reta manova kuerajya ryhevarã, ĩmẽi'ẽi ñymbyhoryheare, tẽivã ĩmẽi'ẽijy heishuva: Nyrẽinduhaipojykui ĩrũ arape hokava ryheva. ³³ Haipema Pablo õhejy'oho haire mbyteivi. ³⁴ Tẽivã ã'ãmo ĩmẽimba'ẽi ñimi'ĩrũheva Pablo hareka rojavare, haire mbytepe'ẽi Dionicio, hai Areopagope'ia, hareka ĩmẽi'ẽijyve pẽinte taupe Damaris he'iashuva, hareka mbovy ñĩ'ĩrũre.