¹ Netamen asuet'o lhta mocjom alhnancoc neten cacpota njan alhnancoc lhepop, mmasquengwacme lhtoca nengwetai'a lhepop cacpota njan neten alhta, cacpota njan aluata aquiau'acja. ² Asuet'a lhta apuaiwantamo tacjalhet alhnancoc nalhepop temma apocquenammap apjalhnancoc apuesai'a Jerusalen, nne lhta acpenescaso alienmoma ncoc malha ctonac nqueluana alailhema acpoccanma. ³ Asleng'o lhta nema aliatecama aquiennactema nquec aniem'o apuesque aptanema, lhta ntac: —Elanjono ja'e apuaiwantaniec Engiapom Neten apnemacja' tacjalhet alhnancoc lhepop lhec, elloca ta lhemec Engiapom Neten ma'a, apquennemolhema apancawec enenlhet'awoc, etnec jata apuesque m'a. ⁴ Eljatsosquesancoc jata aimen'oc apaqto'oc apquellelto la apiapqalhema, ngcomascoc jata apqueletsepma m'a, apqueliapqalhema, apqueluenema, ngcomascoc jata njan acmasca ncanec masquengwacmec caselha ngcolatsecama m'a—lhta ntac nema aliatecama ⁵ Lhta ntac nema aliatecama apnema apuesque aptanema: —Asquelanac co'o alhnancoc lhamacjo caselhaja— Lhta ntac mocjom jeiano co'o: —Etalhes astacja nac aspaioma, acto jawe ngiapac anquec, nietawec meiascamec lheiap—lhta ntac jeiano. ⁶ Lhta ntac na mocjom jeiano: —Aspenesque asquelanai'a lhamacjo, co'o asto nac alfa cacpota njan omega, ampacjasecja cacpota njan actacja nnelha. Enenlhet aquiemac'o la apiaspoc, anwancoc apiama iemmen acteiapma nalhepop, jengaicamoc aquiennactema nenganiemjaicama, metca aquianmoma. ⁷ Enenlhet apiepjonweiacmo la'a, elhcac jata lhamacjo actemacja actacmanma apcaniemjaicama astacja nac alheianma, atnec jata njan apiapom. ⁸ Coca enenlhet la aquietnema apcai'a, apiasqueiam, aptacnoncoma po'oc, apcaqjema po'oc, apquenmensanweiam alhma, aptema Brujeria (aptema apiolhma), aptacnescasecamoc caselha aquiocja alanemmalhca, cacpota njan apmopuana ania'a, ngcolhec jata aquiantemacjo aquieto pancalhwa aquietnemacja talha aimenec azufre, ngcotnec jata m'a janet apquetsepecjo—lhta ntac nema aliatecama. ⁹ Asuet'o lhta lhema pjapac Enenlhet Neten apqueniem'o apiesecsec 7 lhta apnaicamoc 7 nojaicoc apanco'oc allaneianco actacja nnelha caselha ngcolatsecama ngquec, lhta ptac jeiano: —Elheng, atesquesec jata apoccanma Nepquesec Apquetcoc cacpota etnec aptawa' m'a—lhta ptac jeiano ¹⁰ Ngwet'a lhta ejaqtec aniem'o Engiapom Neten Apualhoc jetasquescama, jeiantemacjo Enenlhet Neten lhienep apjaiam aquiawai'a, netne canquec, etescasque lhta apiau'acja temma apocquennammap Jerusalen, apquempa'a lhta m'a apuaiwenta napaqtec Engiapom neten, cuacjo nalhepop. ¹¹ Apcaponmatque lhta na temma aniem'o Engiapom neten, malha lhta ctonac metaimong actec altacmanma ngcoie acuesai'a nac diamante, malha lhta ctonac ieiam appoc nengwetai'o nac taiep. ^{12 13} Apietne lhta apjalhtemommap netne cancoie' napocjawac ma'a, nietne lhta njan 12 atno'oc, tres alhta aquiet'o tep acnem, tres na aquiet'o nelhqueija', tres na aquiet'o ieiam, tres na aquiet'o actalhnenwanlha cnem, 12 njan Enenlhet Neten apquellanecama m'a. Nnangque lhta njan alelcasemmalhca moclhem'a atno'oc apqueluesai'a apqueluescaie lhta12 apquennemolhema Israel. ¹⁴ Aujoc alhtoca 12 metaimong aliawai'a alanemmalhca m'a, nnangque lhta apqueluesai'a acnactalhesammalhca 12 apostoles apanco'oc alhta Nepquesec Apquetcoc. ¹⁵ Asuet'o mocjom Enenlhet Neten alhta apsawenca iamet alietquesammalhca ancoc, alienmomo ngcoie', apmac'a lhta elietquesec temma, atno'oc cacpota njan acjalhtemommalhca nepiawa'. ¹⁶ Netamen apquelietqueso lhta temma, acnemo mo'oc alietquesammalhca acuenactema, acpaijema njan, 2.220 km lhta. ¹⁷ Netamen apquelietqueso lhta njan acjalhtemommalhca, 65 metros lhta acmaicamoc neten, apquelietquesaicamoc apancawe nac enenlhet lhmanquec jam. ¹⁸ Allanemmalhca lhtoca acjalhtemommalhca ancoc malha metaimong altacmanma acuesai'a diamante, cacpota njan temma alanemmalhca alienmoma ngcoie oro, malha ieiam appoc nengwetangweiacmo nac tep. ¹⁹ Cacpota njan aujoc lhec mateaimong aliawai'a malha annatanma lhamacjo actemacja metaimong actec altacmanma ngcoie', coca primera metaimong aliawai'a nietne lhta annatanma diamante, segunda coca zafiro annatanma, coca tercera agata annatanma, coca cuarta esmeralda annatanma, ²⁰ coca quinta onice annatanma, coca sexta rubi annatanma, coca septima crisolito annatanma, coca octava berilo annatanma, coca novena topacio annatanma, coca decima crisoprasa annatanma, coca undecima jacinto annatanma, coca duodecima amatista annatanma. ²¹ 12 atno'oc alhtoca alanemmalhca perla, moclhem'a alanemmalhca lhtoca lhema perla. Coca amai apualhoc temma alanemmalhca alienmoma oro, malha acto nac ieiam appoc nengwetangweiacmo taiep. ²² Ma lhtoca ata'ac pa'at acpocquenammalhca m'a, ncanec apnec Engiapom Neten acnema apmopuana apanque', apnec na nepquesec Apquetcoc ma'a ²³ Coca na temma nac ma'a ma lhta ngcaimelhcac acnem cacpota njan pelten alaponmatema la'a, Engiapom Neten coca apto apcaponmatema m'a, Nepquesec Aquetcoc apto njan apcaponmatema m'a. ²⁴ Lhamacjo apquellawacja ta elaponmetec aniem'o apcaponmatema m'a temma nac, lhamacjo apqueluescaie nema apquelletsecama ellanconwacjac jata apquelletsecama m'a. ²⁵ Mamma ta etnec pelhasep ma'a, lhamacjo acnem jata ngcotnec anmaijema atno'oc ma'a. ²⁶ Lhamacjo apquellawacja ta elletsacjesec apquelletsecama, apquelientalhnemo njan ma'a na temma nac, ²⁷ mangcoclhec jata ngcolatsecama na temma nac, mamma ta njan enenlhet elanac ngcolatsecama m'a, jentewascama la'a, nenmopuana ania'a, wanlha ta eclhec enenlhet ma'a aquietno la apuesai'a waccajac aquiennactema ennengiec, waccajac apancoc Nepquesec Apquetcoc.