Capítulo 17
Nema aclhenencasecja apiempec Jesús
1
Nwacme lhta 6 acnem aquiecai'a aplheianma lhta Jesus cacpota ematong ma'a, ca apmeiecjo lhta neten lhienep acjaiam netnec ancoie', wanlha lhta apquenmac'o etnancoc apquetlhelhma'ac
Pedro, Santiago, cacpota njan apialheng Juan.
2
Ca aclhenmecjo lhnac apiempec napaqtawec ma'a, nquelienmecjec nac napa'at malha lhna ntemac acnem, cacpota njan aptalhnema apquelienmomo lhnac aptaiecjac, malha apcaponmatema lhna ntemac ma'a.
3
Mpelapquescanquec nac alenteiapuei'o m'a apiempeioc secama ania'a Moises annenga cacpota njan Elias, apquelpacmetquescaiacmec nac Jesus ma'a.
4
Coca lhna aptemac Pedro apcanemo Jesus:
—Apuesque, ntase nac nengeluo'o nque'e, apquelto la'a lheiap allanac janetolhem'a pa'at jenque'e, lhema lheiap, lhema njan Moises, cacpota njan Elias—lhna aptemac Pedro.
5
Necsa apqueliatecama lhnac Pedro m'a, apuetai'o lhnac iepjopai'a alienmomo acuaiwentamo tacjaplhet'oc ma'a, ca acpelapquescamo lhnac apquellengai'a nema aliatecama aisecsec iepjopai'a, lhna ntemac:
—Coca jenca eietca awanjec ascamelaiam, apaiesacje mota ewalhoc. ¡Ellailho ta motaja! —lhna ntemac nema aliatecama.
6
Awanjec anquec na ntemac apquellai'a m'a apqueltamesaicamoc aniem'o nema aliatecama apquellengai'a, ca apquellelpolentamo lhnac nalhepop acuacjo apquelteclhenco napaqta'a lhepop, man nac na ncomajai'ac ellammelhoc ma'a.
7
Ca apqueltetesquectamo lhnac Jesus ma'a, lhna ptemac apquellanemo:
—Elaqnecja neten, mellaga —lhna aptemac Jesus apquellanemo m'a.
8
Apquelaqnecjec nac neten ma'a, apqueluetai'o lhnac aptaiecjo aplhepquennenga Jesus
9
Necsa apquellentepecja lhnac ma'a neten lhienep acjaiam, lhna aptemac apquellanemo Jesus:
—Metlhenama nquec actacja nac apqueluetai'a acuacmo ta acno actemesquesacjo mocjom apjalhnancoc apiesecsec apquenmasquenwaiacmo m'a Enenlhet Apquetca nac— lhna aptemac
10
Ca apquelelmalhneianca lhnac apqueltamesaicamoc, lhna aptaiancoc:
—¿Selha actemo apquetlheianmo nac jengetlhecmoscama jenganemacja Moises ewatac jata apmanie Elias annenga, je? —lhna aptaiancoc ma'a.
11
Coca lhna aptemac Jesus apquellatemmoianca: —Jawe ngiapac ma'a apquetlheianmo nac ewac apmanie Elias annenga, epenacsec jata lhamacjo caselha m'a.
12
Coca apuai'ac ma'a Elias, meliecpelquemac Fariseos ma'a, melleltacmelquescamac najan. Jata etnancoc na ellanjoc Enenlhet Apquetca nac ma'a— lhna aptemac Jesus apquellanemo m'a.
13
Apquelianwecjec nac apqueltamesaicamoc ma'a aplheianmo lhnac Jesus Elias, Juan apquellauquescama iemmen na ngiapom noca niecje aplheianmac ma'a.
Aptacmelcasecja Jesus lhema nematca acmaicama queliacjameio'
14
Apqueluacje lhta m'a aquietelha apcacjanquelha enenlhet'awoc ma'a, ca aptetesco'o lhta lhema enenlhet apuactanlha Jesus ma'a, apquelteclhecuo'o lhta aptapno'oc napaqtec ma'a, lhta aptac:
15
—¡Apuesque, eietno napa'at eietca, epasem! Awanje mota apquetsepaicama, awanjec aplengaianco njan, ca actacjo la jeng natelh eitec, cacpota njan nemmen.
16
Asquelioscactec lhec niecjec apqueltamesaicmoc anac, malhque ncollapuanca'ac eltaqmelcasecja' —lhta aptac ma'a.
17
Coca lhta aptac Jesus:
—!Meliamolhma quetlhencap, apqueliascacmec Engiapom Neten!¡Jeiastenganquec niecje quetlhencap!
¡Nwa', elaqlanta no nematca nac jalep! —lhta ptac Jesus.
18
Ca apqueliantemantamo lhta nematca lhta m'a, apiamenanca lhta njan Jesus queliacjameio m'a, actepo njan apualhoc alhta m'a, colhuawec anque lhta njan aptacmelacjac ma'a.
19
Netamen alhta m'a apnacjo lhta aplhepquennenga Jesus cacpota apqueltamesaicamoc, ca apquellelmalhnenca lhta, lhta aptancoc:
—¿Se lha ntac mangellapuanco nac ennenco'o angelentepquesec queliacjameio lhquec, je?—lhta aptancoc ma'a.
20
21
Ca apquellatemmonca lhta Jesus ma'a, lhta aptac:
—Quetse sonquec apqueliasqueiam quetlhencap, colhtema nac aquietnema la jawe ngiapac anquec atquetsec meliasqueiam, malha acto nac mostaza actec
, apuanca'ac ellanancoc lhamacjo caselha, jata njan etnancoc ellanac lhienep acjaiam anac ja'e:
"Coietnem mo'oc aquietnemacja" Ncoliejecjoc jata m'a.
Jesus aplhenecjo mocjom ematong jata
22
Necsa apquetlhengama lhta m'a Jesus cacpota njan apqueltamesaicamoc apquenmeiacjo lhta aquieto iojalhma Galilea, lhta aptac Jesus apquellano:
—Ncolhec jata anconwacmo Enenlhet Apquetca nac apquellelto apquellammelhmacja,
23
ematong jata m'a, janet'olhem'a acnem jato ca ncotnec apquetsepma etnecjac mocjom apjalhnancoc apiesecsec apquenmasquenwaiacmo—lhta aptac apquellano m'a.
Aiosac'ac anque lhta ntancoc apualho'oc apqueltamesaicamoc ma'a.
Apianmonquescama Jesus impuesto ancoc Engiapom Neten apnemacja
24
Apuacje lhta Jesus cacpota njan apqueltamesaicamoc apiau'acja temma Cafarnaum, ca apqueltetesco lhta apquellelto apquenmaicamoc pataccom impuesto ancoc Engiapom Neten apnemacja Pedro m'a, lhta aptancoc:
— ¿Apianmonquescanque nlho apquetlhecmoscama apanco'oc anac quetlhencap impuesto ancoc pataccom Engiapom Neten apnemacja nac, je?— lhta aptancoc
25
—Jai' —lhta ptac Pedro apcatemmonca.
Netamen ma'a aptalhnenwacjo lhta Pedro au'alhoc pa'at, amanie lhta apmajai'a eltennasama ania'a Jesus actemacja impuesto, lhta aptac na Jesus apmanie m'a:
—Simon, co la aptaiancolha apqueliau'acja apqueluescaie apquenmaianco impuesto ancoc lhmanquec jam. ¿Apquennemolhema apanque nlho ca la apqueljatsoscasecjac pataccom apancoc ma'a, nlho ca la po'oc enenlhet?— lhta aptac.
26
Ca apcatemmonca lhta Pedro m'a, lhta aptac: —Po'oc enenlhet ma'a—lhta aptac Coca lhta ptac mocjom Jesus:
—Nietawec aptacja nac lheiap, aptanco la apquennemolhema apancawec ma'a mancollapuanquec elianmonquesec pataccom impuesto ancoc.
27
Coca ntasec engiacja panquec lheiap ma'a ei'anmonquescacja apanque impuesto ancoc cacpota manconnatjacsec ma'a, engiacja ta secjec ma'a aquieto aluata cacpota engianconwacjac actoma quelasma m'a, amanie apleclema ta quelasma, emaies jata atong cacpota elcoc lhema patacom aquiaquiema, netamen engiacjac ma'a ei'anmonquescacjac impuesto apancoc cacpota njan co'o—lhta aptac Jesus ma'a.