Capítulo 7
Nema allelcascama 144.000 enenlhet
1
Netamen ma'a asuet'a lhta 4 enenlhet neten apquelanma aquieto m'a, lhema tep acnem, po'oc na nelhqueija', po'oc na mangcolha acnem, po'oc nepieiam, apquenmanque lha m'a 4 alelhcaianlha alhcaiam cacpota mangcolhcame tacjalhet lhepop, tacjalhet na aluata aquiawac'acja, tacjalhet'oc iamet.
2
Asuet'o lhta njan lhema enenlhet neten mocjom apqueniem'o m'a tep acnem, nietne lhta lhema caselha jentalhescama ancoc, apiennacteso lhta njan apaioma apquelpaqmetqueso 4 enenlhet neten lhec apquellelto lhta apquetlhewaicamoc apquemopuanca'a cacpota enaqtewacsec lhepop lhmangquec jam
cacpota njan aluata aquiau'acja, lhta aptac:
3
—¡Ellaielh! Menactewes colhuawec lhepop, aluata aquiau'acja cacpota njan iamet, ngcaimelhquec secjec annactalhacsec alpaijacja napaqta'a apquellelto nac Engiapom Neten apquennemolhema—lhta aptac ma'a.
4
Netamen alhta m'a asleng'o nema alheianma 144.000 nema allelcascama enenlhet'awoc co Israel.
5
12.000 alhta apquennemolhema apquelleniem'o Juda, 12.000 alhta apquennemolhema apquelleniem'o Ruben, 12.000 na apquelleniem'o Gad,
6
12.000 na apquelleniem'o Aser, 12.000 na
apquelleniem'o Neftali, 12.000 na apquelleniem'o Manases,
7
12.000 na apquelleniem'o Simeon, 12.000
na apquelleniem'o Levi, 12.000 na apquelleniem'o Isacar,
8
12.000 na apquelleniem'o Zabulon, 12.000 na apquelleniem'o Jose, cacpota njan 12.000 apquennemolhema apquelleniem'o m'a Benjamin.
9
10
Netamen asuet'o lhta njan apentalhnema apanque' enenlhet lhmangquec jam, lhamacjo aptemacja apquelpaqmeiasma, apiempeioc najan, apquenmopai'a panque lhta njan apquelentalhnema, cacpota njan ietapa'ang apua'a apmeio'oc, apquelanwacje lhta naqtec nema actanema, cacpota njan nepquesec apquetcoc, apquelliennactesque lhta apquelpaqmeiasma, lhta aptancoc:
—Nengelluongcasemmalhca tep anac alleniem'o m'a Engiapom Neten apnemo m'a aptanema cacpota njan nepquesec apquetcoc—lhta aptancoc ma'a.
11
Ca enenlhet neten alhta aplhamacjo apquelanma apjalhiencaiam aquieto lhta m'a nema actanema, metno apquetcoc alhta njan ma'a, cacpota njan 4 malha caselha neujac, apqueljalhantamo lhta acuacmo apquelteclhei'o napaqta'a lhepop napaqtec Engiapom Neten apno aptanema, apqueltacnescasenco njan apuesai'a m'a,
12
lhta aptancoc:
—Jai', amen, angeltacnescasanco ta mota Engiapom Neten, ncolliemacsec jata mota engellualho'oc nema apiamo apanque', apiennactema, cacpota njan acnema apmopuana, angellajoc na apuesai'a, antancoc jata mota gracias. Amen—lhta aptancoc. enenlhet neten.
13
Netamen lhema metno apquetcoc alhta jenmalhnema, lhta aptac jeiano:
—¿Apiawe ie lheiap apquenmopai'a nac apquellentalhenma, cacpota njan apquelleniem'acja?—
14
—Ma', lheiap coca apiawe—lhta stac ascatemmonca m'a. Coca lhta ptac mocjom jeiano:
—Coca enenlhet'awoc anac ma'a apquellelto lhta apquelletsepma aniem'o lhta aquiawai'a aquientalhnema, nnec anmopescasacjo apquelentalhnema aniem'o ema apancoc nepquesec apquetcoc,
15
ca ncanec elloca napaqtec Engiapom Neten apnema aptanema m'a, ellasennama njan cnem anque', pelhasep najan aquieto m'a apnemacja. Elloca ta njan lhemec ma'a.
16
Mellengangquec jata mocjom mec, acnem annapma' cacpota njan majat,
17
eltacmelquesec jata mota nepquesec apquetcoc aquiet'o m'a aisecsec Nema Actanema, malha acto nac apquelanecama la nepquesec
apqueliantemecja aquietnacja iemmen actacmanma, Engiapom Neten jata njan eljatsoscasancoc aimen'oc apaqto'oc ma'a.