Capítulo 15

Caselha acto acpaisenquescama enwalhoc
1 Netamen ma'a apqueluo'o lhta moclhem'a fariseos cacpota njan jengetlhecmoscama jenganemacja Moises apquelleniem'o lhta m'a Jerusalen, lhta aptancoc apquellano Jesus: 2 —Nelieijengca nietnenquec apqueltemacja amanie' apquenmajai'a etawocja' apqueliengieseianquec apmeio'oc 1 ¿Se lha ntac apqueltamesaicamoc anac lheiap metnanco nac que, je?—lhta aptancoc ma'a 3 Coca lhta aptac Jesus apquellano: — Quetlhencap na melleliejecjo jenganemacja Engiapom Neten, wanlha apquelieplecjo jenganemacja apanco'oc apancawe'. 4 Lhnac nanec na aptemac Engiapom Neten jenque'e: «Ellajo ta ncana'ac 2 »; « Coca apnaqtewaso la aluesai'a ncana'ac, ematong jata 3 » lhnac nanec ptemac. 5 Coca apquetlhecmoseianque mota quetlhencap enenlhet apuanca'ac etnancoc ellanac ncana'ac jenque'e: "Momac'ac apasmoc lheiap tata, meme, ncanec asquelpocquencasquec caselha ejenco'oc cacpota anwancoc jata Engiapom Neten" 6 Ca aptanco mota quetlhencap apto la enenlhet apaioma m'a, mancaimommalhca elpasmoc ncana'ac. Coca melietemoc ma'a, jenganemacja apanco'oc apancawec quetlhencap ma'a, coneng apqueltemescasecjac jenganemacja apancoc Engiapom Neten. 7 ¡Janet napaqta'a quetlhencap! Jawe ngiapac anque apquetlheianmo lhnac nanec Isaias annenga quetlhencap, lhnac nanec aptemac: 8 «Apqueltaicama apanquec quetlhencap jelleliejecjo, moc apatno'oc coca, taiepe coca aquietnacja apualho'oc, 9 acjemo jellai'o quetlhencap ncanec apquelieplaucasquec apquetlhecmosecamoc apanco'oc apancawec ma'a» lhnac na nec aptemac. 10 Netamen apquellawenca lhta Jesus enenlhet'awoc ma'a, lhta aptac apquellano: —Eltacmelcaso no apquellailhemo cacpota eliamwomjo, 11 acto la alentalhnema apatong enenlhet jawe acpaisenquescama apualhoc ma'a napaqtec Engiapom Neten, coca m'a, acto acpaisenquescama apualhoc apaioma ncolatsecama allenteiapma apatong —lhta aptac Jesus. 12 Ca apqueltetescactamo lhta apqueltamesaicamoc apnacja Jesus, lhta aptancoc apquellano: —Manlhe ncollecoc apualho'oc fariseos aplheno lhquec lheiap —lhta aptancoc ma'a. 13 Coca lhta aptac Jesus apquellatemmonca m'a: —Ncolhec jata apto lhamacjo anammalhca ncotno apcanma Tata apno m'a neten. 14 Mellailho nquec ma'a, malha la m'a metca apaqto'oc la apmajai'a eiantemoc po'oc metca apaqto'oc lhemec, coca epallemmoc jata lheme conne malhec ma'a—lhta aptac Jesus. 15 Coca lhta aptac Pedro apcano Jesus: —Mongeliojoc ennenco'o aptacja nac jengetlhecmoscama lheiap, jengelpeiwescasecjo nojo' —lhta aptac 16 Ca apcatemmonca lhta Jesus ma'a, lhta aptac: —¡Quetlhencap anac na meliojoc mocjom! 17 Ca aptawacjo la enenlhet metca apqueliengiescama apmeioc, mancopaisenquesec apualhoc napaqtec Engiapom Neten, ncanec actalhnema nac apatong aptoma enenlhet, cacpota ncowomoc apuacmo', cacpota eiaqnec ma'a. 18 Coca acto acpaisenquescama apualho'oc enenlhet lhamacjo caselha allenteiapma m'a, ca ctonac ncollatsecama 19 alquetansema apualhoc, apcaqjema po'oc, aptewascama aptawa, apquelanactema, apmenielhma, apmopuana ania'a, apiamenwaiam po'oc. 20 Ca lhamacjo caselha nac acto jawe ngiapac anque acpaisenquescama apualhoc enenlhet napaqtec Engiapom neten ma'a—lhta aptac Jesus.
Nqueluana mancotno judia mancoi'asqueiam Jesus
21 Apmeiacje lhta Jesus iocjalhma Tiro ca njan Sidon, 22 necsa aplhengama lhta m'a acuet'o lhta lhema nqueluana co Canaan, necsa aclheiam alhta nwenacmo, actetescacmo aplhengacja Jesus ma'a, lhta ntac: —¡Apuesque, David aptawen neptamen, jepasem nojo eietno neja'at, awanjec anquec actewascama queliacjameio' eietca nqueluana!—lhta ntac ano m'a. 23 Ma lhta engiatemmoma Jesus ma'a, apqueltetescactanie lhta njan apqueltamesaicamoc, lhta aptancoc: —Engiapes nqueluana nac, nwenacmec nentamen anac ennenco'o —lhta aptancoc ma'a. 24 Lhta aptac apcano Jesus nqueluana: — Nema jeiapascama co'o alpasmoc apquellelto nac israelitas malha nepquesec apquetlheneiam aptaiancoc ma'a—lhta aptac. 25 Nqueltanante lhta atapno'oc nalhepop napaqtec Jesus nqueluana m'a, lhta ntac ano: —¡Apuesque, jepasem nojo!—lhta ntac. 26 Coca lhta aptac Jesus apcano: —Mancolatsema angennactencasocjac ennenco'o aptecamoc enquetcac cacpota angellanconwomoc ma'a semjeng 4 —lhta aptac ma'a 27 Coca lhta ntac mocjom nqueluana m'a: — Apuesque, jawe ngiapac aptacja nac lheiap, coca ntawenquec na semjeng acpalleiam la necja tcoc aptoma la otep—lhta ntac ano m'a. 28 —¡Jai, jawe ngiapac! Awanje nac mancoiasqueiam lheia', ncotnec jata actengianca nac—lhta aptac Jesus. Colhuawec anquec nac ntacmelecjac atca m'a.
Apqueltacmelquescaiam Jesus apentalhnema anmasca apiempeioc
29 Apmeiacje lhta Jesus neiawa sanga Galilea, apcanetuacjo lhta lhienep acjaiam, apnacme lhta njan ma'a. 30 Ma lhta ntec na enenlhet apcanwai'a apnacja m'a, apquelletsocme lhta njan anmasca apiempeioc ma'a, apqueliacteicamaja, metca apaqto'oc, ncollatsecama apio'oc, metca apaioma, cacpota njan moc actema anmasca apiempeioc. Apqueltacmelquescacme lhtoca Jesus ma'a. 31 Apquellelto lhta metca apaioma, apquelpaqmetacje lhta. Apqueljalhema, apquelpeiwacje lhta njan ma'a. Apqueliaqteicama, nqueltacmelacje lhta apquetlhengama. Metca apaqto'oc, apqueluetacje lhta lhma m'a. Nqueliemasque lhta apualho'oc enenlhet'awoc apqueluet'o m'a, apqueltacnescasenque lhta Engiapom Neten apanco'oc co israelitas.
Jesus apquellaicamoc aptecamoc apentalhnema enenlhet'awoc
32 Apquellawenca lhta Jesus apqueltamesaicamoc ma'a, lhta aptac apquellano: —Asquelietnawe nac co'o napaqta'a lhamacjo enenlhet anac, nwacmec janetolhem'a acnem jelieplecamaja, mamma aptecamoc ma'. Moltoc eltaqjecja' metca aptaweicocja', meliennec quelha apquetlhengama amai —lhta aptac. 33 Coca lhta aptancoc apqueltamesaicamoc apquellatemmonca m'a: —Mamma temma jenque'e ¿Co la angeluetanwomoc aptecamoc lhamacjo nac, je?—lhta aptancoc ma'a 34 Ca apquelelmalhnenca lhta njan Jesus, lhta aptac: —¿Se lha pan apnanco quetlhencap que, je? — Siete, cacpota njan janet anquec quelasma—lhta aptancoc. 35 Ca apquelto lhta Jesus eniacjancoc nalhepop enenlhet'awoc ma'a, 36 apquenmo lhta siete pan cacpota njan quelasma, apte lhta njan gracias Engiapom Neten ma'a. Netamen apqueliaqto lhta njan pan cacpota njan quelasma, apquellanco lhta njan apqueltamesaicamoc, ca apquennasquenco lhta njan ma'a. 37 Aptawenque lhta aplhamacjo enenlhet'awoc ma'a acuacmo apqueliaqcanacmo lhta. Siete iama posac aliawai'a alhta ntepac alaimommalhca aptecamoc ma'a. 38 4000 alhta enenlhet apquellennawa'ac apuacmoc aptecamoc ma'a, tep anque lhta ntac aquiepetcacjo nqueluana'ac cacpota njan nematcac. 39 Ca apto lhta Jesus acpaiwesquecja apquellanei'o enenlhet'awoc ma'a, apcanetuacjo lhta loma nemmen, apmeiacjo lhta iocjalhma Magadan.

1Poner nota al pie explicando
2Exodo 20: 12 ; Deuteronomio 5:16
3Exodo 21:17 ; Levitico 20:9
4Los judios llamaban perros a los no judios.