¹ Quetlhencap elialheng'a, apquellawecama lhta Engiapom Neten cacpota etnesquesancoc apquennemolhema, ca nqueniemai'ac ntasec ncolietnama apaqto'oc amota aptemacja Cristo Jesús apto lhta apostol apcapascama Engiapom Neten cacpota jengetlhecmosancoc ennenco'o m'a, canjan aptemo malha sacerdote apto neten apanquec apiaspommap, jengeltemesquescamo njan mongeliasqueiam ma'a. ² Apqueliejecjawe lhta njan aptemacja apcanemo Engiapom Neten apqueltemo jengelpasmoc jata, apnawe lhta njan Moisés apqueliejecjawec nac na aptemacja apcanemo Engiapom Neten apqueltemo eltacmelquesec pa'at apanco'oc. ^{1 3} Coca Engiapom Neten apcanque lhta Jesús neten apanquec nemo ai'o, aselhtec ma'a Moisés. Nnawec na m'a enenlhet la apmopuana elana pa'at aplhoc'ac nemo ai'o, aselhtec ma'a pa'at anac alanemmalhca. ⁴ Lhamacjo pa'at anac apquellanai'a nac enenlhet, coca Engiapom Neten na apquellanai'a lhamacjo caselha nenwetai'o nac ⁵ Moisés nac na apto nema asennaicama apiamolhma, apqueltacmelquescamo lhnac na Engiapom Neten apnemacja, apqueluetasquescamo lhnac na lhamacjo caselha actemacja apquelanai'a napaqtawec ma'a, ncolhoc jata njan acuai'a caselha apmaniaie m'a apmac'acja ta etnec Engiapom Neten. ⁶ Cristo coca apto Apquetca, apiamolhma apqueltacmelquescamo mota pa'at apanco'oc Engiapom Neten, ennenco'o m'a malha pa'at netlhencaso la mota nentaicamoc mongeliasqueiam aquieplomo alpaijecja engellualho'oc, canjan ncolleljalhnama engellualho'oc caselha altacmelo ncolluac jata. ⁷ Ca nqueniemai'ac na ntasec angelleltacmelcaso angellailhoc actemacja aclheianma Espiritu Santo actemo nac na actalhesammalhca waccajac Engiapom Neten apaioma, ca nnema actemo jenque'e: «Apquelleng'o la Engiapom Neten apaioma acnema anac, ⁸ meliennactesanquec apualho'oc quetlhencap, jawe malha m'a aptaiancolha lhnac nanec enenlhet'awoc menmajai'a ellailhoc, apqueliepconmo lhnac nanec na Engiapom Neten ma'a aquieto iocjalhma metquelha temma. ⁹ Jai', jeliepconmec nac nanec na apquelieijenca quetlhencap ma'a, apqueluetai'ac nac nanec niecje caselha monwetai'o asquelanai'a co'o metca nnelha acuacmo 40 iantelhcapa, ncacjoc coca m'a. ¹⁰ Ca nqueniemai'ac ma'a aslomo nanec asquellanei'o colhua apcactengaicamoc neptamna'ac ma'a, lhnac nanec astemac asquellanemo jenque'e: “wanlha mota allaniemjaicama apualho'oc malha atlheneiam la'a, manconmajai'ac ncolianwomjoc amai ejencoc anac” ¹¹ Ca nqueniemai'ac ma'a aslomo nanec na aquiawai'a, aspenescamo lhnac nanec na aspaioma melentelhec jata m'a iocjalhma apqueliamposammacpelha» ¹² Ca nqueniemai'ac quetlhencap ntasec metnanquec ncollatsecama apualho'oc, metnanquec na apqueliasqueiam cacpota njan meliengiecjec Engiapom Neten apto mancotnenwaiam annelha apcaniemjaicama. ¹³ Ntasec na eliatacpoc apiesecse anac quetlhencap necsa mancowai'a mocjom actacja nnelha acnem cacpota mancoliennenquesec maniamolhma nac, mancoliennactesquesec na apualho'oc. ¹⁴ Ampacjasecja nque lhta mongeliasqueiam ennenco'o Cristo m'a, ca neluascapo la njan aquiennactema mongeliasqueiam acuacmo actacja nnelha acnem, netamen angelpasmecjac jata ma'a nenlhamacjo caselha apancoc Cristo m'a. ¹⁵ Ca acnemo nac na actemo jenque'e: «Apquelleng'o la Engiapom Neten apaioma acnema anac, meliennactesanquec apualho'oc malha aptaiancolha lhnac nanec ma'a apquellelto menmajai'o elleliejecjoc» ¹⁶ ¿Se lha enenlhet'awoc m'a ie manconmajai'o elleliejecjoc apaioma Engiapom Neten, je? Coca aplhamacjo m'a apquellelto lhnac nanec apqueljatsosquecja Moisés aquieto m'a iocjalhma Egipto. ¹⁷ ¿Se lha njan enenlhet'awoc m'a ie aplomo apquellanei'o Engiapom Neten acuacmo 40 iantelhcapa, je? Coca njan apquellelto lhnac nanec apquellanecamoc meliamolhma m'a, apquelletsepmo njan aplhamacjo aquieto m'a iocjalhma metquelha temma. ¹⁸ ¿Se lha njan enenlhet'awoc m'a ie apquellaianco lhnac nanec apaioma acto jawe ngiapac anquec Engiapom Neten melentelhec jata iocjalhma nengiamposammalhquelha, je? Coca wanlha m'a apquellelto nac melleliejecjoc. ¹⁹ Jai', lhnac nane ntemac ma'a, nelliawec ennenco'o manconmopuanco nac apquelentalhnemo m'a aniem'o apqueliasqueiam