¹ Ley anak Moises iama aktaqmanma m'a, mangkolhnok kaselhaaltaqmelo aplheianmo lhnak nanek Eniapom Neten hengellangkok hata. Koka ley anak ma'a akvesai'a alietkesammalhka, ka ngkanek mankavankek nkotneskesangkok apkeliamolhma apankavek apkellelto nak apkenmeiekha mota lhamakho iantelhkapa apkellangkongvekha mota kaselha apnaqtoskama apkennapekamok Eniapom Neten ma'a. ² Lhta avanko la niekhe ley nkalhnasekhak apvalho'ok enenlhet'avok malha alpaiseiam aniem'o apkellanekamok ngkollatsekama, nkomaskeskamo nlho lhta nhan atlhenaikama apvalho'ok apkellelto apketselhnanemmap, elvatesangkok na apkellaikamok apnaqtoskama apkennapekamok Eniapom Neten. ³ Koka nheklhe mota atlhenaikama apvalho'ok ma'a apkellanekamok ngkollatsekama ka ngkanek apkenmeiekho mota lhamakho anio kakpota ellangkongvakhak apnaqtoskama apkennapekamok Eniapom Neten. ⁴ Ngkanek ema apanko'ok anak toros kanhan ieta'ai apkelennava'ak mankollavankek nkolꞏhatsoskasangkok ngkollatsekama malha apkelpatmekama enenlhet'avok. ⁵ Ka ngkanek Cristo aptemo lhta mota aplheianma neksa apvai'a lhta hengke'e nalhepop anak, lhta aptemak: «Meltemok lheiap ellangkok apnaqtoskama apkennapekamok enenlhet kanhan kaselha nengaikamok anak, vanlha koka apkeltemo allangkok asiokha nak. ⁶ Mankoleklemok na apvalhok lheiap nengaikamok kaselha nelvanlhema nak kanhan kaselha nak nengaikamok akiaqmoiekha nellanekamok ngkollatsekama. ⁷ Ka ngkanek stemo nak ko'o hengke'e: Eniapom Neten, asvak ko'o hengke'e asmahai'a alanak apkeltemakha alanak lheiap, ka aktemo nak na aktalhesammalhka Vakkahak helheianma ko'o», lhna aptemak. ⁸ Lhnak na aptemak mokhom ma'a mankoleklemo apvalhok Eniapom Neten apkellaiangko m'a kaselha nengaikamok anak, kanhan apnaqtoskama apkennapekamok, kakpota nhan kaselha nelvanlhema akiaqmoiekha apkellanekamok ngkollatsekama, koka ley anak nkeltemave mota m'a. ⁹ Lhnak na aptemak hengke'e: «Asva'ak ko'o hengke'e kakpota alanak apkeltemakha alanak lheiap», lhna aptemak. Apmaskeskangkek na apkellaikamo mota apnaqtoskama m'a, apekkanvekho alhnankok nema akmeskama Eniapom Neten ma'a. ¹⁰ Hai, apmahai'a etnek hengelpokkanma Eniapom Neten kakpota antangkok apkennemolhema m'a aniem'o Jesucristo apkaiangko lhta apankek apiokha kakpota ematong lhema aktema koka m'a. ¹¹ Have aptaiangkolha nak sacerdotes lhamakho aknem apkellangkongvekha mota apnaqtoskama apkennapekamok Eniapom Neten, koka mankavanke kolꞏhatsoskasangkok ngkollatsekama malha apkelpatmekama enenlhet'avok. ¹² Cristo koka apkaiangko panke apiokhoho lhema aktema koka kakpota ematong ma'a, malha kaselha nengaikamok anak kakpota elꞏhatsoskasangkok na ngkollatsekama malha apkelpatmekama m'a enenlhet'avok lhmankek ham. Netamen apnekho nhan ma'a akieto akiennakha apoktong Eniapom Neten, ¹³ apkelelhvekho nhan ma'a akvakmo ta apkakheskeskaktamo ta koneng apmangkok Eniapom Neten apkellammelhmakha la m'a. ¹⁴ Vanlha lhta lhema kaselha nengaikamok anak Eniapom Neten altemeskeskamo apkeliamolhma apankavek metka nnelha apkellelto la apkelpokkenammap kakpota nkoltemeskesangkok na Eniapom Neten apkennemolhema. ¹⁵ Lhnak na aptemak Espiritu Santo hengke'e: ¹⁶ «Lhta aptak apveske, netamen aknem anak ma'a alanak hata lhema annemo mo'ok engvalho'ok nemmahai'akha antangkok ko'o kanhan enenlhet'avok, anengkenek hata apvalho'ok ley ehenkok kanhan alietnaikama apaqto'ok ¹⁷ Mankolheianvakhek hata evalhok meleliehekho askellaskamakha kanhan kaselha ngkollatsekama apkellanekamok», lhna aptemak ma'a. ¹⁸ Aptemeskesaikama lhta apankek mangeleliehekho ennengko'o hengaskamakha Eniapom Neten, mankaimelhkak mokhom angellanangkok kaselha nengaikamok akiaqmoiekha la m'a. ¹⁹ Ketlhengkap elialheng'a, kolhva koka envanka'ak angelentalhnengvomok metka nellai'a akieto av'alhok pa'at akpokkenammalhka nkoie' aniem'o m'a ema apankok Jesus. ²⁰ Apmatnangke lhta nhan ma'a, ka apmaihekho lhta aphalhtemommap ietamopai'a m'a aktaiekho alhnankok amai akmaiangko akiennaktemakha enneniek. ²¹ Kolhva nhan apnek apveske sacerdote engankok aptemo nhan apveske m'a Eniapom Neten apnemakha. ²² Ntasek angelteteskakhok Eniapom Neten engvalhok iokhalhmek ankek, mongeliaskamek nahan akiokho nkoie' ngkanek malha alalhnai'o engelvalho'ok, alalhnai'o nhan eniempeiok aniem'o m'a iemmen aktaqmanma nkoie. ²³ Angetlhengkesek hata netlhenaikama aktemakha mongeliaskeiam anak kanhan alelꞏhalhnekama engelvalho'ok hengelpasmok hata Eniapom Neten, mongeliaskamek na apaivoma akto have niapak ankek ma'a. Metka alpeivekha atlhenaikama engvalho'ok ennengko'o ngkanek apeneskangke lhta apaivoma Eniapom Neten, have apmopvana ania'a. ²⁴ Angeliatalhkak nelasekhammalhko kakpota angellanangkok kaselha altaqmelo. ²⁵ Mongelvatesankek na nengaqnekha neltaqneskasekamok anak Eniapom Neten, angeliatekhok na emmo'ok ngkanek ketse nkaimelhkak akvai'a ta aknem. ²⁶ Mangkolatsema anlhengkesek mangeleliehekho hengaskamakha Eniapom Neten ngkanek nengeliangvakme lhta akto have niapak ankek ma'a. Ka nellanengko la m'a ngkollatsekama, aqhemo ngkotnek nengaqhema nak nentoskama nengaikamok akiaqmoiekha la m'a. ²⁷ Vanlha koka ngkotnek nelelꞏhalhanma akiavai'a nengai'a akvakmo ta aknem apkeliekpelkemelha nentaiangkolha Eniapom Neten, nkonaqtevaksek hata talha apkellelto nak apkellammelhmakha m'a. ²⁸ Apto la enenlhet apiekai'a ley Moises, etlhenek na apkanet nlho ka la nhan apkanet'olhema apkelvetaiangko m'a, ematnekhak hata m'a metka nema akietnai'a napa'at. ²⁹ Tep ankek hata ngkotnek akietemo nkek nema akiaqmongkasekha aptemakha enenlhet apto la aptaqnongkoma Espiritu hengamelaiam aniapom, apto la nhan apvannaikama Eniapom Neten apketka, aptaqnongkoma nhan ema apanko lhta apiangkenammalhka kakpota nkotneskesek apokkenammap ma'a. Ka ema apanko lhta akiangkenammalhka kakpota ngkovomok ma'a annemo mo'ok apvalho'ok apkenmahai'akha ta etnangkok ma'a Eniapom Neten kanhan enenlhet'avok ³⁰ Neliavek ennengko'o aptemo lhnak na nek apaivoma Eniapom Neten hengke'e «Aiaqmongkasekhak hata ko'o apkeltemakha apkellanekamok ngkollatsekama, have niapak ankek ma'a». Lhnak nanek na nnemak aktemo hengke'e: «Eliekpelkok hata apveske apkeltemakha apkennemolhema apanke», lhna nnema aktemo m'a. ³¹ ¡Aii, nientelhek anke ta ngkotnek apiaqmongkasekha apkeltemakha Eniapom Neten apto metnenvaiam annelha! ³² Koka kotlheianvakho ta mota apvalho'ok ketlhengkap apketlhevaiangko lhta malha apommatema aniem'o m'a ania'a aktaqmanma. Apkellengaiangko lhta nhan akientalhnema aniem'o apkellammelhmakha, ³³ apkeltaknommakpe lhta nhan, apnaqtevasemmakpe lhta napaqtavek enenlhet'avok, koka nheklhe lhta mota apkelpasmoma ketlhengkap apkellengaiangko la akientalhnema malha aktaiangko lhta nhan ketlhengkap ma'a. ³⁴ Apkelietnai'ave lhta nhan napaqta'a aplhatmommap la'a, nkelpaihekhe lhta nhan apvalho'ok neksa nemo alꞏhatsoskeskama kaselha apanko'ok ngkanek apkeliavek ketlhengkap nnaiangkek kaselha apanko'o metka akmaskengvaiam ma'a neten ³⁵ Ntasek etlhengkesek meliaskeiam Eniapom Neten, netamen hata m'a etlhevangkok akiavai'a akianmoma m'a. ³⁶ Elelꞏhalhen hata metka apkelpekheskama ellanangko mota nhan apkellanemakha etnangkok Eniapom Neten, netamen etlhevangkok hata kaselha apeneskamo lhta aplheianma ellangkok hata m'a. ³⁷ Ka ntemak na aklheianma Vakkahak Eniapom Neten apaivoma hengke'e: «Ketse nkaimelhkak apvektanlha aplhenammap evatak hata m'a, mankovanka nkek hata aknem ma'a ³⁸ Enenlhet apto la apeivomo eloka ta mota aniem'o mei'askeiam, mankolkek hato ka m'a evalhok aptaqho la neptamen», ntemak ma'a. ³⁹ Ennengko'o koka manlhok ma'a enenlhet'avok anak apkeleltaqhemo neptamna'ak, apketlhenengvaiam anak ma'a. Ennengko'o koka nengelelto malha apkellelto nak apkelvonkasemmap tep aniem'o mongeliaskeiam