¹ Lhema enenlhet alhta apuesai'a Lazaro acmasquei'o lhta apiempec ma'a, apcawacja apanque lhtoca Betania cacpota njan apquelialho'o Maria cacpota njan Marta. ² Maria coca acto lhta aliengiesquescama apmancoc Jesus acmases aimes aimenec, ca actemo lhta njan awa' aliemasquesecjo apmancoc Jesus ma'a. ³ Ca alapascamo lhnac lhema enenlhet cacpota eltennascacjac ania'a Jesus, lhta aptac apcano apcapasammap: —Apuesque, aptema po'oc apanque' nac apcasecjai'elha lheiap, nemmasquema lhque ncaqjac ma'a— lhta aptac. ⁴ Ca apcatemmonca lhta Jesus ma'a, lhta aptac: —Coca acmasca engiempec anac jawe acmajai'a ncaqjec ma'a, eluetac jata enenlhet'awoc Engiapom Neten apmopuana, cacpota njan apmopuana apquetca—lhta ptac. ⁵ Awanje lhta apquellamelaiam Jesus Marta, Maria cacpota njan Lazaro, ⁶ ma lhtoca epecjac'ac Jesus engiacjac ma'a apnacja Lazaro, apqueltawe lhta elhec mocjom janet acnem ma'a. ⁷ Netamen lhta ptac Jesus apquellano apqueltamesaicamoc: — Noc, angenmeiacja mocjom iocjalhma Judea— lhta aptac. ⁸ Coca ma lhta nconmac'ac enmeiacjac ma'a, lhta aptancoc ma'a: —Jengetlhecmoscama, apquenmac'a alhta ennapoc judios lheiap ma'a ¿Apmac'a nlho engiacja apanquec lheiap ma'a, je?— lhta aptancoc. ⁹ Ca apquellatemmonca lhta Jesus ma'a, lhta aptac: —Mompelapmec acnem anque la'a, 12 hora atsai'a na lhma, nquetsac'awe lhma' amai, ¹⁰ coca pelhasep la'a, ampelapmoc ma'a mamma sonquec nentepcasecamoc emmanie. ¹¹ ¡Noc apnacja nentema enlhamacja Lazaro, aptenquec ma'a, alhatecjascacjac jata!— lhta aptac. ¹² Coca lhta aptancoc apqueltamesaicamoc apquellatemmonca: —Apuesque', ca acto la jawe ngiapac anquec apteianma m'a, etacmelecjac jata m'a— lhta aptancoc. ¹³ 13 Coca aplhenque lhta niecje Jesus apquetsepma Lazaro, nquetlhenque lhtoca njan apualho'oc apqueltamesaicamoc apteianma Lazaro. ¹⁴ Coca apqueleltennasacje lhta mocjom alhnacjo nque' Jesus ma'a, lhta aptac: —Apquetsepquec Lazaro, ¹⁵ ntase co molhnemo m'a apquetsepacja nac Lazaro cacpota manjeliascamec co'o quetlhencap. ¡Noc apnacja Lazaro! — lhta aptac. ¹⁶ Coca Tomas, mo'oc nemaltema apcanet apalleiam, lhta aptac apquellano aptemo lhemec apqueltamesaicamoc Jesus: —Noc, antancoc netlhelhma'ac Jesus, angelletsepoc jate lha lhemec ma'a—lhta aptac ma'a. ¹⁷ Apuacje lhta Jesus na temma Betania, 4 acnem alhta nwacmoc apquetsepma Lazaro m'a, nemo njan aclhenquescaiacmo lhema metaimong alhua apjapac ma'a. ^{18 19} Ma lhta ntec na judios apquelluaiam ma'a acjaiancolha Marta cacpota njan Maria cacpota elpaiescasecjac au'alho'oc aquientalhnema aniem'o apquetsepma nialhneg, Jerusalen alhta apquelleniem'ac ma'a, malha 3 kilometros lhta nietnac Betania. ²⁰ Ca aclengai'o lhnac Marta apquelhiaiam Jesus ma'a, alanielhaicocjo lhnac ma'a, nnecjec noca Maria acnemacja m'a. ²¹ Lhta ntac ano Marta Jesus: —Apuesque, co lhtema nac apnema lheiap jenque'e, menietsepe nlho lhta co eialheng, ²² coca asiawec co'o apquenmalhnenca la Engiapom Neten lheiap, etnejec apmac'o la etnejec—lhta ntac. ²³ Ca apcatemmonca lhta Jesus: —Lheia' nialheng etnecjac jata mocjom apjalhnancoc apiesecsec apquenmasquenwaiacmo—lhta aptac. ²⁴ Lhta ntac Marta: —Jai', asiawec co'o ncolhec jata actescasacjo apjalhnancoc apiesecsec apquenmasquenwaiacmo acuacmo ta nnelha acnem—lhta ntac. ²⁵ Ca apcatemmonca lhta mocjom Jesus, lhta aptac: —Co'o asto asquellaicamoc apquelliennactema, asqueltemescasecja njan apjalhnanco'oc enenlhet apquenmasquenwaiacmo. Apquellelto la manjeliasqueiam enenlhet, ncaqjoc eletsepoc, elloca coca mocjom ma'a, ²⁶ coca meletsepo mocjom colhuawe nac, manjeliascacmo la'a, meletsepec jata. ¿Mmai'e ncoi'ascacmoc lheia astacja nac, je?— lhta aptac Jesus. ²⁷ Lhta ntac Marta atemmonca: —Jai apuesque', moi'ascacmoc co'o lheiap apto Mesias Engiapom Neten apquetca aplhenammacpo nac ewac jata jenque'e—lhta ntac. ²⁸ Ca actaqjo lhta mocjom netamen Marta acjaiancolha, nielhammalhquec nac acmalenioscamo altennaso nialheng' Maria: —Lheia' lhquec apcanec jengetlhecmoscama—lhna ntemac. ²⁹ Colhuawec nac nteiapmac actangiacmoc Maria alanielhanco Jesus, ³⁰ apne lhta mocjom nalhet amai Jesus ma'a, aquieto lhta apacmetquesacja Marta. ³¹ Apqueluetai'ac nac na m'a apquelelto apquelpaiesecja au'alhoc aquientalhnema acteiapmo acpecjai'a Maria, apquelieplecjo lhnac ma'a, ncanec nquetlheianmec nac apualho'oc ncowenwacjac aquieto metaimong alhua, apietnemacja apjapac nialheng. ³² Netamen ma'a, ca acuacjo lhta Maria apnacja Jesus, nquelteclhecque lhta atapno'oc napaqte ma'a, lhta ntac: —Apuesque, colhtema nac apnema lheiap jenque'e, menietsepe nlho lhta eialheng—lhta ntac. ³³ Apuet'a lhta Jesus Maria acueno ca njan judios awanje lhta aquiapcalhemmalhca m'a, ca aquiaqjapo lhta njan apualhoc Jesus ma'a, ³⁴ ca apquelelmalhnenca, lhta aptac: —¿Co la aquieto apquellaclhenquescamacja apjapac Lazaro m'a?—lhta aptac. Ca apquellatemmonca lhta enenlhet'awoc, lhta aptancoc: —Elheng nojo, elanjo, ca nque'e— lhta aptancoc. ³⁵ Ca apueno lhta njan Jesus ma'a. ³⁶ Apquelluet'a lhta njan judios ma'a, lhta aptancoc apquelpacmetquesacpo mocapancawe: —Awanjec anque nac apcamelaiam Jesus aptema po'oc Lazaro—lhta aptancoc. ³⁷ Lhta aptancoc na napocja enenlhet'awoc jeng: —Aptacmelcasacje lhta metca apaqto'oc Jesus, apuanquec quelha njan cacpota menietsepec Lazaro— lhta aptancoc. ^{38 39} Mocjom alhta aquiaqjapmo apualhoc Jesus aquientalhnema m'a, ca aptetescacmo lhta aquieto metaimong alhua apietnemacja lhta apjapac Lazaro, lhta ptac: —Eljatsos metaimong atong anac—lhta aptac. Coca lhta ntac Marta: —Apuesque', 4 acnem antac apquetsepma jam Lazaro, aptapque'—lhta ntac. ⁴⁰ Ca apcatemmonca lhta Jesus ma'a, lhta aptac: —Asqueltennasocja lhquec la lheia manjeiascacmo la co'o cacpota ncotac jata apmopuana Engiapom Neten— lhta aptac. ⁴¹ Ca apqueljatsoso lhta metaimong atong enenlhet ma'a, ca apcammelho lhta njan neten Jesus, lhta aptac: —Tata, astac co'o gracias lheiap ncanec apcailhawec asquenmalhnecama lheiap, ⁴² asiawe co'o jeiailhawe mota lheiap, astec co'o astacja nac aspacmetquescama cacpota manjeliascamec lhamacjo enenlhet anac jenque'e apto lhta lheiap jeiapascama—lhta aptac Jesus. ⁴³ Ca apiennacteso lhta apuenecama Jesus, lhta aptac: —Lazaro, etiep jam—lhta aptac. ⁴⁴ Colhuawec anque lhta aptepac Lazaro m'a, apquelhiacmo aptepo conne metaimong alhua, aquieplomo apelhquetemmap ¹ ietamopai'a, ca njan ieplomo nema apma napa'at ietamopai'a napocja'a. Netamen lhta aptac apquellano Jesus apquellelto apquelluaiam ma'a: —Eljatsosques ietamopai'a nac, cacpota ncotacmelecja aplhengama— lhta aptac. ⁴⁵ Apqueluet'a lhta m'a caselha jempelapquescama enenlhet'awoc ma'a, ca meliascacmo njan Jesus apquellelto lhta apquelpasmoma Maria, ⁴⁶ coca na pocja lhnac apquelleltennasquecjac Fariseos actacja apqueluetai'a apquelanai'a Jesus ma'a. ⁴⁷ Ca apcacnecjo lhnac na apquelemjama apmania ie sacerdotes, Fariseos, cacpota njan apqueluescaie apquelientalhnemo m'a ² , lhna aptaiancoc: — ¿Co la antemesquesec enenlhet anac ma'a, je? Nlhanie ntac apquelanai'a caselha jempelapquescama m'a. ⁴⁸ Elhamancoc jata njan enenlhet apquelieplecama ncanec meliascacmoc na m'a. Ca manmanwacmo la ennenco'o m'a, netamen etlhenmac jata quempocjacme romanos, enaqtewacsec jata Engiapom Neten apnemacja enganco'oc anac cacpota njan ennenco'o nelluesai'a judios—lhna aptaiancoc ma'a. ⁴⁹ Apnenquec nac na m'a apquemjama apmanie sacerdote apuesai'a Caifas, ca iantelhcapa lhta m'a, lhna aptemac apquellanemo: —Colquetamama no apualho'oc quetlhencap, ⁵⁰ mancoieto ncotuasalhcac nellawacja nac, coca ntasec enietsepoc lhema enenlhet aquiaqmoiecja la m'a—lhta aptac. ⁵¹ Apquelientemoncasawe lhta Caifas apcanemmacpelha elhenec acmac'acja ta ncotnec Jesus apmatnama apiaqmoiecja enenlhet'awoc judios, jawe lhtoca apancoc apanquec Caifas aplheianma m'a, wanlha coca aniem'o aptemacja apanquec apquemjama apmanie la sacerdotes. ⁵² Coca apquetsepmo lhta njan Jesus cacpota engianquesecjoc aplhamacjo apquellelto Engiapom Neten apquetcac apcacjanco lhma nquec jam. ⁵³ Netamen ma'a, apquellelto apqueluescai'e judios apquelpenescanquec nac apquellanecja apqueltacja cacpota ennapoc Jesus ma'a, ⁵⁴ lhta sonquec elielhanmama Jesus ma'a cacpota meluetiec enenlhet, ca aptepo njan iocjalhma Judea, apquenmeiacjo na temma acuesai'a Efrain, nengaqte lhta iocjalhma metquelha temma. Apnacje lhta Jesus ma'a cacpota njan apqueltamesaicamoc. ⁵⁵ Ncanquetuacme lhta njan acnem actacmelaicama lhma acuesai'a pascua, ma lhta ntec enenlhet'awoc apquenmeiecja apiau'acja temma Jerusalen, cacpota elalhnasecjac apualho'oc napaqtec Engiapom Neten amanie actacmelaicama lhma' m'a. ⁵⁶ Apquelleliama lhta njan enenlhet'awoc Jesus ma'a aquieto Engiapom Neten apnemacja, lhta ptancoc apquelpaqmetquesacpo mocapancawec ma'a: —¿Se lha aclheno apualho'oc quetlhencap que, je, ewacja telha Jesus jenque'e actacmelaicama lhma nac?—lhta aptancoc. ⁵⁷ Coca apquelemjama apmania ie sacerdotes cacpota njan Fariseos apquelpenescamawec nac apquellaicamoc ania'a enenlhet'awoc ma'a, apqueluet'o la Jesus ma'a, apuanca'ac eleltennascacjac cacpota elpatjetec ma'a.