Capítulo 12
Apquelaptema trigo Jesus apqueltamesaicamoc
1
Lhema acnem alhta sabado, Jesus cacpota njan apqueltamesaicamoc apqueljalhtepelhqueto lhta aniep apquenammacpelha trigo, mec alhta nquennapac ma'a, ca apnaclhenco lhta njan necsa apquetlhengama trigo apactec, aptawenco lhta njan ma'a.
2
Ca apquelluet'o lhta njan fariseos ma'a, lhta
aptancoc apquellano Jesus:
—¡Se lha ntac apnaclhenco nac trigo apactec que, mancoltemac jenganemacja Moises anmacmama' acnem nennecjelha'! —lhta aptancoc ma'a.
3
Ca apcatemmonca lhta Jesus ma'a, lhta aptac:
—Apquelliawe quetlhencap aptemo lhnac nanec apuesque David annenga cacpota njan apquetlhelhma'ac annapmo lhnac nanec maiec,
4
apquelentalhnemo lhnac nanec Engiapom Neten apnemacja m'a, apqueltaseiacmo lhnac pan nema acpoquenquescama Engiapom Neten, amosec na niecje m'a, wanlha lhna niecje sacerdote aptoma m'a.
5
Apquelietsateianquec quetlhencap waccajac jenganemacja nac Moises, apquenmacmecama njan sacerdotes aquieto conne Engiapom Neten apnemacja necsa acnem sabado nennecjelha, jawe njan ncolatsecama m'a.
6
Jawe ngiapac anque, co'o asto neten anquec asiaspommalhca molhnoc ma'a Engiapom Neten apnemacja nac.
7
Lhnac na nec aptemac Engiapom Neten ma'a:
«Moltac co'o jelletsantenquesec jellaicamoc caselha, coca ntasec ma'a elietnajoc napaqta'ac po'oc»
lhnac nane aptemac Engiapom Neten ma'a.
Coca melianwacmoc mocjom quetlhencap jengetlhecmoscama nac, co lhtema nac apqueliamo quetlhencap jengetlhecmoscama, meliamenama lhquec enenlhet apqueliamolhma nac.
8
Enenlhet Apquetca nac apuanquec apmac'acja la elanac acnem nennecjelha nac —lhta aptac Jesus ma'a.
Aptacmelcasecja Jesus lhema enenlhet acnem nennecjelha
9
Ca apeneso lhta Jesus apquellatemommap Fariseos ma'a, apmeiacjo lhta aptalhnenwacmo apcaqnecjelha judios m'a.
10
Apne lhta lhema enenlhet aquiacsecja apmec ma'a, ca apquelelmalhnenca lhta fariseos ma'a, lhta aptancoc:
—¿Nqueltemenque nlho jenganemacja antacmelcasecja lhema enenlhet acnem nennecjelha la'a, je?— lhta aptancoc ma'a.
Coca apquelleliama lhta niecje fariseos cacpota etselhnanac Jesus ma'a napaqtawec apquelemjama apmaniaie judios.
11
Coca lhta aptac Jesus apquellatemmonca:
— Apteiacmo la lhema nepquesec apnaqtoscama conne malhec quetlhencap acnem nennecjelha la'a,
¿Jawe ngiapac nlho eleljatsosancoc ma'a, je?
12
Neten anquec apiaspommap lhema enenlhet la'a melhnoc ma'a nepquesec. Jai, nqueltemenquec jenganemacja Moises angelanac caselha altacmelo acnem nennecjelha la'a —lhta aptac Jesus apquellatemmonca m'a.
13
Ca apquelan'o lhta Jesus aquiacsecja apmec ma'a, lhta aptac apcano:
—¡Epeiwesecja' no apmec! —lhta aptac
Ca apeiwesacjo lhta apmec ma'a, actacmelacjo, nnecjawe lhta njan mo'oc apmec ma'a.
14
Ca apquellentepo lhta fariseos apqacnecjelha m'a, apquellempo'o lhta njan apquellanecja aptancolha m'a cacpota ellaqjec Jesus.
15
Apleng'a lhtac Jesus ma'a aplhenammap, ca apmeiacjo mo'oc necja, ma lhta ntec na enenlhet'awoc apquelieplecja m'a, apqueltacmelcasecjo lhta njan lhamacjo actemacja anmasca apiempeioc ma'a.
16
Ca apquelpacmetqueso lhta njan enenlhet'awoc ma'a meltemo etlhenec actacja apqueluetai'a.
17
Ca actemacja lhta acuetammalhca caselha jempelapquescama aplheianmec nac na nec secama ania'a annenga Isaias, lhna aptemac ma'a:
18
« Ellanjono, asqueliequiescama co'o jenque'e, ascawema co'o cacpota annencasama, awanjec ascamelaiam, apaiesacjec co'o ewalhoc. Anwancoc jata Ewalhoc ejencoc ejenque, etlhecmocsec jata aplhamacjo enenlhet'awoc cacpota ellanancoc acpeiwomo.
19
Metca apquennapommap jata, metca njan apuenquesaicamoc apmanquelha la'a.
20
Melianwesquescasanquec jata apquellengaianco nac aquientalhnema atlhenquescama nac enmasquenwomoc,
menactewacsec jata njan meliennactema nac,
eiepjonwescamjoc jata actemacja acpeiwomo m'a.
21
Lhamacjo enenlhet'awoc lhma nquec jam ncoitec jata aleljalhanma apualho'oc aniem'o m'a enenlhet anac»
lhnac nanec aptemac ma'a.
Ncolatsecama aplhenammap Jesus
22
Nne lhta aquiantemacmo lhema enenlhet apnacja Jesus, metca apaqto'oc alhta, metca apaioma njan, queliacjameio lhta actewascama m'a, coca aptacmelcasacje lhta Jesus ma'a.
23
Nquelpelapcasque lhta enenlhet'awoc ma'a, ca apquelpacmetquesacpo lhta njan moc apancawe' ma'a, lha aptancoc:
— ¿Jawe nlho David annenga aptawen neptamen jam
?— lhta aptancoc ma'a.
24
Coca moclhem'a fariseo lhta ntancoc alquetansema apualho'oc:
—Amjama amanie queliacjameio' acuesai'a nac Beelzebu aicamoc apmopuana Jesus cacpota engiapuanac elentepquesec altemo lhemec nac queliacjameio m'a— lhta ntancoc aclheianma apualho'oc ma'a.
25
Apiawe lhtoca Jesus ma'a actemacja atlheianma apualho'oc fariseos, lhta aptac apquellano:
—Apquennapecpec jata nquec enenlhet lhema iocjalhma la'a, enactewacsec jata apancawec ma'a. Apquennapecpec jata nquec enenlhet lhema apiau'acja temma la'a nlho ca la apquetcac apanquec apquennemolhema la'a, enaqtewasacpoc jata apancawec ma'a aniem'o apquennapommap.
26
Nnawec na m'a, ca alentepcaso la Satanas altemo lhemec ma'a, annapelhco la njan, ncomascoc jata njan acnema acmowana m'a.
27
Apquetlhenque mota quetlhencap jeiaicamoc asmopuana Beelzebu cacpota alentepquesec queliacjameioc altemo lhemec ma'a, melietemo quetlhencap ma'a ncanec apquelieplecama nac quetlhencap apquelentepcaseianquec na queliacjameio m'a, ¿se lha allaicamoc na apquenmopuanca m'a ie, je?
28
Asquelentepcasquec na co'o queliacjameio aniem'o Engiapom Neten Apualhoc, jawe ngiapac anquec apqueluet'ac quetlhencap Engiapom Neten apmopuana jenque'e nalhepop anac.
29
¿Se lha enenlhet mannemo la apiennactema ie cacpota eclhec apnemacja enenlhet na apiennactema emenielhquesec caselha apancoc? Wanlha coca enenlhet aquietno la neten apanquec apiennactema, apuanquec secjec elpelhquetec ma'a cacpota enmenielhquesec caselha apancoc.
30
Enenlhet manjetno la alhelhma, coca apto jeiammelhma m'a, enenlhet manjepasmoma la njan ascanquesecja', engielhpanquescac coca m'a.
31
Engiapom Neten jata enmecjac mocjom tacja lhamacjo enenlhet'awoc ncolatsecama nac apquellanai'a, cacpota njan ncolatsecama nac apquetlheianma, coca menmecjec jata m'a apquellelto nac apnaqtewascama apuesai'a Engiapom Neten Apualhoc.
32
Emecjac jata mocjom tacja Engiapom Neten enenlhet apto la aptacnoncoma apuesai'a Enenlhet Apquetca nac, coca memecje panque ta tacja enenlhet apto la aplheianma ncollatsecama Engiapom Neten Apualhoc—
Iamet actacmanma nietnec actacmanma aquielhna, iamet ancolatsecama nietnec ncollatsecama aquielhna
33
—Actacmanma iamet nqueltasec na aquielhna, iamet ancolatsecama coca mancollatsema njan aquielhna. Nenmac'o la aniojoc iamet actacmelo, nlhocala ncollatsecama, wanlha enwanquec angellanjo' aquielhna, cacpota aniojoc ma'a.
34
¡Menasma quetlhencap¡ Mancollapuanquec elpacmetec apquelpacmeiasma altacmelo ncanec nquellaneianquec apualho'oc ncollatsecama.
35
Enenlhet apqueliamolhma la'a nlaneiawec apualho'oc actacmanma, nqueltasec na apatno'oc elpacmetec ma'a, coca enenlhet la meliamolhma mancolatsema njan apquelpacmeiasma elpacmetec, nquellaneiawec na apualho'oc ncollatsecama.
36
Jawe ngiapac anquec acuacmo ta nnelha acnem, aplhamacjo elleltacpoc jata etlhenecjoc apquetlhenammap ncolatsecama apatno'oc apquellanei'o po'oc.
37
Ncolhec jata aquiaqmoncasacjo m'a, ncolatsecama la apatno'oc apquetlheianma po'oc, ncolhec jata aleltanco apquetselhnanemmap, coca altacmanma la apatno'oc apquetlheianma po'oc, ncolhec jata aleltanco metca apqueltemenweiacmo lhma—lhta aptac Jesus apquellano m'a.
Apqueltammap Jesus elanac caselha jempelapquescama aniem'o neten
38
Moclhem'a fariseos cacpota njan jengetlhecmoscama jenganemacja Moises, lhta aptancoc apquellano Jesus ma'a:
—Jengetlhecmoscama, nengeltawec elanac lhema caselha monwetai'o cacpota angelueta' apto lheiap Engiapom Neten apcapascama — lhta aptancoc ma'a.
39
Coca lhta aptac Jesus apquellatemmonca m'a:
—Ca enenlhet'awoc anac meliamolhma apquelleliasepcasecama njan apquelleltawe mota eluetac caselha monwetai'o aniem'o neten, coca wanlha ta aluetasquesec aptemacja lhnac nanec secama ania'a Jonas.
40
Apnemo lhnac nanec 3 acnem au'alhoc quelasma aquiawai'a, jata ncotnec na m'a Enenlhet Apquetca nac, eitec jata conne metaimong alhua acuacmo 3 acnem.
41
Jata acuacmo ta acnem nema alpeiwesecja apquellanecamoc altacmelo caselha, nlhoca la njan ncolatsecama la'a enenlhet'awoc colhuawe nac apcactengaicamoc jenque'e, enenlhet'awoc lhnac nanec co Ninive elpacmetec jata apquellammelhecja quetlhencap ma'a napaqtec Engiapom Neten, ncanec enenlhet'awoc anac ma'a apquellaneicocjec nac nanec apualho'oc necsa apquellengai'a ania'a aplheianma Jonas annenga. Coca quetlhencap apquelleng'a niecje alheianma ania'a, coca mellaneicocjac apualho'oc, co'o niecje asto neten ajenquec asiaspommalhca, aselhtec ma'a Jonas.
42
Jata acuacmo ta acnem nema alpeiwesecja apquellanecamoc altacmelo caselha, nlhoca la njan ncolatsecama la'a enenlhet'awoc colhuawe nac apcactengaicamoc jenque'e, awesque lhnac nanec co nepieiam jata njan ncoliatac alammelhma quetlhencap napaqtec Engiapom Neten ma'a, ncanec
ampaio'o lhnac nanec mocje canque' acmajai'a ncailho apianweiacmo apquetlhecmoscama apuesque Salomon annenga, coca quetlhencap mancomac'ac ellailhojo' asquetlhecmoscama nac, co'o asto nac neten anquec asiaspommalhca, aselhtec Salomon.
43
Ca actepo la casecapoc apualhoc
enenlhet, ncoloca ta m'a aquieto metquelha temma, actengiai'a aquiamposammalhca. Ca mancotacjo la m'a,
44
ncolhenec au'alhoc:
"Ntasec jata ataqjo asnemacja lhta lhennenga, jata alhnacjac ma'a" ncotnec aclheianma au'alhoc ma'a.
Ncotaqjoc netamen alhta mocjom apualhoc enenlhet, acuetanwactamo la metca temma conne, alhnasemmalhca njan, cacpota njan nema alanesquescama acnaicamoc caselha.
45
Colhuawec anquec ncolelliama ncoliantementa altemo lheme' 7 casecapoc atlhelhma'ac neten anquec ncollatsecama, ncolentalhnenwata apualhoc enenlhet ma'a cacpota ncaqjenwomoc ma'a. Coca ncoianwomoc jata njan melatsecama enenlhet ma'a, mancolhno secjec anque lhta actacja lhta lhema casecapoc apualhoc.
Jata ncotnancoc na enenlhet'awoc anac jenque'e meliamolhma —lhta aptac Jesus.
46
Necsa apquetlhecmoscama lhtac Jesus enenlhet'awoc ma'a, acuo'o lhta nquen cacpota njan apquelialheng'a, nquellailhe lhta m'a iocjalhma cacpota ncolpacmetquesec secjec ma'a.
47
Lhta nna acto ano Jesus ma'a:
—Nquen nnac cacpota njan apquelialheng'a nquellailhac aquieto iocjalhma, nquelleltawec ncolpacmetquesec lheiap—lhta nna acto m'a.
48
Ca apcatemmonca lhta Jesus ma'a, lhta aptac:
—¿Selha co'o meme ie' cacpota njan elialheng'a, je?—lhta aptac.
49
Ca apenteijo lhta Jesus apqueltamesaicamoc ma'a cacpota njan nqueluana'ac, lhta aptac:
50
—Coca ja'e asto meme cacpota njan elialheng'a. Enenlhet apto la apcasecjai'o Tata apno m'a neten, coca m'a jawe ngiapac asto elialheng'a cacpota njan meme— lhta aptac Jesus ma'a.