Capítulo 14
Apquetsepma' Juan apquellauquescama iemmen na ngiapom
1
Aplengai'o lhnac ania'a apiau'acja apuesque Galilea apuesai'a Herodes aplhenammap Jesus,
2
coca lhnac aptemac apquellanemo apquellasennaicama:
—Juan apquellauquescama iemmen na angiapom ma'a, aptacjec apjalhnancoc apiesecsec apquenmasquenwaiacmo m'a, ca ncanec ncolhec apmopuana' elanac caselha jempelapquescama— lhna aptemac Herodes.
3
Herodes nac na apqueltemo ncolhec acpatjeto Juan cacpota ncolhec aclhencaso nengaclhencasemmalhquelha m'a, ca ncanec Juan apiamenaianca lhnac Herodes apmecjo apialheng aptawa' apuesai'a Filipo, Herodias nac acuesai'a nqueluana.
4
Lhna aptemac Juan apcanemo Herodes:
—Mancolatsema nque apmecjo lheiap aptawa apialheng apanque'—lhna aptemac
5
Apmajai'awec nac engiaqjec niecje Herodes Juan ma'a, enenlhet noca apquellai'ac ma'a, ncanec apquelliamawec enenlhet Juan apto secama ania'a.
6
Nwaiacmec nac acnem iantelhcapa apancoc Herodes, ca apquelanei'o lhnac actacmelaicama lhma apancoc, ca alanacuai'o lhnac Herodias atca
m'a, nquelancai'ac nac napaqtawec apquelpasenwaiam taqmelaicama lhma'. Awanjec anquec nac acleccasecama apualhoc Herodes apuetai'o m'a,
7
ca apqueltemo lhnac nconmalhnama acmac'acja la'a cacpota engiancoc jawe ngiapac anquec metca apiennenquescama m'a.
8
Juan apqatec nac nquelmalhnecama m'a, apjac au'alhoc nac nemac acpeccanmo m'a, ncanec anquen nac altema m'a.
9
Aiosec na ntemac apualhoc apiau'acja apuesque Herodes ma'a aplengai'o anmalhneianca nqueluana, coca apenescanquec nac apaioma napaqtawec apquellelto apquelpasenwaiam ntacmelaicama lhma cacpota engiancoc altema lhnac ma'a.
10
Ca apquellapascamo lhnac apquellennencasecama enmeiacjac nengaqlhencasemmalhquelha' cacpota eliaqtemanuacjac apiaspoc Juan ma'a.
11
Ca apqueliaqtemanmo lhnac apiaspoc ma'a, apquelpeccanmo lhnac lhema apjac aquiawai'a Juan apqatec, apquelletsacjescamo lhnac na nqueluana tcoc ma'a cacpota ncanconwacjac anquen.
12
Netamen apqueluaiacmo lhnac Juan apquelieplecama ma'a cacpota eluacjac apjapac, apquelcatonnemo lhnac na m'a. Ca apquenmeiecjo lhnac na apquelleltennasquecjo ania'a Jesus actacja apqueluetai'a m'a.
Apquellaicamoc Jesus aptecamoc apentalhnema enenlhet'awoc
13
Necsa aplengai'a lhta Jesus ania'a apquetsepma Juan apquellauquescama iemmen na ngiapom, apmeiacjo lhta apcanetuecja loma nemmen, nlheianmec quelha apualhoc engiacjac aplhepquennenga metquelha la aquiennoma lhma'. Apquelueta' lhta njan enenlhet'awoc ma'a, ca apquelietnenwacjo lhta apmanie' apmeiacjelha m'a.
14
Ca apteiapuacmo lhta loma nemmen Jesus m'a, apuet'o lhta enenlhet apentalhnema, apquelietnawe lhta napaqta'a m'a, apqueltacmelquescacme lhta njan aplhamacjo anmasca apiempeioc apquelletsoiam ma'a.
15
Apquelienactesema lhta lhma m'a, apqueltetescactamo lhta njan apqueltamesaicamoc ma'a, lhta aptancoc apquellano:
—Eleltennasamoc enenlhet anac enmeiacja ta elemjama temma cacpota enmancoc aptecamoc, ienactesque', mamma temma jenque'e—lhta aptancoc ma'a
16
Ca apquellatemmonca lhta Jesus ma'a, lhta aptac:
—Mancaimelhcac eltaqjecjac enenlhet anac, ellamoc aptecamoc quetlhencap—lhta aptac.
17
—Ma', quetsec nentoma nac, wanlha apietno 5 pan, cacpota njan janet quelasma mmocjectec —lhta aptancoc ma'a
18
—Jai, etsanta no jenque'e —lhta aptac Jesus ma'a.
19
Ca apquelto lhta eniacjancoc tacjalhet pa'at alielsellemo, apmo lhta njan 5 panes cacpota njan janet quelasma, ca apcammelho lhta njan neten ma'a, gracias alhta aptac Engiapom Neten. Ca apqueliapto lhta pan ma'a, apquellanco njan apqueltamesaicamoc cacpota ellancoc enenlhet'awoc ma'a.
20
Aptawenque lhta acuacmo apqueliaqcanacmo m'a, 12 iama posac alhta nwacmoc apqueliacjecja alaimommalhca m'a.
21
5000 alhta enenlhet apquellennawa'ac apuacmoc aptecamoc ma'a, tep anque lhta ntac aquiepetcacjo nqueluana'ac, cacpota njan nematcac ma'a.
Aplhengama tacjalhet iemmen Jesus
22
Lhta aptac apquellano Jesus apqueltamesaicamoc:
—Elcanetuacja loma nemmen anac, jata enmeiacjac mo'oc necja nac sanga. Co'o toca alhnecja jenque'e asqueltawec atnec acpaiwesquecja asquellanei'o enenlhet'awoc anac, altanienwacjac jata m'a—lhta aptac apquellano m'a
23
Apenescanquec nac aptema acpaiwesquecja apquellanei'o enenlhet'awoc Jesus ma'a, ca apcanetuecjo lhnac aplhepquennenga neten acjaiam lhienep cacpota epacmetquesec Engiapom Neten ma'a, acuacjo pelhasep lhta ntac apnema m'a.
24
Coca nwenquepque lhta mocje anquec loma nemmen aisecsec anquec sanga, ncammelhque lhta njan alhcaiam ma'a cacpota njan iemmen alacjaiam acpallueiam aquiennactema m'a
25
Nquetsac'a lhta m'a, ca aplhecmo lhta tacjalhet iemmen Jesus ma'a, aptetescactamo lhta loma nemmen.
26
Awanjec anque lhta apquellai'a apqueltamesaicamoc apqueluet'o aplhecmo tacjalhet iemmen, nquelpaijema lhta apatno'oc ma'a, lhta aptancoc:
—¡Enjangoc, enjangoc ja'e!—
27
— ¡Jawe', co'o jenque'e, manjellaga!—lhta aptac Jesus.
28
Ca apqueliatenca lhta Pedro m'a, lhta aptac:
— Apuesque, apto la jawe ngiapac lheiap ma'a, eniana no njan alhong tacjalhet iemmen anac, cacpota awomoc apquenmanquelha nac lheiap —lhta aptac Pedro.
29
—¡Jai', elhenmano jenque'e! —lhta aptac Jesus apcano m'a.
Aptacmelcasawe lhta aptepo Pedro conne loma nemmen ma'a, aplhengo lhta tacjalhet iemmen apmanco lhta apquenmanquelha Jesus ma'a.
30
Ncapelhcasema lhtoca njan apnengiec Pedro alhcaiam aquiennactema m'a, apcac'o njan, ampo'o lhta njan apmajai'a ewaiwancoc Pedro m'a, apuenenca lhta, lhta aptac:
—¡ Apuesque, jewonques no tep!—lhta aptac ma'a
31
Coca colhuawe lhta apmac apmec Jesus Pedro m'a, lhta aptac apcano:
—Aselhte nac aquietnema mei'asqueiam lheiap, apiascacme —lhta aptac Jesus.
32
Ca apquelcananto lhta loma nemmen, acmasco njan alhcaiam aquiennactema.
33
Ca apquellelteclhenco lhta aptapno'oc napaqtec Jesus ma'a, lhta aptancoc:
—¡Jawe na ngiapac lheiap apto Engiapom Neten apquetca! —lhta aptancoc ma'a
Apqueltacmelquescaiam Jesus anmasca apiempeioc na temma Genesaret
34
Apqueljalhtepelhquetque lhta sanga Jesus cacpota njan apqueltamesaicamoc, apquenmeiacjo lhta aquieto na temma Genesaret.
35
Apqueliecpelcawe lhtoca enenlhet'awoc Jesus ma'a, ca apqueletcasenca lhta njan ania'a lhamacjo apquellawacja m'a. Apquelletsocmo lhta njan anmasca apiempeioc apnacja Jesus ma'a,
36
apquelasne lhta njan apquenmaja'ia enmanwomoc na nepua'ac apquetcoc la apcaclammap, necsa apquenmanweiam alhta, apqueltacmaluacmo lhta njan ma'a.