¹ —Asquelientemoncasawe lhta asqueleltennascama quetlhencap acuo'o ta aquientalhnema apquellaniemjaicama cacpota m'a meluatesanquec aptaicamoc manjeliasqueiam acuo'o ta m'a. ² Ncolhec jata njan alentepcaso conne apcaqnecjelha nac judios, etequio'oc jata njan quetlhencap, ncotlhenec jata apualho'oc ma'a enenlhet anac aniem'o apquellasennaicama Engiapom Neten ma'a, ³ coca manjeliecpelquemac co'o cacpota njan Apiapom enenlhet meliamolhma nac ma'a. ⁴ Asquelientemoncasawec mocjom asqueleltennascama colhuawe nac cacpota ncotlheianwacjoc apualho'oc acuo'o ta m'a. Ma lhta co aleltennasac quetlhencap secjec lhta asquempai'acjasecja asmacmecama ncanec taiepe lhta mocjom ncowac ma'a, ⁵ coca ataqjoc jata mocjom apnacja apto jeiapascama, ma nac jelelmalhnema quetlhencap asmac'acja amjancoc, ⁶ aiosac'a na ntac apualho'oc quetlhencap apquelleng'o aspaioma nac. ⁷ Ntasec jata ncotnec mocjom apquellaniemjaicama quetlhencap ataqjoc jata netamen alhta, cacpota ewac apto Apquenmasma, coca mongiaqjo la m'a, monwapacsec na m'a. ^{8 9 10 11} Jata apuo'o ta m'a apto Apquenmasma, etlhenquescamoc jata apualho'oc enenlhet'awoc aquietnema meliamolhma aniem'o jeliasqueiam co'o, etlhenquescamoc jata njan apualho'oc enenlhet'awoc co'o asto aspeiwomo, metca astemenwecjo lhma, etlhenquescamoc jata njan apualho'oc enenlhet'awoc, Engiapom Neten aplheianma acto acselhnanemmalhca awesque lhma nquec jam, eiaqmoncasecjac jata njan actemacja m'a. Coca ataqjoc jata mocjom co'o apnacja apto lhta jeiapascama, manjeluetecjec jata quetlhencap. ¹² Nlhanie niecje ania'a asmajai'a aleltennacsec mocjom, coca mancollapuanquec quelha eluascapoc aniem'o aquientalhnema. ¹³ Jata apuo'o ta Apualhoc ¹ apto jawe ngiapac anque na ngiapom, jatoca elianwesquescamjoc quetlhencap acto jawe ngiapac anque, melhenec jata apancoc apanquec caselha, wanlha ta elhenec actemacja aplengai'a aniem'o Engiapom Neten apaioma, eleltennacsec jata njan acmac'acja ta ncowac caselha apmaniaie quetlhencap. ¹⁴ Elianwesquescamjoc jata njan co'o asto asientalhnemo, eleltennacsec na astacja aspaioma aplengai'a m'a. ¹⁵ Lhamacjo apanco'oc anac Apiapom, co'o njan ejenco'oc ma'a, ca ncanec co'o atnec alheianma colhuawe nac ma'a, ennac jata Apualhoc anac astacja nac alheianma, eleltennacsec jata njan quetlhencap ma'a. ¹⁶ Quetse ncaimelhcac manjeluetecjec jata quetlhencap, coca alhaiec jata jeluetecjac mocjom— lhta aptac apquellano Jesus apqueltamesaicamoc. ¹⁷ Ca apquelpacmetquesacpo lhta moc apancawe apqueltamesaicamoc ma'a, lhta aptancoc: —¿Se lha aplheno nac Jesus que? ¹⁸ Aplhenquec lhec quetsec ncaimelhcac acnem mangeluetecjec jata ennenco'o m'a, coca alhaiec jata angeluetecjac mocjom ma'a. ¡Mangeliojoc actacja nac aplheianma! —lhta ptancoc ma'a. ¹⁹ Apiawe lhta Jesus apquenmajai'a elelmalhnama m'a, lhta aptac apquellano m'a: — Asqueleltennasquec lhec quetsec ncaimelhcac manjeluetecjec jata quetlhencap, alhaie jatoca jeluetecjac mocjom, coca meliojoc quetlhencap. ²⁰ Jawe ngiapac anque quetlhencap ncolliepuamancoc jata, ncacsec jata njan apiapcalhema, coca enenlhet anac meliamolhma ncolpaijecja ta mota apualho'oc, alhaie jatoca ncolpaijecjac na apualho'oc quetlhencap ma'a. ²¹ Nnawe nqueluana apmajai'a la etiemoc atca au'alhoc, asque ncotnejec, coca netamen apteiacmo la atca m'a, ncopaijecjac au'alhoc ma'a. ²² Nnawec na quetlhencap, nqueliepuamenquec colhuawe nac, coca jeluetacjo ta mocjom ncolpaijecjac jata apualho'oc, mamma ta ncomasquecsec alpaijacjo ta apualho'oc ma'a. ²³ Jata apuo'o ta m'a apto Apquenmasma ncomascoc jata jelelmalhnenca co'o, jatoca m'a elelmalhnama Apiapom aquieplomo asuesai'a, ellancoc jata lhamacjo caselhaja m'a, jawe ngiapac anquec ma'a. ²⁴ Melelmalhnecama mocjom quetlhencap Engiapom Neten aquieplomo asuesai'a nac, elelmalhnama toca, ncolhe ta allanco m'a, awanjec jata njan ncotnec alpaijecja apualho'oc quetlhencap ma'a. ²⁵ Asietcasque co'o mota aptemacja Apiapom, coca ncotnenwomoc jata alhnacjo nquec asquetlhecmoscama nac, molhenec jata mocjom asietquescama nac. ²⁶ Molelmalhnescasanquec jata njan mocjom quetlhencap Apiapom, elelmalhnama ta apancawec quetlhencap ma'a aquieplomo asuesai'a nac. ²⁷ Apquellamelacmec Apiapom quetlhencap ncanec jellamelaiacmec na quetlhencap, meliascacmoc na apto lhta jeiapascama. ²⁸ Ca asquempai'a co'o m'a apnacja lhta Apiapom, asuai'o jenque'e nalhepop anac, ataqjoc jatoca colhuawe nac apnacja m'a — lhta aptac Jesus. ²⁹ Coca lhta aptancoc apquellano apqueltamesaicamoc: — ¡Colhua nac nelliawec aptacja nac apaioma lheiap, melhe nac apietquescama! ³⁰ Mancaimelhcac angelelmalhnecjo cacpota elpeiwesecjac lheiap, apiawec lhamacjo caselha lheiap ca ncanec mongeliascamec lheiap apto Engiapom Neten apcapascama—lhta aptancoc. ³¹ Coca lhta aptac mocjom Jesus apquellano: —Iee, ma nlho jeliascacmoc niecje. ³² Jawe ngiapac anquec nwa'ac colhuawe nac engiengiancoc jata quetlhencap, engielhpaqnecja ta njan, jeliengiecjac jata elhepquennenga, coca molhec jata elhepque, Apiapom jatoca alhelhma m'a. ³³ Ncowac jata aquientalhnema, coca mellaga ncoie' ncanec co'o mota asiepjonwacme mocjom jata emanie nac nesa aquientalhnema ta. Manjeliengiecja nquec na jelpasmecja co'o cacpota eluetac jata metca altaicama apualho'oc quetlhencap—lhta aptac Jesus.