¹ Iconiope Pablo hareka Bernabe jypykuaañoĩ reta ichejyre reta israelitare jy tupaope, hãrã ĩjetareta mbyrojaka verã, Judiore hareka haimba Judiore. ² Tẽivã Judiore rojambaare mbyposhyka reta haimba Judiore hareka mbyvaishokahe Hesure jyrojavare. ³ Tevã, Pablo hareka Bernabe pytavejyre reta haipe shara Ñanderu Tumpa jyrojahe retarã kyjemba ryheve ijeta Ñandeja heepe. Hai my'añete haire heiva Tumpa jyhaihu, mbai heshahava hareka mbai kavi heshaha verã rupii, haire ipoipi japova. ⁴ Tẽivã hẽinta'iare opa ñimbijajao: Ĩmẽi'ẽi israelvare jykoty'õ, ĩmẽijy Apostolre jykoty'õ. ⁵ Haipema ĩñono reta pẽinte ñeepe israelva hareka haimba israelva hãndi mburuvisharã'õre, apostolre itape japi verã. ⁶ Tẽivã Pablo hãndi Bernabe kuaa hokavarã ñemĩ jyraha reta Listra hareka Derbe, tentare Licaoniape'õ juri. ⁷ Hãrã haipi mbeujyve reta Ñẽiẽi kaviva ryheva. ⁸ Listrapemba'ẽiẽi pẽinte kuimbai katumba vatava oa ryheve ishy hyepe opa jajapa. Ko kuimbai vapymba ⁹ hokava jasaka'ẽihe Pablo hei ẽivãre: Hãrã Pablo mãĩherã hesha jyroja katu'ẽi hareka kuera verã. ¹⁰ Haipe Pablo hynãtu ijetarã heishu: Pu'ã hareka ñymbo'y! Ko kuimbai opotei puãrã ñymboy hãrã õñepyrõ vatajy. ^{12 11} Heshama ko Pablo japovarã opavare õñepyrõ sapuke Licaoniare ĩñẽiẽipe: Tumpare vejy kuimbaire rãĩmi ñande ñaĩvape! 12 Haivi Bernabe ñonoshu reta Tumpa Seus rãĩmi hãrã Pablo Hermes rãĩmi shara hai ijeta ẽirã. ¹³ Kova Pai Seus ĩmereva jutupaope tentare hẽinonde icheha'õivi, veru toro hareka yvoty mymashy'ãhava hõchepe, hai hãndi kuaretare pota omobaishu reta mymba mbijichearã jukava. ¹⁴ Tẽivã Bernabe hareka Pablo kuaama hokavarã myndoro reta mondeva hareka iche mbytepe sapuke reta. ¹⁵ Kuimbaire, marã'ĩrãra kova pijapo? Ore rãnga kuareta peeva rãĩmi jyve ouha peveĩ rãnga veruhape verã Ñẽiẽi kaviva, pijyhejama verã mbaimba vekuaivi, hãrã pijerejy verã Tumpa hykoveva jykoty, japo vekua ara, yvy, yyvasu hareka opaite ẽipyare. ¹⁶ Mã'ẽiĩmbahe añete opaite kuareta arykaivare iko pota ikova rãĩmi, ¹⁷ Ajemaĩ heshaka ñoĩteshu reta mbavara hai, mbaikavi japo opaiteva pevarã: mboupe ama, ñotyhavare myno'õha kaviva hãrã hokava mẽiẽipeva heta peu verã hareka pyvya verã. ¹⁸ Ajemãĩ heta mbai heishu reta, tẽivã katuã jokoshu reta ẽinteñoma mymba mbijicherã juka verã. ¹⁹ Hãma Judiovare Antiokia hareka Iconiova kuaretare mbyposhykashu hareka mbyvaishokahe verã Pablo. Hãma itape Pablo japi reta hareka mõãte jykama retarã, mbytyryry nohe reta tentaivi. ²⁰ Tẽivã Hesu mboireare ñymbaty jyrehe Pablo. Hãrã hai puãjyrã hykuaĩ ichejy hoka tentape, hareka parejyrã õhejy hãndi Bernabe Derbes kyty. ²¹ Hãrã opama mbe'uha Ñẽiẽi kaviva hoka tenta Derbeperã, heta haipe japoshi mbo'ehare verã. Kova oparã, jyraha reta Listrape. ²² Kovare ẽivãpe mykyrẽiy jyshu Hesu mboireare, ñimiñẽi'ẽirã heishu reta tantai ẽiẽi vẽirãre jyrojakuepe heivape shara jaiche verã Tumpa ẽivãpe heta rãnipo jahasa asy. ²³ Ñono jyve reta pepẽinteĩ kuakuavare ñyngareko verãre tupaope, haivi opa jurure hareka karumbape ñynoirã hejashu reta Ñandeja ipope, haire jyroja jyvehe. ²⁴ Haivi hasa Pisidiapirã vãhe reta Panẽiliape. ²⁵ Mbeu reta Ñẽiẽi tenta Pergepe, haivi oujy reta Ataliape. ²⁶ Hãrã haivi jupi reta varkope hareka jyraha reta Antiokiape, hokava tentaivi mondohaka reta mbaikaviva pevarã hareka ñonoshu verã Tumpa ipope japoverã Tumpa japovekua. ²⁷ Vãhẽi reta Antiokiaperã mbatyshu tupaope'õ reta hãrã mbeushu reta opa mbai Ñanderu Tumpa japo vekua haire ipo rupii hareka marãra mbory iche verã ynga tenta haimba Judiore retaipi haire jyroja verã jyve. ²⁸ Hãrã Pablo hareka Bernabe heta ara pytavejy mbo'eareare hãndi.