¹ Amjama amanie nquec lhnac nanec apquelpenescama apquelpaqmetecama Engiapom Neten canjan co israelitas, apquellaianco lhnac nanec na jenganemacja apancoc cacpota etnancoc ellasennama m'a aquieto conne pa'at ^{+ ft Era de cuero y la armaban y desarmaban durante su viaje a la tierra prometida} aquiawai'a acpocquenammalhca nalhepop anac cacpota eltacnescasancoc apuesai'a m'a. ² Amanie nquec amjama au'alhoc pa'at anac acuesai'a lhnac nanec acpocquenammalhca, nquemjanquec nac ma'a talha alhancoc canjan asota aquieplomo pan nema alpocquenquescama Engiapom Neten. ³ Netamen ma'a taiep apcanet apjalhtemommap ietamopai'a nietnenque lhnac nanec mo'oc au'alhoc acuesai'a acpocquenammalhca ncoie'. ⁴ Nnaianquec nac ma'a lhema asota aquiawai'a oro aiempejec, nemacja aluanlhemacja panactema awa' acmases aimes ma'a, neten asota nac nietnenquec nac nanec na m'a iamet aisecsec aquiawai'a oro aiempejec, acnaianquelha lhnac nanec na conne metaimong necja'a, acnaqtalhesammalhca lhema apaioma Engiapom Neten apquellanemacja etnancoc ma'a. Nietnenquec nac na lhema najaicoc oro, conne lhnoca apnaianco pan apquelleniemai'o neten, nietnenquec na apquenenaicamoc apmanie Aaron annenga acteiapmo njan elhnemoc ma'a. ⁵ Apquelapquescanquec nac nanec na aplhempancoc enenlhet neten apqueliocja apquelietquesammap ma'a tacjalhet apmatacja iamet aisecsec ma'a, acuesai'a lhnoca m'a apmatacja tacjalhet anac nemacja jengasecjecjelha. Jai, wanlha alheianma actemacja caselha lhquec, mancaimelhcac alhenecjoc mocjom aclhamacjo caselha acnaianco m'a. ⁶ Lhnac na ne ntemac caselha nema acjescama conne pa'at acpocquenammalhca m'a. Apquelentalhnenwecjelha lhna mota sacerdote m'a aquieto amjama amanie nquec au'alhoc pa'at cacpota eltacnescasancoc ellasennama njan Engiapom Neten ma'a. ⁷ Coca mo'oc au'alhoc pa'at anac wanlha lhna mota aptalhnenwecjelha apuesque sacerdote lhema aptalhnenwecja lhema iantelhcapa njan, metca apiecascama lhnac apsecja ema m'a cacpota enquesec aniem'o meijamolhma apanquec ma'a, netamen na enquesec aniem'o meliamolhma apquennemolhem'a necsa meliamo apquellanecamoc ncollatsecama. ⁸ Colhua coca nelianwacmec nenwanlha nac aniem'o Espiritu Santo amosec nac elentelhec aplhamacjo m'a conne pa'at acpocquenammalhca nque' necsa apietnema mocjom pa'at acpocquenammalhca canjan jenganemacja apancoc ma'a. ⁹ Ncaimelhquec ennenco'o angelianwomjoc lhamacjo caselha nema acmescama lhta canjan nema annapma nentoscama lhta mancoltemesquescamac apquelpeiwomo enenlhet'awoc ma'a, malha coca niecje alientemommalhco amanie caselha acuetammalhca nenwanlha nac. ^{+ ft Se refiere a lo que sucedió con Cristo, que fue muerto por nuestro pecados y con esto logró hacernos justos delante de Dios 10} Jai, coca lhamacjo jenganemacja ancoc actemacja metca nentoma m'a lhamacjo caselha nac ma'a, canjan lhamacjo nengiama la'a, actengia'ia lhna lhtoca niecje alalhnasecja la enwualho'oc ma'a, coca aquietquesammalhca niecje m'a, ncowac jato ca actemonwaiam annelha m'a, ncolhec jata aquiaqmoncasacjo mo'oc acto actacmanma ncoie'. ¹¹ Nwai'ac coca actema nnelha m'a nenwanlha nac aniem'o apuai'o m'a Cristo aptemo njan apuesque sacerdote cacpota lhema actema etsantac na lhamacjo caselha altacmanma acsaujommalhco nquec ma'a, mancaimelhcac mocjom ma'a. Ca ncanec aptalhnenwecjec conne pa'at acto neten anquec acpocquenammalhca aquieto m'a neten, jawe enenlhet apancawec apquellanai'a m'a. ¹² Apsecjo njan ema apancoc ma'a apcanconwecjo Engiapom Neten, jawe ema apancoc anac ieta'ai canjan wacca iama nqueluana, ema apancoc apanquec coca apsecjac ma'a. ¡Jai, aptalhnenwecjec ma'a jengeljatsosquecjo njan metca actaiecjo mocjom necsa jengenmaicamo lhta mangeliamolhma, mancaimelhcac etalhnenwacjac mocjom ma'a! ¹³ Have niapak ma'a ema apanko'ok toro kanhan ieta'ai apkenno ngkolhek alelhpakhangka mota enenlhet alpaiseiam apvalho'ok la'a, kakpota nhan tahap ankok anak vakka atkok ngkolhek na alhpaqhangka m'a apietsekso'ok ma'a, akmovana nkoltemeskesek apkelpokkenammap kakpota nhan alalhnaskamo apiempeiok ma'a. ¹⁴ Koka akto neten ankek ma'a ema apankok anak Cristo, avanke nkollalhnaksek alietnaikama apaqto'ok kaselha ngkollatsekama apkellanekamok, akmahai'o lhta mota nkolaqlakhak akietemelha nengetsepmakha m'a. Hai, apmesemmakpe lhta panke Cristo aniem'o Espiritu metnenvaiam annelha, malha aktemo lhta aktekioma nennaqtoskama metka nhan apiakteikama la'a kakpota hengeltemeskesek nellasennaikama Eniapom Neten apto mankotnengvaiam annelha apkaniemhaikama. ¹⁵ Hai, nietnek ennengko'o alhnankok annemo mo'ok engvalho'ok nemmahai'akha antangkok aniem'o Cristo. Apketsepme lhtoka m'a kakpota envanka'ak ngkolhek hengelpaqnenkasakho kaselha ngkolatsekama nellanekamo mota neksa nellaniemhaikama akietnema amanie nkek annemo mo'ok apvalho'ok lhnak nanek apkenmahai'akha etnangkok ma'a. Kolhva koka nengelelto nak nellavommalhka envanka'ak hata angetlhevangkok kaselha mankonmaskengvaiam apeneskamo lhta apaivoma hengellangkok hata m'a. 1 ¹⁶ Nnavek na m'a vakkahak anak aptalheskama apkelanai'a apiapom aktemakha apkelhpankesek hata kaselha apanko'ok apketkak apketsepo ta m'a, ¹⁷ koka nkaimelhkak amanie enietsepok kakpota ngkolhek aiempek ma'a vakkahak anak, koka aplava la mokhom, mankolhek na aiempek ma'a. ¹⁸ Lhnak nane ntemak ma'a apkellanekamok amhama amanie nkek annemo mo'ok apvalho'ok nak nanek apkenmahai'akha etnangkok, nkaimommalhkek nak nanek na sekhek nkoiangkenalhkak ema kakpota ngkolhek aiempek ma'a apkellanekamok apkellanemmakpelha etnangkok. ¹⁹ Lhnak nanek na aptemak Moises aplheianmo ley allanemakha etnangkok apieseksek apkennemolhema, netamen apmamo lhnak nanek na lana apielhvasema kanhan lhema iamet aktong atkok akvesai'a hisopo, aplavkeskamo konne valdeema apankok toro apketkok kanhan ieta'ai apkenno, iemmen nema angkaiekha m'a. Netamen apkelhpakhaiangka nhan vakkahak henganemakha, kanhan apkelhpaqhaiangka takhaplhet'ok aplhamakho apkennemolhema, ²⁰ lhnak nanek na aptemak ma'a:«Ka ema nak nkolhnekse ta aiempek annemo mo'ok anak apvalho'ok apkenmahai'akha etnangkok Eniapom Neten kanhan ketlhengkap»s , lhna aptemak. ²¹ Apkelhpaqhaikama lhnak nanek na Moises ema akpaklhenammalhka kaselha aiempek kanhan lhamakho kaselha apkenmaikama aknaiangko m'a konne neksa apkellasennaikama mota Eniapom Neten. ²² Koka ley anak nketlhenkeskamavek nkolalhnaksek kaselha aniem'o m'a ema. Metko la akiangkenammalhka ema, mangkolhek na aktemeskesangkankek meliamolhma nak enenlhet'avok. ²³ Ka nkeniemai'ak ma'a aimommalhko lhta mota apkennapekamok apnaqtoskama kakpota ngkotnek malha alalhnaskama ema ankok kaselha aknaiangko m'a konne, malha nhan alietkesammalhka la m'a kaselha nak ma'a neten. Koka kaselha nak aknaiangko nak neten mankavankek nkolalhnaksek ema ankok nentoskama aptekioma la'a, vanlha lhtoka aimommalhko apketsepma apto neten apankek apiaspommap anak. ²⁴ Ma lhta etalhnengvekha Cristo pa'at akpokkenammalhka apto enenlhet apankek apkelanai'a, ngkanek apietkesammap ma'a pa'at anak hengke'e apietnemo m'a neten apto have niapak anke nak. Neten koka aptalhnengvekhak ma'a napaqtek Eniapom Neten kakpota enianak hengelleltaqmelkeskesek nengellaniemhaikama ennengko'o m'a. ²⁵ Apkaiangkave lhta nhan apanke kakpota ematong ma'a lhema aktema koka m'a, mok aktema m'a apiav'akha sacerdote nalhepop anak aimommalhko mota etalhnengvakhak lhamakho anio pa'at akpokkenammalhka esakhak ema ankok apnaqtoskama, have koka ema apankok apanke. ²⁶ Lhta apto la Cristo malha apveske sacerdote, lhamakho anio lhta nha ngkotnek aplengaiangko akientalhnema nkompa lhta m'a alanemmalhko sekha lhmankek ham nkovomo lhta nhan nenvanlha nak. Koka apkaiangkavek apmesemmakpo apankek apmatnama nenvanlha nak nkanketvakmek aktemongvanlha nnelha aknem, kakpota hengelꞏhatsoskesek ngkollatsekama nellanekamok ²⁷ Lhema apketsepma enenlhet la'a, netamen nkovak hata nema akiekpelkema ngkollatsekama apkelanai'a, nlho ka la aktaqmanma. ²⁸ Nnavek na Cristo m'a, lhema aktema apkaiangko pankek apmatnama kakpota elꞏhatsoskasangkok apkellanekamok ngkollatsekama aplhamakma enenlhet'avok. Netamen ma'a evatak hata mokhom have apmahai'a elaneskasekhak apvalho'ok enenlhet'avok apkellanekamok ngkollatsekama, vanlha koka apmahai'a elvongkeskatak tep ma'a apkellelto la mota apkelelꞏhalhanma.