Capítulo 10
Enenlhet neten waccajac atcoc apmaicama apmec
1
2
Asuet'a lhta lhema enenlhet neten apuenactema apiawai'a, acnema njan apmopuana, apuaiwantamo aquieplomo aisecsec iepjopai'a, apquenenwactanie lhta ngque'e tacjalhet lhepop, lhema apmenec aquiennacja apteiocme lhta tacjalhet aluata aquiau'acja, mo'oc apmenec apasancaluelha lhtoca apteiocmoc tacjalhet lhepop. Nietne lhta malha mpemjet aquieto apietsecsec, aponmatema ngque lhta napa'at malha acnem alhta, malha lhta acto nac poste la apquenmeta acmasenwaiam la apquemjama apio'oc, apsecama lhtoca apmec lhema waccajac atcoc acmaijema.
3
Aquiennactema nque lhta malha apielhaiwoma m'a enenlhet neten, malha acto nac quemjawa'. Netamen ma'a allatemmonca lhta njan 7 apquelelhtengioma aquiennactema nque.
4
Ewanque lhta niecje atalhacsec ma'a actacja lhta aslengai'a apquelelhtengioiam, coca lhta ntac nema aliatecama jeiano m'a neten:
—Metalhes anquec actacja aplengai'a 7 apquelelhtengioiam anac, eilhasqueso toca—lhta ntac jeiano nema aliatecama
5
Netamen apquenencasacjo lhta aquiennacja apmec enenlhet neten apquemjama lhquec aluata aquiau'acja cacpota njan tacjalhet lhepop,
6
7
lhta aptac jeiano:
—Colhua mangcomac'ac elailhec Engiapom Neten cacpota engiapacsec aquientalhnema jengque'e, aptacmelquescanque lhta niecje caselha nac aquielhammalhca, apquetlheianmo lhta niecje apquetsecama ania'a apancoc engiapacsec alhaiec ma'a, quetsec na ngcaimelhcac epaiwasecjac mocjom trompeta septimo enenlhet neten, netamen jata ngcowac aquientalhnema m'a, jawe ngiapac anquec astacja nac alheianma co'o, Engiapom Neten jetasquescama, apto mangcotnengwaianlha nnelha apcaniemjaicama, apto njan apquelentepquescama lhamacjo caselha lhmangquec jam—lhta ptac jeiano enenlhet neten
8
Coca nema aliatecama lhquec aniem'o lhta njan neten, lhta ntac jeiano mocjom:
—Eniacja apquenmancolha nac enenlhet neten apuenactema apiawai'a apquenmanca nac ma'a tacjalhet aluata aquiau'acja cacpota njan tacjalhet lhepop, ewom waccajac atcoc anac acmaijema', apmec anac ma'a—lhta ntac jeiano nema aliatecama m'a.
9
Ca asmanco lhta m'a asquenmalhnenwacmo enenlhet neten waccajac atcoc anac, lhta aptac jeiano m'a: —Ema', etau, jata aptawo ta ngcatsec jata apatong, malha ta ngcotne ctonac ietaieujene' la apiemmenec, coca acuacmo ta apuacmo ngcascoc jata m'a—lhta ptac enenlhet neten
10
Ca asmo lhta waccajac atcoc ma'a, ca stawo m'a. Jawe na ngiapac ntac ma'a, atse lhta ntac ejetong, coca ewacmo ngcasque lhta.
11
Netamen alhta, nna cto jeiano mocjom:
—Elheng jata lhmangquec jam, lhamacjo apquellawacja la'a, epaies ania'a apmac'acja etnec Engiapom neten napaqtawec enenlhet'awoc alpalhcammalhca la apquelpaqmeiasma, cacpota njan napaqtawec apqueluescai'e— lhta ntac jeiano nema aliatecama.