Capítulo 13
Apietquescama Jesus enenlhet apquelhaicama actec apcanma
1
Aptepque lhta Jesus nema acnemacja m'a, apmeiacjo lhta necja sanga, apnacjo lhta njan ma'a.
2
Ma lhta njantec enenlhet apqueluai'a m'a apquenmajai'a ellailhojo', lhta ncanec na engianantec loma nemmen Jesus ma'a, apno njan ma'a conne, apquetlhecmoso lhta ma'a, apquelanwa'a lhta njan enenlhet'awoc ma'a necja sanga.
3
Nlhanie lhta apquetlhecmoscama Jesus actemacja caselha apietquescama, lhta ptac:
— Apquelhaicama lhnac actec lhema enenlhet apcanmo m'a,
4
moc lhem'a actec nac mpallueiacmoc tacjalhet amai, ca aluai'o lhnac anata tco'oc, actaweianco' njan ma'a.
5
Mo'oc actec nac mpallueiacmoc alhiewac'acja lhepop tacjalhet metaimong, colhuawec anquec nac nteiapmac niecje' m'a ncanec aselhtec nac lhepop actec mang nac na ncaptonnec ma'a.
6
Ca acteiapmo lhnac acnem, aliemai'o m'a, aletsepo njan anammalhca ncanec mamma aicapmen'oc.
7
Mo'oc actec nac na mpallueiacmoc ma'a tacjalhet meneuque actec acnaicamoc conne lhepop, ca actengamo lhnac lheme meneuque m'a, nquelapecjec nac anammalhca m'a, aletsepmo njan.
8
Coca mo'oc actec nac na mpallueiacmoc actacmelacja lhepop, ntasec anquec nac actecteiapma' m'a, lhema apuatjetma apactec na nwaiacmoc 100 apactec, po'oc nac na 60 apactec, cacpota njan 30 apactec ma'a.
9
Ellanjo no quetlhencap, ncaimelhquec eltacmelcasoc apquellailhemo asietquescama nac—
10
Ca apqueltetescactamo lhta apqueltamesaicamoc Jesus ma'a, apquelelmalhnenca lhta, lhta aptancoc:
—¿Se lha ntema mota apquetlhecmoscamo apietquescama napaqtawec enenlhet'awoc, je?—lhta aptancoc ma'a.
11
Ca apquellatemmonca lhta Jesus ma'a, lhta aptac:
—Nnec allanco elianwomjoc quetlhencap caselha aquielhammalhca aptemacja Engiapom Neten, coca mamma allaianco m'a enenlhet'awoc anac.
12
Coca aptaqmelcaso la apcailhemo enenlhet asquetlhecmoscama nac, netamen ncolhec jata anco mocjom tep anquec apianweiacmojo, ncoitec jata aquiawai'a nquec apianweiacmo m'a, coca metaqmelcaso la apcailhemo enenlhet, ncolhec jata aljatsosquescactamo atquetsec la apianweiacmo.
13
Ca ncanec atlhecmocse mota asietquescama m'a. Apqueluet'a niecje', coca malha meluet'o, apquelleng'a niecje njan, malha coca melleng'o aptancoc.
14
Nwa'ac acnem aplheianmo lhnac nanec secama ania'a nnenga Isaias:
«Apquellailhawe niecje, moca elliojo'. Apquellammelhama niecje, moca elueta'ac,
15
ncanec nanquec aliaseiancolha lhma apualho'oc, malha apquellapecja la apaico'oc cacpota mellengie', malha njan apquellapecja la apaqto'oc cacpota melluetie'. Meliojo, mang na ellanacjac apualho'oc cacpota alleltacmelquescamoc co'o m'a»
lhnac nanec aptemac.
16
Apquenmapseiwac'a coca quetlhencap ncanec jeluetai'e cacpota njan apqueltacmelcasawec apquellailhemo asquetlhecmoscama nac
.
17
Mantec na apquetsecama ania'a annenga cacpota njan enenlhet apquelpeiwomo apquenmajai'a niecje jelueta', jellailhoc najan, man coca jelluetai'oc ma'a.
Apquelpeiwescasecja Jesus apietquescama enenlhet apquelhaicama' actec apcanma
18
—Eltacmelcaso no apquellailhemo, asqueltawec alpeiwescasecja asietquescama enenlhet apquelhaicama actec lhec.
19
Moclhem'a enenlhet nwa'ac ma'a acnemo m'a actec lhec acpalleiam amai. Apquellailhemo ania'a aptemacja apanquec
Engiapom Neten, nquelentalhnec apualho'oc ma'a, coca melianwacmoc. Colhuawe nwa'ac queliacjameio almenielhcaso ania'a apquellengai'a lhquec.
20
Moclhem'a njan enenlhet nwa'ac acnemo m'a actec lhec acpalleiam alhiewac'acja lhepop tacjalhet metaimong coca coneng ma'a. Apquellailhemo ania'a actacmanma, colhuawec apquenmac tacja m'a, apquelletsewasawec na m'a,
21
aquiacuatacjo coca ncanec mancolienna'ac apquenmama tacja ania'a actacmanma apualho'oc, ca acuo'o aquientalhnema, nema acmenlhenaicama aniem'o apquelieplecama Engiapom Neten, colhuawec anquec apquellenquetac ma'a ania'a lhquec.
22
Moclhem'a enenlhet na nwa'ac acnemo m'a actec lhec acpalleiam tacjalhet meneuque actec acnaicamoc conne lhepop, apquellailhemo ania'a coca mantec aliasecamo lhma alietnaicama apaqtec alaimommalhca caselha apanco'oc ma'a, cacpota njan apquelleltemo ncoitec nquescama pataccom apanco'oc, colhuawec nquellapacjac ania'a actacmanma lhquec apquellengai'a, mellan'ac na caselha actacmanma m'a.
23
Cacpota njan moclhem'a enenlhet nwa'ac acnemo m'a actec lhec acpalleiam tacjalhet actacmelacja lhepop, apquellailhemo ania'a actacmanma, apquellianwacmec na m'a, apqueliengiacjec na apqueltemacja ncollatsecama, ca apquellan'o njan lhamacjo caselha altacmelo m'a, malha m'a apuatjetma lhquec apactec, nwacmec lhec100, 60, cacpota njan 30 apactec—
Jesus apietquescama actemacja trigo cacpota njan iama meneuque
24
Aplhenacje lhta mocjom Jesus mo'oc apietquescama actemacja apmac'acja ta elanac Engiapom Neten aptacjo ta apuesque, lhta aptac Jesus:
—Apquenecjec nac apuesque aniep apancoc apqueltacmanma apactec trigo,
25
ca apteianwecjo lhnac ma'a. Apuai'o lhnac apcammelhmacja m'a, apcanuei'o njan iama meneuque actec apiesecsec trigo apactec lhec apcanma, ca aptaqjecjo lhnac na m'a apcammelhmacja lhquec.
26
Netamen apcactengamo lhnac trigo apquelenteiapmo lhnac na secja apquelenteiapma apuatjet apactec ma'a, ncactengaianquec nac na lhemec iama meneuque m'a.
27
Apqueluetai'o lhnac ma'a apquenmacmecama aniep apquenmacmesaicama, colhuawec anquec nac apquenmeiecjac apnacja apuesque apancoc apto apancoc aniep, lhna aptaiancoc apquellanemo:
"Apuesque, apquenque lhta lheiap altacmanma nquec trigo apactec ¿Selha ntac na actepo nac lhemec iama menueque, je?" lhna aptaiancoc ma'a.
28
Lhna aptemac apquellanemo acto apancoc aniep:
"Ca apcanma m'a jeiammelhmacja nac" lhna aptemac ma'a.
"¿Apuesque, apqueltawe nlho angelaptecjac iama meneuque nac ma'a, je?"
29
"Mma', ca elaptec quetlhencap iama meneuque nac, ncoiepleujoc jata njan trigo apquelaptema.
30
Ntasec ncactong anquec lhemec ma'a, jata acuacmo ta acnem nennaclhemacja aquielhna, angeliecpelcoc jata trigo cacpota njan iama meneuque. Netamen allapacsec jata apquenmacmecama cacpota ellaptancoc amanie iama meneuque, engianquesecja ta cacpota eluanlhecjac ma'a. Netamen jata m'a enaclhancoc trigo apactec, cacpota elletsacjac conne iesam alhua asqueltacmelquescamacja nac actec" lhna aptemac ma'a.
Apietquescama Jesus mostaza actec
31
— Quetsec anquec secjec ampacjasecja caselha altacmelo aniem'o Engiapom Neten apiesecsec enenlhet'awoc ma'a, malha acto nac mostaza actec apcanma aniep apancoc lhema enenlhet la'a.
32
Quetsec anquec ma'a actec anac, coca iamet aquiocjo nquec ntemonwacmoc ma'a, mancolhec mo'oc iamet alanmo lhemec aniep, nquellanenwa'ac na alhano'oc anatatcoc aisecsec actengoc ma'a—lhna aptemac Jesus apquellanemo.
Jesus apietquescama harina apiepjescama
33
—Aptaiecja apuesque Engiapom Neten actacmelquescamo acuanecamoc apualho'oc enenlhet'awoc, malha niecje ctonac harina nac apiepjescama, lhema nqueluana ncoipetquesec quetsec harina apiepjescama cacpota eiepjecjac ma'a—lhta aptac Jesus apquellano.
34
Lhamacjo apquetlhecmoscama nac apietquescama Jesus napaqtawec enenlhet'awoc ma'a, wanlha apietquescama mota.
35
Nwa'a lhta acnem aplheianmo lhnac na nec secama ania'a nnenga, lhnac nanec aptemac:
«Atlhecmocsec jata wanlha moc asietquescama, caselha acposemmalhca lhennenga tep, amanie apquellanai'a Engiapom Neten alhma nquec jam»
Jesus apquelpeiwescasecja apietquescama actemacja trigo cacpota njan iama meneuque
36
Apqueliengiacje lhta Jesus enenlhet'awoc ma'a, ca aptaqjacjo apnemacja cacpota njan apqueltamesaicamoc. Ca apquelelmalhnenca lhta apqueltamesaicamoc, lhta aptancoc:
—Jengelpeiwescasecja no aptacja lhquec apietquescama iama meneuque—lhta aptancoc.
37
Lhta aptac Jesus apquellano m'a:
—Ca apcanma lhquec altacmanma actec apto Enenlhet Apquetca m'a,
38
ca aniep anac aquietquesammalhca jalhma nquec jam, ca apqueltacmanma nac apactec, malha m'a apquellelto Engiapom Neten apquennemolhema, ca iama meneuque lhquec, malha m'a apquellelto queliacjameio' annemolhema.
39
Anmanquec queliacjameio iama meneuque jalhma nquec jam. Netamen acuo'o ta nnelha acnem lhmanquec jam, acuesai'a njan ma'a acnaclhemmalhquelha aquielhna, Enenlhet neten jatoca enaclhancoc ma'a.
40
Engianquesecjac jata iama meneuque, ncoluanlhalhcac jata m'a acnem anac ma'a.
41
Netamen Enenlhet Apquetca ellapacsec jata Enenlhet Neten cacpota ellentepquesec enenlhet meliamolhma apquellelto apquetselhnanoncoma Engiapom Neten apquennemolhma,
42
cacpota eclho'oc natelh aquieto malhec aquiawai'a, ncolpelhcama ta apiempeioc ma'a, eliepcalhec jata njan ma'a aniem'o apquellai'a.
43
Coca apquellelto apquelleliejecjo nac Engiapom Neten, ellapommatec jata aquieto apnacja napocja Engiapom Neten, malha acnem jata ncotnejec apquellapommatma m'a.¡Eltacmelcaso ta alietnaicama apaqtec alheianma lhquec!— lhta aptac apquellano Jesus apqueltamesaicamoc ma'a.
Jesus apietquescama oro acmennawe aniem'o Engiapom Neten (MEJORAR TITULO)
44
— (Probar mejor: Llegar a ser parte de la familia de Dios es algo de mucho valor(muy importante)...es como un tesoro que un hombre encontró......)Lhamacjo caselha aniem'o nac Engiapom Neten malha acmennawe nque nac oro, lhema enenlhet la'a apuetecja acposemmalhca aquieto aisecsec iocjalhma ncotnacja apancoc la lhepop, mpaijacjec apualhoc ma'a, colhuawec anquec na aposacjac mocjom ma'a. Netamen aptaqjacjo apnemacja cacpota eclhama lhamacjo caselha apanco'oc etac pataccom ma'a cacpota emoc na iocjalhma lhquec apuetanweianlha oro—lhta aptac apquetlhecmoso
Jesus ma'a.
Jesus apietquescama metaimong actec aliaquiema acmennawe
45
—Lhamacjo caselha aniem'o nac Engiapom Neten malha metaimong actec anac aquiaquiema acmennawe lhema enenlhet la apuetecja nesca apquetengiaicama caselha acmennawec ma'a.
46
Ca
apuetacjo la m'a, colhuawec anquec etaqjoc apnemacja, eclho'oc lhamacjo caselha apanco'oc ma'a cacpota etaqjoc mocjom neptamen lhec, emoc ma'a metaimong aquiaquiema acmennawe lhquec—lhta aptac Jesus apquetlhecmoso m'a.
Jesus apietquescama iama tetecco quelasma ancoc
47
—Jata acuo'o ta acnem aptaiecja apiau'acja apuesque Engiapom Neten, ncolhoc jata actemo nac aptengiaicamoc la quelasma, etlhancoc iama tetecco aisecsec nemmen cacpota eljatsocsec lhamacjo actemacja quelasma m'a.
48
Ca aclan'o la m'a quelasma nemmen, eliengiosentac neiawa iemmen ma'a, elpalescacjac cacpota engiacjancoc ma'a. Netamen ma'a eltacmelcasancoc quelasma altacmelo la'a lhema iama posac, eclhancoc coca quelasma ncollatsecama la'a.
49
Jata njan ncotnec acmac'o ta ncowomoc nnelha acnem jalhma nquec jam. Engielhpanquesec jata Enenlhet Neten enenlhet'awoc apqueliamolhma cacpota njan meliamolhma'.
50
Eclhacpoc jata apquellelto meliamolhma ncospaneiacja talha, ellengancoc jata aquiawai'a acmasca m'a, eliapqalhec jata cacpota njan ncolpelhcama ta apiempeioc ma'a— lhta aptac apquetlhecmoso Jesus ma'a.
51
Netamen ma'a ca apquelelmalhnenca lhta Jesus apqueltamesaicamoc, lhta aptac:
—¿Apquelliawe nlho quetlhencap lhamacjo asietquescama nac, je?—
—Jai, nelliawo ie' — lhta aptancoc ma'a.
52
Lhta aptac mocjom Jesus:
— Ca apiojo la lhema jengetlhecmoscama jenganemacja Moises lhamacjo nema nengianweiacmo alleniem'o Engiapom Neten, malha ta etnec enenlhet apto la apancoc apnemacja apqueltacmelquescama conne caselha acmennauca'a alhnancoc cacpota njan lhennenga, apiamo njan eljatsocsec moclhem'a cacpota enmama m'a— lhta aptac apquetlhecmoso Jesus ma'a.
53
Ca apenesco lhta Jesus apietquescama m'a, aptaqjacjo lhta njan ma'a,
54
apuacjo lhta aquieto apcawacja apanquec, ca apquetlhecmoscacjo lhta apcaqnecjelha judios ma'a. Nquelpelapcasque lhta apquellengo' enenlhet'awoc ma'a, lhta aptancoc apquelpacmetquesacpo moc apancawec:
—¿Co la apianweianlha nquescama caselha enenlhet anac, je? ¿Nieje aptemacja apquelanei'o caselha jempelapquescama nac?— lhta aptancoc ma'a.
Coca lhta aptancoc na napocja enenlhet'awoc ma'a:
55
— Jesus ja'e, Jose apquelpelhiecjema nac iamet apquetca, Maria atca, apquelialheng'a m'a Santiago, Jose, Simon cacpota njan Judas.
56
Nquelloca apquelialheng'a nqueluana'ac jenque'e. Niejec aniemeiacja lhamacjo aptemacja apianweiacmo m'a—lhta aptancoc ma'a.
57
Coca apqueliasqueiacme lhta enenlhet'awoc ma'a, ca ncanec Jesus lhta aptac apquellano:
— Secama ania'a la'a ncolhec jata acmo tacja lhamacjo iocjalhma, coca mancolhec acmo tacja apquellelto apquennemolhema apanque', cacpota njan apcawacja lheme' —lhta aptac ma'a.
58
Aselhte lhta apquelanai'a caselha jempelapquescama Jesus ma'a aniem'o apqueliasqueiam apquennemolhema apanque nac.