¹ Ka mongiaskeiam anak aktemeskeskama iokhalhmek ankek nkovak hata m'a kaselha alelꞏhalhanmo mota engelvalho'ok, aktemeskeskama nhan have niapak ankek akietnema m'a kaselha mongelvet'o mokhom. ² Aktemakha lhnak nanek na meliaskeiakmo nelieihengka'a m'a, nleklemavek nak nanek apvalhok Eniapom Neten apkelvetai'o m'a. ³ Aniem'o nhan mongiaskeiam anak neliangveiakmo ennengko'o apkellanei'o Eniapom Neten kaselha lhmankek ham aniem'o apaivoma alentepkeskama, lhamakho kaselha nelvetai'o nak alleniemai'o m'a mongelvetai'akha. ⁴ Aktemakha mei'askeiam Abel ntasek ankek nak apkaikamok apkaqhema aptoskama Eniapom Neten, melhnemok ma'a Cain. Ka akleklemo lhnak nanek apvalhok Eniapom Neten aptemakha m'a, apkeltaiangko nhan apeivomo m'a. Lhennenga tep ankek niekhe apketsepma Abel, nengeliangveiakmek koka m'a aptemakha mei'askeiam nak nanek ma'a. ⁵ Mei'askeiam nak nanek na Enoc, akleklemo nhan apvalhok Eniapom Neten, apkeliamavek nak nanek na apkennemolhema aptemakha m'a, ka ngkanek apiasekho neten Eniapom Neten ma'a kakpota menietsepek ma'a, mang nak nanek na elvetekhak apkennemolhema m'a. ⁶ Apiaskeiam la enenlhet mankolkek apvalhok Eniapom Neten ma'a. Enenlhet apmahai'a la eteteskakhak Eniapom Neten nkaimelhkek amanie sekhe mei'askamek apnema m'a, mei'askamek na m'a ellangkok hata akianmoma apkellelto la apkelketansema mota m'a. ⁷ Mang nak nanek na ei'askeiakmok Noe apaivoma Eniapom Neten apkeskamo nkovak hata lhema kaselha melvetai'o m'a. Apkelanei'ak noka apanke loma nemmen akiavai'a kakpota evongkasakpok tep kanhan apketkak. Hai, mei'askeiam nak nanek nkeniemai'ak ma'a Noe aknemo aktevasekho lhmankek ham. Mei'askeiam nak nanek Noe ka nkeniemai'ak ma'a nemo altaiangko apeivomo. ⁸ Mang nak nanek na ei'askeiakmok Abraham aktemakha apaivoma Eniapom Neten apkanemo apkeltemo etiepok apnemakha m'a apkeltemo emhangkok mo'ok iokhalhma. Koka aplhengangkek noka apanke' neksa meihamo iokhalhma m'a. ⁹ Akieplomo mei'askeiam lhnak nanek na m'a apnaiakmo malha amaika'a nkotnakho apkavakha. Apaklhanma lhnak na noka kaselha aiempeiok, apkellomaka lhnak nanek na m'a Isaak kanhan Jacobo apketlhevaiangko lhnak nanek na m'a apeneskamo apaivoma Eniapom Neten ellangkok hata m'a. ¹⁰ Koka apiamavek nak na noka Abraham eloka ta m'a apiav'akha temma apto koka Eniapom Neten apeneskamo aklhenaikama apvalhok, apkelanei'ak koka m'a temma nak takhalhet avhok aliennaktema nkoie'. ¹¹ Mang nak nanek na ei'askeiakmok Abraham aktemakha apeneskamo apaivoma Eniapom Neten eteskesek hata apketka, ka nkeniemai'ak ma'a akvektamo mokhom apiennaktema m'a kakpota etak apketka neksa aptema apvaneiam, kanhan aptava Sara aktema iennaktema naie'. ¹² Niekhe aptema apvaneiam apanke Abraham, nkanketmek nak aknem apketsepmakha m'a, nkaqhok koka apkelvetai'a apentalhnema apketkak neptamen aniem'o mei'askeiam. Mammopvana angelietsetek apketkak ma'a, apentalhnema apankek malha iav'a nak neten kanhan lhepop aktek anak nekha alvata aknangkongvaiam. ¹³ Apsavhommakpavek nak nanek apkeletsepma nelieihengka'a metlhevaiangkok na kaselha apeneskamo lhnak nanek apaivoma Eniapom Neten ellangkok hata m'a. Koka apkeliamavek nak nanoka nkovak hata m'a, malha koka ntemak apkelvetai'a mokhek ankek ma'a. Apketlhenammakpo lhnak nanek na apankavek malha amaika'a aptaikamok nkotnakha apkellavakha takhalhet lhepop anak ma'a. ¹⁴ Hai, have niapak ankek apketlheianmek nak nane mota m'a malha amaika'a ngkanek apkelleliaikama lhnak nane mota apkellavakha apanko'ok apankavek la'a. ¹⁵ Have m'a aptemo lhnak nanek akieto apkelenteiapmakha, lhta akto la apkellavakha apankavek ma'a akietemelha apkelenteiapmakha, eltaqho nlho lhta m'a neptamna'ak. ¹⁶ Koka apkelleltemavek nak nanek elvetak mo'ok apkellavakha akieto m'a neten, ka ngkanek akhaiangka lhnak nanek na apvalhok Eniapom Neten ma'a aptemo apveske apanko'ok, apkelpeneskeskamo nhan lhema apkellavakha m'a. ¹⁷ Mang nak nanek na ei'askeiakmok Abraham lhna nkeniemai'ak apiantamo apketka Isaak kakpota eniaqhe niekhe m'a, eniangkok na Eniapom Neten neksa apiepkonma m'a. Hai, apkeltemavek nak nanek eniangkok apketka lhema aphapak apankek Abraham Eniapom Neten ma'a neksa apiamo lhnak nanek niekhe Abraham Eniapom Neten eniangkok hata kaselha apeneskamo lhnak nanek apaivoma m'a, ¹⁸ ellangkok hata apketkak apkelleniem'o m'a Isaak. ¹⁹ Nkanek apiamavek nak nanek na Abraham akietnema apmopvana Eniapom Neten kakpota elhatekhaskamok mokhom apieseksek apkenmaskengvaiakmo m'a apketka. Ntemengkek nak nanek apvetai'a Abraham apvetekho mokhom apketka malha lhna ntemak aplhatekhangveiam la apieseksek apkenmaskengvaiakmo m'a. ²⁰ Mang nak nanek na ei'askeiakmok Isaak, lhna nkeniemai'ak apkellaiangko apaivoma aktaqmanma Jacob kakpota nhan Esau apkeltemo nkoltaqmelek hata apkellangiemhaikama apmaniaie m'a. ²¹ Mang nak nanek na ei'askeiakmok Jacob, lhna nkeniemai'ak apkellaiangko nhan apaivoma aktaqmanma moklhem'a apketkak ma'a Jose, netamen na piavenkaskesaiangka lhnak nanek na apvesai'a Eniapom Neten akpasmomo nhan apkenenaikamok apkenmekho neten, nkanketmek nak asongke apketsepmakha m'a. ²² Mang nak nanek na ei'askeiakmok Jose m'a, lhnak nane nkeniemai'ak apkelientemongkeskamo aplheianmo elentepok hata israelitas akieto m'a Egipto. Apkellaiangko lhnak nanek na lhema apaivoma apkellanemakha etnangkok apkennemolhema elletsevhok na apelhkapkok ma'a apketsepo la'a, nkanketmek nak asongke apketsepmakha m'a. ²³ Mang nak nanek na nkoliaskeiakmok ngkana'ak Moises ma'a, lhnak nanek na nkeniemai'ak nkolpoksek sekha apteiam atkak aptaqmanma akvakmo apkanet'olhema pelten kakpota mennapek ma'a apkellapaskama apiav'akha apveske, mang nak na noka nkollai'ak ma'a. ²⁴ Mang nak nanek na ei'askeiakmok Moises, ka nkeniemai'ak aptaqnongvekha aptema ngken apiav'akha apveske Faraon apketka neksa apvanekamok ma'a. ²⁵ Apieniekho lhnak nanek na m'a kaselha nkeskama akpaiesekho lhnak nane mota apvalhok ma'a, koka kaselha nak ma'a kolhvavek ankek nkonmaskengvomok, akiantemekho nhan ngkolatsenkolha mota m'a. Apkeliekieskamo lhnak nanek na Moises epalhakvakhak Eniapom Neten apkennemolhema, ennangkok na lhemek akientalhnema kanhan metka ngkolhek altakmelkaso m'a. ²⁶ Aklheianmo lhnak nanek na apvalhok ntasek mankopaihekhe mota apvalhok aniem'o nkeskama kaselha m'a Egipto, ennangkok koka akientalhnema aktemo lhta Cristo aplengaiangko m'a, ngkanek apiamavek nak Moises eniangkok hata akianmoma Eniapom Neten ma'a. ²⁷ Mang nak nanek na ei'askeiakmok Moises ma'a, ka nkeniemai'ak apteiapmo m'a Egipto metka apkai'a elvok apiav'akha apveske. Apiennaktemo nhan ma'a neksa aplhengama aniem'o m'a malha apvetai'a apto mongvetai'o niekhe apasmomo lhnak nanek ma'a. ²⁸ Mei'askeiam na Moises apkelanei'o aktaqmelaikama lhma akvesai'a Pascua, apkeltemo lhnak nanek na ngkolhek alleltelhnangkok ema atno'ok apanko'ok apkakhaiangkolha ko israelitas kakpota menaqtevaksek angel netsepma niapom apketkak apalleiam apmaniaie. ²⁹ Mang nak nanek na eliaskeiakmok ko Israelitas apkeliekai'a alvata iemmen akielhvasema, malha akiemak'elha lhma lhna ntemak ma'a. Apmenlhenaiangko lhnak nanek na kempokhakme ko Egipto, apkelvaiveiangkek nak nanek aniem'o iemmen allapekha. ³⁰ Meliaskeiam lhnak nanek na Israelitas aliaqnanmo aphalhtemommap temma Jerico neksa apkelelꞏhalhiengkaiam ma'a, 7 knem noka ngvaiakmok ma'a apkelelꞏhalhiengkaiam. ³¹ Mang nak nanek na nkoi'askeiakmok ngkelvana alanaktema akteniai'a mota patakkom akvesai'a Rahab, lhnak nane nkeniemai'ak mankomatnek lhemek akpaivomo lhema meleliehekho m'a, akvongkasemmalhko nhan tep ngkanek anmamo lhnak nanek takha aktaqmanma apkellelto nema allapaskama ellanhok lhepop ma'a apkelleniem'o m'a Israelitas. ³² Evanke niekhe altennama mokhom apentelhe pankek koka enenlhet'avok meliaskeiam ma'a, aholhek koka ngkotnek ma'a. Ka aptaiangko lhnak nanek ma'a Gedeon, Barac, Sanson, Jefte, apveske David, Samuel kakpota nhan apkeleltennasemmap ania'a annenga. ³³ Apkelꞏhatsoskasekhe lhnak nanek lhepop apanko'ok po'ok enenlhet ma'a aniem'o meliaskeiam ma'a, apkellanei'o nhan aptaikamok apkelpeivomo. Apkelienlhanmeiangko mota apteniaiangko apiempeiok akvakmo apkelvetangvakmo kaselha aplheianmo lhnak nanek Eniapom Neten ellangkok hata m'a. Apkennaveskamo lhnak nanek na iama kmeiva kakpota mankotavankek ma'a aniem'o lhnak nanek na meliaskeiam ma'a. ³⁴ Aptaiangko lhnak nanek na malha apketsepankeskama talha akiavai'a, apkeniaiangko apkenmahai'a etekio'ok akieplomo pelettav akvenaktema m'a. Neksa meliennaktema lhnak nanek nan ma'a alvektamo apkeliennaktema mokhom aniem'o meliaskeiam, aknaikokho lhnak nanek na apkeliennaktema m'a kakpota ennapakpok ma'a. Apnaqtevasekho lhnak nanek na kempokhakme apkellammelhmakha m'a. ³⁵ Moklhem'a ngkelvana'ak lhnak nanek na nketlhevekhak atkak apkeletsepma m'a apnaklhatekhangveiam aniem'o lhnak nanek na nkoliaskeiam. Moklhem'a lhnak nanek na nnemak aknaqtevaskamo m'a aniem'o meliaskeiam, mang nak nanek na eleltemo niekhe ngkolhek alꞏhatsoskakho m'a ngkanek apkeliamavek niekhe eletsepok hata kakpota enaklhatekhangvomok mokhom elvetangvomok na aktaqmanma apkellangiemhaikama m'a, mankolhno hengke'e nalhepop anak. ³⁶ Moklhem'a lhnak nanek na nema altekpoiangka, nema alvannaikama lhnak nahan, nema aknaktetema cadena, nemo nhan apnaktamo nengaqlhengkasemmalhkelha m'a aniem'o meliaskeiam. ³⁷ Moklhem'a lhnak nanek na aptekiomak ma'a aniem'o nema aliaqnai'a metaimong, nemo nhan aliaqtemanmo neplhet'a akieplomo nhan iama annamo tkok serrucho, annapmo nhan pelettav akvenaktema. Po'ok nak na noka apkenmaiangko mota mo'ok amota iokhalhma, apkelentalhnema lhnak na noka vanlha nepkesek apiempeiok kanhan ieta'ai aniem'o metka apkelletsekama, kanhan apkellengaiangko akientalhnema, apnaqtevasemmap nahan. ³⁸ Apkenmaiangkek nak nanek na apankavek metka apkeliamo apkenmangkelha la'a akieto m'a iokhalhma metkelha temma, nalhma, apkelentalhnengvaiakmo nhan malhek akiavai'a, metaimong alhva nhan ma'a, mang nak nane nkolietemo apkelpalhkaiangka enenlhet'avok meliamolhma m'a. ³⁹ Apketlheianmek nak nanek na Eniapom Neten apkellelto apkeliamolhma m'a enenlhet'avok lhnak nanek aniem'o nhan meliaskeiam. Koka metlhevaiangkok ma'a apeneskamo lhnak nanek apaivoma Eniapom Neten ellangkok hata m'a, ⁴⁰ ngkanek nietnengkek nak nanek ma'a lhema aklheianma apvalhok elanak hata m'a. Aplheianmo lhnak nanek na apvalhok elailhek sekhe kakpota eltemeskesek apkeliamolhma apankavek m'a nelpasmekha ennengko'o lha.