¹ Asuet'o mocjom Enenlhet Neten apuaiwantamo nalhepop, apsantanie lhta actec malhec conne canquec anmaiancolha enjangoc cacpota njan aliawai'a ngquec cadena. ^{2 3} Apatjetque lhta menasma aquiawai'a lhta acuaneiam acuesai'a queliacjameioc, mo'oc nema ltema Satanas, apquelpelhqueto njan cadena aliawai'a, apiengiewo njan malhec conne canquec anmaiancolha enjangoc, ca apcapacjo njan atong actec acuaiacmo ta 1000 años cacpota mangcoliennencasama enenlhet'awoc lhmanquec jam. Netamen jato ca m'a ngcolhec jata acpaqnemacjo mocjom ma'a, aquiacuatacjo nquec coca. ⁴ Asuet'o lhta mocjom apqueluescai'e apqueltanema neten, apcacjanque lhta m'a enenlhet apquellelto apquetlhewai'a apquelientalhnema cacpota eliecpelcoc enenlhet apqueliamolhma, nlho ca la meliamolhma lhmanquec jam. Asuet'o njan apiempeioc ma'a nema aliaqtemanma lhta apiaspoc aniem'o mota apquelpaiescama ania'a aplhenammap Jesus cacpota njan Engiapom Neten, ma lhta njan eltacnescaseiancoc caselha newjac alhta acloma cacpota njan nema aquietquescamo aquiocja nque' alanemmalhca m'a, melleltemo lhta njan ngcolhec apnaqtalheso acuesai'a alpaijacja napaqta'ac, apmeio'oc najan necsa lhta apquellaniemjaicama tacjalhet lhepop. Asuet'o njan aptancocjo malha apjalhnanco'oc enenlhet'awoc anac, apmaniaie pancoie melhno lhta m'a aplhamacja apqueletsepma, aptancocje lhta njan apqueluescai'e m'a lheme Cristo acuaiacmo ta 1.000 años ma'a. Coca na pocja apquelaimommap apqueletsepma alhaiec jata etnancocjac apjalhnanco'oc, jatoca acuacmo ta m'a 1.000 años. ⁵ Lhtoka napokha lhta m'a apkeletsepma, alhaiek hato ka enaklhatekhangvomok ma'a akvakmo ta m'a 1.000 anio. Koka akvesai'a amanie nennaqlhatekhangveiam ma'a. ⁶ ¡Aktaqmelakho nkek apkellelto apnaklhatekhangveiakmo apmaniaie! Apkelpokkenammap asongkek ma'a, mellengankek hata mokhom hanet aktaiekho nengetsepma m'a. Etnangkok hata sacerdotes Eniapom Neten apankok kakpota nhan Cristo, etnangkok hata lhemek apkelveskai'e akvakmo 1.000 anio. ⁷ Jata aquieco ta 1.000 años anac, ngcolhec jata acleccaso cadena actetemmalhca Satanas aquiet'o m'a anmaiancolha enjangoc, ⁸ ngcotiepoc jata, ngcoliennengcasama ta enenlhet'awoc aquiet'o Gog ca njan Magog lhma nquec jam, ngcangquesecjac jata quempocjacme cacpota ennapacpoc ma'a, apentalhnema apanquec jata quempocjacme, manmopuana angelietsetec, malha ette' lhepop actec anac. ⁹ Epaijecjac jata quempocjacme lhmanquec jam, eljalhiencamoc jata apcacjaiancolha Engiapom Neten apquennemolhema, cacpota njan na temma apcamelaianlha, coca neten jata ngconiemac talha tacjalhet'oc qempocjacme nac, enmetec jata aplhamacjo panquec ma'a. ¹⁰ Netamen queliacjamei'o acto lhquec aliennencasecama ngcoiengiolhcac jata aquieto pangcalhwa aquietnemacja talha aimenec azufre, aquiengiommalhquelha lhta njan caselha newjac acloma m'a cacpota njan secama ania'a apmopuana ania'a. Ngcolpelhiennemoc jata m'a lhamacjo acnem, pelhasep najan mangcotnengwaianlha nnelha. ¹¹ Netamen asuet'o njan apuesque aptanema acmopai'a nque', lhema enenlhet apnema neten ma'a, mpelapcasque lhta acmasco nalhepop cacpota njan neten napaqtec ma'a, mmasque lhta nellwet'o m'a. ¹² Asuet'o lhta njan apqueletsepma, apqueliau'o, apquetqueietse' apquelanwacje lhta naqtec apuesque aptanema, netamen acno acmaiesacjo lhema waccajac, netamen na mo'oc waccajac aquiennactema ennengiec. Nne lhta alietsato waccajac cacpota ngcolhec aliecpelcoc apqueltemacja apqueliamolhma, meliamolhma. ¹³ Nlaclacje lhta aluata aquiau'acja apquellelto apqueletsepma au'alhoc napaqtec apto apnema neten aptanema, apquellelto lhta njan apqueletsepma m'a conne anmaiancolha enjangoc, nlaclacje lhta njan napaqtec ma'a, nne lhta aliecpelcoc aplhamacjo apqueltemacja m'a apqueliamolhma, meliamolhma. ^{14 15} Netamen awesque nengetsepma ngiengiolhque lhta aquieto pancalhwa talha aimenec azufre, apquelhacpe lhta njan apquellelto mangcolhnaicamoc la apqueluesai'a waccajac aquiennactema ennengiec, coca m'a acto janet nengetsepecjo.