¹ Hoka arape mburuvisha vasu Herodes õñepyrõ mõñakashu ã'ãmo tupaope õre ryheva. ² Hãrã mõndo jukaka Jacobo kyse pukuvape, Juan tyvy, ³ heshamahe Judiore haikavijyveshu hokavarã, pysykajy Pedro. Kova jehu aretepe, pãhã jylevaduramba ho'uava arape. ⁴ Hãrã Herodes pysykama Pedrorã, mĩje karcepe hãrã mĩngarekokahe urũndy jaty'õ syndarore urũndy syndaro pepẽintei'ẽiva, pya mbijetahe Paskua hasamãrã nõheka verã tenta hẽinonde. ⁵ Hãrã Pedro karcepe teri'ẽi ñyngarekoha'ẽiheape, tupaope ẽivãre jurure pevẽiĩ ñynoĩhe Tumpape. ⁶ Haivi Herodes nohejyvyimã'ẽiverã pyharepe mẽiẽi verã hẽinta'õre ipope, Pedro oche'ẽi mokue'õ syndarore mbytepe, tãnta pokuahape mokue cadenape, hareka ĩrũ syndarore katoape õnchepe ñyngareko'ẽihea karcel. ⁷ Sapy'aĩ ijeshaka Ñandeja jokueva hareka hĩmbipekue opa mykõĩ'ipe pyrymbyperesohaseape. Tumpa jokueva Pedro pokoherã, mombarã hei: Narẽiã pũ'ã! Hãrã haipe kadenare opa oashi Pedro papyivi. ⁸ Hãrã Tumpa jokueva heishu: Jokua ndukua hareka mondejy ndypasa. Opa kyrãã japorã Tumpa jokueva heijyshu: Mombo ndijehe rijasoiva hareka'ei shaykue. ⁹ Hãrã Pedro oho Tumpa jokueva haykue, kuaamba añetera ti ha'ẽiara Tumpa jokueva. Shara mõãte jypaihupẽiĩ heshava. ¹⁰ Tevã hasareta tynonde'õ hareka mokuehea, ñyngareko ẽivãĩpirã vãhẽi jyraha õche hiero jepei'õ pe'ahava tenta kyty, hareka opaite õche ijuhuvima jypea. Õhe reta ãrẽi'ãĩte hareka vataha'õipi pẽinteva hasamarã, haipe Tumpa jokueva mã'ẽiĩhemahe Pedro ha'ẽiĩ. ¹¹ Pedro kuaama mondo ikovarã hei: Ã'ẽi aikuama añete Ñandeja mbou jokueva shyreka hareka shynõhẽijy verã Herodes ipoivi, hareka opa mbai Judiore japotẽi shyrehe verã. ¹² Kova kuama mondo Pedrorã, oho Maria hẽintape, Juan ishy mbyheeava jyve Marcos, haipe heta kuareta ñymbaty'õre jurure ñynõĩ Tumpape. ¹³ Haivi pe kyty'õ õnche nunuparã, õhẽi pẽinte kuñatãĩ Rode he'iashua hesha verã mbavara. ¹⁴ Tẽivã haipe Pedro ĩñẽiẽi kuarã vy'aiterã õche ohote peava; haivĩ jyrovarã ñanijy oho oo'ipe mbeu verã Pedro õchepe'ẽiva. ¹⁵ Hãrã opaite oo ipe ẽivãre heishu: Rikuakuãrari! Tẽivã hai heijyvyĩ haiñoĩva. Haireta katy heijyvyĩ reta: Ha'ẽiã rãnga ãmo; Ñyngarekorehea vatepeva ãmo. ¹⁶ Haipe Pedro ĩmeĩ nunupa teri'ẽi õche, peamã retarã opapavẽiĩ hesharã mbyrymaĩ reta. ¹⁷ Tẽivã Pedro ipopei myha'ãnga heishu reta jasaka verãre, haivi mbeushu reta marãra Ñandeja nõhẽijy mbyperesoavaivi, hãrã heishu reta: Pikuaaka jyveshu Jacobo hareka opaite ñandyryvy ñandyryhevare. Hãrã õhẽi hareka oho ynga tentaipi. ¹⁸ Koĩma ourã, syndarore opa ikorai reta, kuãã mbaivara iko hareka mbaivara ikohe Pedro. ¹⁹ Hãrã Herodes mondo hekakashu Pedro, tẽivã heshããma retarã, pyrãndujy opaite ñyngarekohe vekuare hareka haivi jukakashu reta. Haivi Herodes õhẽi Judeaivirã oho pyta Cesareape. ²⁰ Herodes poshyshu opaite kuareta Tirope õre hareka Sidon, tẽivã haire pẽinte ñẽiẽipe ñynoĩ jyveru verã hai ẽivãpe, Hareka mẽiẽireta kyrypoti Blastope ijeta kavihe verãre. Blasto hai huvisha vasu Herodes hẽintape mboryrea vate'õ, hãrã jurure reta ẽiejyverã pya vapy, shara haire nõhẽi reta hou verãre mburuvisha jy yvyivi. ²¹ Herodes ñonoshu reta mbai araperapo ou reta hai ẽivãpe, hareka hokava arape monde mondehava mãshyava hãrã vapy'ẽi huvisha vasure vapysepyape ñimiñẽiẽishu reta. ²² Hãrã opaite kuaretare sapukerã hei: Ko ijeta'õ ha'ẽiã kuareta, kova hai Tumpa! ²³ Haipevãĩ pẽinte Tampa jokueva mbypere, shara õmomba'ẽiãshu Tumpa, hãrã Herodes hasorã mano. ²⁴ Tẽivã Ñanderu Tumpa ĩñẽiẽi mbe'uhave rahaha hareka ñymbyhetave oho. ²⁵ Bernabe hareka Saulo opa japo japoverãrã, oujy reta Jerusalenvi hareka veru reta Juan, mbyheeava jyve Marcos.