¹ Pablo vãhẽi oho Derbe hareka Listraperã haipe hesha pẽinte mbo'earea, Timoteo he'iashua, pẽinte taupe Judiava memby ko taupe jyrojava jyve Hesu Kristore, tẽivã tuu hai Greciape'õ. ² Hesure jyrojavare Listra hareka Iconiope'õre mandua kavihe Timoteo, ³ hãrã Pablo pota Timoteo oho hãndi ohovaipi. Tẽivã tynonde pire chĩchĩkashi, potãã Judiova haipi'iare poshy ñynoĩrã, shara haire kuaa kavi tuu Greciape'õrã. ⁴ Opaite tenta hasava retaipi, mẽiẽi kuatia pẽinte ñẽiẽipe Apostolre hareka tupaope mĩñaka'iare Jerusalenpe'õre mbypara vekua, opaite kuaretare japo verã. ⁵ Hãrã jyrojava tupaope'õre, ñymẽipyrãta oho jyrojakuepe hareka opa ara ñymby hetave oho py'ahu jyrojavare. ⁶ Hasa jyraha reta Ẽrigia hareka Galaciape, shara Espiritu Santo ñonoãshu reta mbeu verãre Tumpa ĩñẽiẽi Asiape. ⁷ Vãhẽima jyraha Misiaperã, pota jyraha jyre Bitiniape, tẽivã Hesu jy Espiritu ñonoãshu reta. ⁸ Hãma hasa reta Misia jurirã, oho reta Troaspe. ⁹ Haipe Pablo pyhare hesape'ẽi pẽinte kuimbai Masedoniape'õ ñymbou'ẽi hareka jurureshu: ''Ei Macedoniakyty, yrẽimboryvei. ¹⁰ Haivi Pablo heshama hesape'orã, opa ravẽii õĩã kavi ohoha verã Macedoniape, shara kuaaha kavi Tumpa ẽirẽirẽino haipe ohoa mbe'ua verã Ñẽiẽi kavivarã. ¹¹ Hãma ohoha varkope Troasvirã, symyĩ ohoha Samotrociape, hãmã ĩrũ arajyape vãhẽihã ohoa Neapolispe. ¹² Haivi ohoajy Ẽilipospe, hai tenta tynonde'õ Macedoniape. Haipe mbovy ara pytaha. ¹³ Pẽinte putu'uava jy'arape õhẽihãshi tenta vãsu ohoha yy syryva hyvache, moa haikavi jurureha'ẽiverape, vapyha ijetahashu taupere haipe ñymbaty'õre. ¹⁴ Hãrã pẽinte taupe Lidia he'iashua, tenta Tiatirape'õ mondeava pynta hũũva hepyva õvẽinde'õ Tumpa õmombai'ia, jasaka kavi'ẽihe Pablo ijeta'ẽirã, hãrã Ñandeja peashu pya jasaka kavihe verã Pablo hei'õva. ¹⁵ Hai ñymyngaraima hẽinta ĩrũre hãndirã, jurure'asy orerã hei: Añeteĩte pyroja she airojava Ñandejarerã, pekua pypytave shyrẽitape. Irĩmiñerã'i yryrahapeve hentape. ¹⁶ Pẽinte arape ohoha ñymbo'eharã, haipe heshaha pẽinte kuiñataĩ jokueha'reirea ñymbai kuaa'ia ñyvãĩtĩhã hãndi. Hai heta mbykyrypoti ijarãreare, ñymbai kuaa'irã. ¹⁷ Kova kuiñataĩ oho yraykuerã, sapuke: Kova kuimbai reta rãnga hai Tumpa vate õ jokueva, haire mbeupe ohojepeva hape. ¹⁸ Hãrã heta ara kova japo'i. Pablo hẽinduseveãma heivarã, jerepyrã heishu mbaiposhy taupe iko'ipya: She hai nde Hesukristo heepe, ẽihẽishi ko kuiñataĩ! Hãrã haipevaĩ mbai porãmbava õhẽishi ko kuiñataĩ. ¹⁹ Kova kuiñataĩ jokuereare heshama katuveamapo kyrypoti heky retarã, pysy reta Pablo hareka Silas, hãma raha huvishare hẽinonde, plazape. ²⁰ Haipe heishu reta huvishare pirĩmbivache'ia: Ko kuimbaire haitẽijyve Judavare, opa myporãã ñynoĩ ñanyrẽita, ²¹ haire pyrymboihe jypykuava rãĩmi kuaahamba'oreva hareka ore Romavare porãã japoha verã. ²² Haipema hẽinta'ore ñymbyvaishohe reta, hareka huvishare heishu myndoroshi verãre mondeva hareka nupã verãre yvyrape. ²³ Hetama nupa retarã, raha mĩje reta pyrẽimbyperesoavape, hãma haipe'õ huvisha, heishu ñyngareko kavihe verãre. ²⁴ Hãma kyrãma he'iashurã, haipe ñyngareko'õ, raha huvakyty, ñonohe reta ipyre yvyra miñyvẽihava. ²⁵ Tẽivã pyhare mbytepe Pablo hareka Silas ñymboiñynoĩ retarã hareka pyraheshu reta Tumpa, haipe ĩrũ mbyperesoareare jasaka ñynoĩhe reta. ²⁶ Haivi sapy'ãĩ hẽinãtu yvyryry hãrã opa my'õmy oo jypyre, õchere opa jypea hareka mbyperesoareare opa jerashi kadenare. ²⁷ Haipe sareko huvisha haipe ñyngareko'õrã, heshama õche opaiteva jypea ohorã, heky jykyse ijuka verã, shara hei pyape, mbyperesohavare opama ñemiva. ²⁸ Tẽivã Pablo sapukerã heishu: Avy japo ndijehe porãmbava! Opaĩ ĩmehã'ẽi kope! ²⁹ Haipe veruka pẽinte sapepy verã, ñani oho oo hapype, opa ryryrã ĩñesu Pablo hareka Silas hẽinonde. ³⁰ Katoape raha retarã, haipe pyrãndushu: Karaire, mbaivarapo ajapo ahajepe verã? ³¹ Haire heishu: Jyroja Ñandeja Hesukristore, hãrã reohojepe hareka jyve nyrẽitape'õre. ³² Haire mbeushu Ñandeja ĩñẽiẽi, hareka opaite hẽintape'õre. ³³ Hoka orapevãĩ pynturã, hai raha joheshi mbypereha vekuaipi, haipevãĩ hai hareka hẽintape'õre ñymyngaraika reta. ³⁴ Haivi raha hẽintape myngaru verãre, hareka vya hẽinta ĩrũre hãndi, Tumpa jyrojamavehe retarã. ³⁵ Kõĩmarã huvisha pirĩmbivache'ia mondo syndaro ñyngareko'i pyryrehevare he'ikashu verã mbyperesoava ñyngareko'iheare juhuvisha: Opa mohẽijy hokava kuimbaireta. ³⁶ Haipema mbyperesoavare ñyngareko'ihea juhuvisha heishu Pablo: Huvisha pirĩmbivache'ia reta rãnga he'ika she apyrẽimohẽijy verã, hãrã katuma pypyavapy ryheve pehojy. ³⁷ Pablo heishu reta: Opavare hẽinonde rãnga ũrũnupãhã mãĩ kavimba yryrehevape hareka ẽirẽimbypereso reta Romavatẽi oreva. Hãmera ã'ẽi pota ñemĩapeĩ ẽirẽimondojy reta? Kyrãã rãngapo! Hairetateiva rãngapo ou ẽirẽinohẽijy verã. ³⁸ Haipema syndaro ñyngareko'i pyryrehevare ohojy mbeushu reta huvisha pirĩmbivache'iare, heishu Pablo hareka Silas Romava retãrã. Kova hẽindurã opa myngyje reta. ³⁹ Haipe ou heishu reta Pablo hareka Silas haire mbasyva japoheare. Haivi nohẽijy retarã jurureshu õhẽi verãre tentaivi. ⁴⁰ 40 Õhẽima pyrẽimbyperesoha õĩvirã Pablo hareka Silas oho reta Lidia hẽintape, haivi Hesure jyrojavare heshamarã hareka opama mykyrẽiyshu retarã, oho haivi.