Capítulo 3
Apquellanemmacpelha etnancoc apquellelto nac Jesucristo apquennemolhema
1
Elleltennasamo ta njan Jesucristo apquennemolhema ellanac elleliejecjoc gobernadores canjan apqueluescai'e, etengianco mota ellanancoc caselha altacmelo m'a.
2
Ellana ta njan lheiap melentepcasama apqueluesai'a po'oc ma'a, etengiancoc na metca acmasca, etnancoc na
apqueliamolhma canjan nalhep'awec apualho'oc napaqtawec aplhamacjo enenlhet'awoc.
3
Ennenco'o lhta njan malha nengellelto metca enqatco'oc la'a, mangelleliejecjo njan ma'a, malha lhta njan neltaianco netlheneiam la'a, jengenmaicama lhta njan lhamacjo actemacja aletsepma ennengio'oc anac, nquelleclemawe lhta njan engellualho'oc nellanenco la caselha ncollatsecama. Neten anque lhta mongeliamolhma, neliasepquescama njan, neltacnonwecje lhta emmo'oc engancawe nengiesecsa m'a, canjan jengeltacnonconque lhta njan enenlhet.
4
Coca ncacjoc Engiapom Neten apto jengeluonquescama tep jengeluetasquescanque lhta panquec aptema apiamolhma apanque, apquellamelaiam na aplhamacjo enenlhet'awoc lhmanquec jam,
5
niecje lhta ennenco'o mongellaneianco caselha altacmelo, ncacjoc coca engiosac'ac jengellanei'o m'a Engiapom Neten, jengeluonquescamo njan tep, jengellalhnasquescamo njan engellualho'oc, malha njan jengeltemesquescamo njan malha la colhua nempalleiam, jengellaianco alhnancoc nengiennactema
aniem'o Espiritu Santo.
6
Jai', apianquenque lhta Engiapom Neten Espiritu Santo aclanei'o aquiecanweiacmo tecjenlhet'oc ennenco'o aniem'o njan Jesucristo apto jengeluonquescama tep,
7
awanjec anquec jengellamelaiam Engiapom Neten, jengeltemesquescamo lhta njan nengelpeiwomo, colhua nnanquec alleljalhnecama engellualho'oc angetlhewancoc jata aliennactema ennengio'oc ncotnenwaianlha nnelha m'a.
8
Jai', jawe ngiapac anquec astemacja na mota asquetlhecmoscamo lheiap, eltacjenwescacja ta mota m'a napaqtawec aplhamacjo Jesucristo apquennemolhema cacpota etengianco mota ellanancoc caselha altacmelo m'a. Jai', ntasec ma'a jengetlhecmoscama nac, awanquec ncolpasmoc aplhamacjo enenlhet'awoc.
9
Meluanenwomanquec lheiap apquellatemmommap anac actaicama nquec apquetlhenaicama apquelieijenca'a aptepecamoc neptamna'ac ma'a, meujanenwom anquec na apqueliamenammap apquetlheianma apquellatemmommap actemacja jenganemacja Moises anac, coca acjemo m'a, mancotacmelquesec neganiemjaicama m'a.
10
Ca apuet'o la lheiap lhema enenlhet apquelhpanquescama apiesesec anac Jesucristo apquennemolhema jam, ennawes jata lhema nlho ca la jante aptaiecjo, coca mancomac'o la engiailhoc ma'a, melto nquec epalhacuatac ma'a
11
ncanec malha aplheneiam ma'a, ntewasacjenquec aptemacja meijamolhma m'a.
Pablo apcaicamoc lhema apaioma Tito
12
Anwapacsec jatelha lheiap Artemas nlho ca la njan Tiquico, lheiap jatoca engiacjac ma'a Nicapolis cacpota angeluetalhcac ma'a, co'o njan asmac'ac angiacjac ma'a cacpota alhec apualhoc pieiam ma'a.
13
Ntasec na epasmoc lheiap abogado Zenas canjan alhelhma Apolos, ellamoc jata njan caselha alaimommalhquelha la m'a cacpota elempecjoc mocjom apquetlhengama, mancolaimalhquec jata njan caselha m'a.
14
Lhamacjo Jesucristo apquennemolhema la'a ntasec eltacmelquesquesec apquellaniemjaicama po'oc, elianwomjoc na ellanancoc caselha altacmelo, elpasmoc na po'oc alaimommalhca nac caselha apanco'oc.
15
Nquetlhenquec na apualho'oc lheiap jenque'e asquetlhelhma'ac anac, etsacjes jata njan lheiap aclheianma enwalho'oc nentemo lheme mongeliasqueiam jam. Asqueltawec na Engiapom Neten ewaiwesentac nengamelaiam aplhamacjo tacjaplhet'oc jam.