¹ Ka aplhamakma lhnak nanek enenlhet'avok alheno lhkek malha hengellanekama aptaiangkok ennengko'o m'a neksa nellaniemhaikama hengke'e. Ka ngkanek ntasek annengkenekha malha nelpatmekama akientalhnema la'a, ngkollatsekama nak nahan hengeliaseiangko mota lhma, kakpota anganiemhama metka akpekhai'a. Malha aktonak ma'a apkelpaivasemmap anak enenlhet apkeniema metka akpekhai'a ngkanek aholhek amai. ² Ntasekantangkok malha nengammelhmo apnakha Jesus apto hengellaikamok nentaikamok mongeliaskeiam ma'a, apto nhan psavheskeskaiakmo akvanekamok mongiaskeiam anak. Apvaskapme lhta m'a neksa akientalhnema neten iamet aktenneskama, niekhe kaselha henmankaskama m'a, koka apvaskapme lhta aniem'o nietnek akietnaikama apaqtek akpaihekha ta apvalhok apmanie, netamen koka m'a apnekho napokha akiennakha aptanema Eniapom Neten. ³ Hai, kolketamama ta apvalho'ok ketlhengkap aptemakha Jesus aplengaiangko akientalhnema aniem'o apkammelhma enenlhet'avok apkellanekamok ngkollatsekama. Nkolvakho ta mota apaqto'ok ketlhengkap ma'a kakpota mankovhek ma'a mankoliakvaiam akvakmo aptangkokho meliennaktema, ⁴ melammelhmak mokhom ketlhengkap ngkollatsekama nak akvakmo apkeletsepo. ⁵ Malha apkelvangkamaiangkek ketlhengkap apkelleltemakha etnangkok Eniapom Neten malha apkelto nak ma'a apketkak anak ketlhengkap, lhnak nanek aptemak: «Lheiap eietka, metaqnevak apnaveskama apveske, metnenkek nkoiakvaiam apanko ta akiennaktema apaivoma m'a. ⁶ Apnaveskek lheiap apveske ngkanek apkamelakmek ma'a, apkeliaqpelhketama aplhamakho aptangko la apketkak ma'a»t , lhna aptemak. ⁷ Ntasek na elvaskapok ketlhengkap neksa apiennai'o apkennaveskama Eniapom Neten ngkanek aptangkok apketkak apankavek ketlhengkap ma'a. Have niapak ankek nenieseksa nak ennengko'o lhamakho apketkak la'a enenlhet apkelvet'o la m'a apkennaveske mota m'a apiapma'ak. ⁸ Koka metko la apkennaveskama Eniapom Neten ketlhengkap, have apketkak apankavek ketlhengkap ma'a, apnek po'ok apkeliapom ma'a. ⁹ Nengeliahakhavek ennengko'o hengennaveso la eniapma'ak hengke'e nalhepop anak, koka ntasek angeliehekhok neten ankek hengennaveso la eniapma'ak ma'a apno m'a neten. Netamen angetlhevangkok hata m'a aliennaktema ennenio'ok mankotnengvaianlha nnelha. ¹⁰ Akiakvatakho nkek ennengko'o nellaniemhaikama hengke'e nalhepop anak hengennaveske mota eniapma'ak aktangkolha la mota atlhenaikama apvalho'ok kakpota ntasek ngkotnek nellaniemhaikama m'a. Koka Eniapom Neten hengennaveskek ennengko'o kakpota angelvomok ma'a nentaikamok enenlhet keltakmelkasemmakpo kanhan apkeliamolhma ka aptemo nak ma'a. ¹¹ Have niapak ankek mankolkek engelvalho'ok hengennaveso la m'a, nkollaioskesek engelvalho'ok, netamen koka m'a nkeskama nak nema hengennaveskama, nengeliangvakmek ma'a angellanangkok metka akmaska kanhan akpeivomo. ¹² Ka ngkanek ntasek elteniangkokhak mokhom malha aliennaktema apmeio'ok kanhan aptapno'ok mankoliennaktema la'a ketlhengkap. ¹³ Ellanamok hata nhan malha amai akpeivomo, metka aliekvatekamok la'a kakpota anmaska la apmanko'ok mankolaskesangkek hata apmanko'ok ma'a, nkoltaqmelekhak hata nhan apmanko'ok ma'a. ¹⁴ 4 Ellasekhakpo mota aplhamakho, ellanamok hata nha mota kaselha altaqmelo ngkanek vanlha apkellelto la apkeliamolhma apankave nak apvanka'ak hata m'a elvetangvomok Apveske. ¹⁵ Elienlhanmamok hata nhan apkenmaikamok kaselha altaqmanma nke' metka akianmoma aniem'o Eniapom Neten kakpota metnangkek ma'a malha aktonak panaktema aikapmen'ok anak akmaska aktevaskama nak enenlhet, akmovana nhan nkovak ma'a. ¹⁶ Mellanamo nkek apkellanaktema ketlhengkap, melvannamankek na aktemakha nak apkellaikamok Eniapom Neten, malha aptemakha lhnak nanek ma'a Esau apiaqmongkasekho lhnak nanek aptoma aptema m'a apteiam apmanie'. ¹⁷ Apkeliavek ketlhengkap netamen nak nanek ma'a avanhek nak apteniai'a Esau akvakmo apveno apkeltemo eniangkok apiapom ennak neten ankek aktaqmanma apaivoma apkaikamok ma'a. Koka aptakheskamavek nak nanek apiapom ma'a, mamma lhnak nanek na etneskesek ma'a. ¹⁸ Ketlhengkap koka meltaqneva Eniapom neten ngkanek alhievai'a nkek apketlhevaiangkok ketlhengkap have aktemo lhnak nanek ma'a ko Israelitas. Nientelhek ankek nak nanek atlhenkeskamo lhnak apnenio'ok ma'a aniem'o apkelvetai'a nengaqtek aleivomo nalhma akhaiam, ienaqteskama lhma kanhan teiam eten akienakteskeskama lhma, alhkaiam iemmen akiennaktema nkoie. ¹⁹ Apkellengai'o lhnak nanek na akpaivoma trompeta kakpota nhan apaivoma Eniapom Neten ma'a. Apkeleltemo lhnak nanek na meliatekhek mokhom ma'a ²⁰ aniem'o apkellai'a apaivoma m'a, lhna aptemak ma'a: "Ennap hata apkelelto la apkelteiongveiam takhalhet nalhma akhaiam ham, kanhan kaselha nevhak, nennaqtoskama, akieplomo metaimong aliaqiema nlho la nhan heva", lhnak nanek aptemak ma'a. ²¹ Nientelhek ankek nak nanek apkelvetai'a enenlhet'avok ma'a, akvaiakmo nhan Moises apkai'a m'a, lhna nanek aptemak: "Avanhek ankek ko askai'a, askelpelhiennengkek nahan", lhnak nane aptemak ma'a Moises. ²² Ketlhengkap koka mok aktema apkelvetai'a m'a, apkelteteskaiakmo nalhma akhaiam Sion, apiav'akha temma apankok Eniapom Neten apto menietsepma, apvesai'a Jerusalen apkeniem'o neten. Apkaqnekhe mota apentalhnema angeles ma'a kakpota eltakneskasangkok Eniapom Neten. ²³ Ketlhengkap na apkellelto napokha apkennemolhema apmaniaie nak ma'a Eniapom Neten apketkak, nnaiangkek na m'a apkelvesai'a vakkahak ma'a neten. Nengaqtek na ketlhengkap Eniapom Neten apto hengiekpelkemo niapom, nengaqtek na ketlhengkap apkelꞏhangok ma'a apkellelto lhta enenlhet apkeliamolhma nema atsavheskeskaiakmo lhta nhan apkeliamolhma apankave. ²⁴ Apkelteteskekhek na ketlhengkap ma'a Jesus apto lhta hengetsantengkeskama alhnankok annemo mo'ok apvalho'ok apkenmahai'akha etnangkok. Apkenmaiangkek na takha ema apankok ma'a akto alalhnaskama engelvalho'ok ma'a, ka ema nak akteniaikama mota altakmelkeskama llaniemhaikama, have m'a aktemo lhnak nanek ema apankok Abel. ²⁵ Hai, ntasek ankek ketlhengkap apkelvetai'a neksa apkellangiemhaikama, ka ngkanek ntasek meltaqneve' kno la alpaqmetkeso, ¡ellaho ta nkovak akientalhnema! Mang nak nanek elvaiakmok tep ma'a apkellelto lhnak nanek apkeltaknongkoma apkellanemmakpelha etnangkok m'a aniem'o nhan enenlhet apankek apkellaikamok apaivoma m'a. Aselhtek hata nhan elvomok tep apkellelto la apkeltaknongkoma apto apkennaveskama m'a aniem'o nak neten. ²⁶ Apievhesaikama lhnak nanek lhepop ma'a Eniapom Neten aniem'o apaivoma, koka kolhvave nak apeneskamo lhnak apaivoma have niapak ankek etnekhak hata mokhom, lhna aptemak: "Aievhesama ta mokhom lhepop, kanhan neten", lhna aptemak ma'a. ²⁷ Koka aktemakha nak aplheianma m'a elꞏhatsoksek hata kaselha akmovana nak ngkomaskengvomok aiseksek apkelentepkeskama lhta, nkolhnangkongvakhak hata m'a aknaiangkolha kaselha mangkomovana ngkomaskengvomok. ²⁸ Ennengko'o nhan netlhevaiangkok nema aktema nak Aveske mangkomovana nak gkomaskengvomok ka ngkanek ntasek antangkok gracias Eniapom Neten, angellasennama nhan akieplomo nellai'o kakpota nkopaihekhak apvalhok ma'a, ²⁹ ngkanek apto nhan malha talha m'a aksavhomo nak alvanlhema kaselha m'a.