Capítulo 10
1
Ley anak Moises iama aktaqmanma m'a, mangkolhnok kaselhaaltaqmelo aplheianmo lhnak nanek Eniapom Neten hengellangkok hata. Koka ley anak ma'a akvesai'a alietkesammalhka, ka ngkanek mankavankek nkotneskesangkok apkeliamolhma apankavek apkellelto nak apkenmeiekha mota lhamakho iantelhkapa apkellangkongvekha mota kaselha apnaqtoskama apkennapekamok Eniapom Neten ma'a.
2
Lhta avanko la niekhe ley nkalhnasekhak apvalho'ok enenlhet'avok malha alpaiseiam aniem'o apkellanekamok
ngkollatsekama, nkomaskeskamo nlho lhta nhan atlhenaikama apvalho'ok
apkellelto apketselhnanemmap, elvatesangkok na apkellaikamok apnaqtoskama apkennapekamok Eniapom Neten.
3
Koka nheklhe mota atlhenaikama apvalho'ok ma'a apkellanekamok ngkollatsekama ka ngkanek apkenmeiekho mota lhamakho
anio kakpota ellangkongvakhak apnaqtoskama apkennapekamok Eniapom
Neten.
4
Ngkanek ema apanko'ok anak toros kanhan ieta'ai apkelennava'ak
mankollavankek nkolꞏhatsoskasangkok ngkollatsekama malha apkelpatmekama
enenlhet'avok.
5
Ka ngkanek Cristo aptemo lhta mota aplheianma neksa apvai'a lhta hengke'e
nalhepop anak, lhta aptemak:
«Meltemok lheiap ellangkok apnaqtoskama apkennapekamok enenlhet kanhan
kaselha nengaikamok anak, vanlha koka apkeltemo allangkok asiokha nak.
6
Mankoleklemok na apvalhok lheiap nengaikamok kaselha nelvanlhema nak
kanhan kaselha nak nengaikamok akiaqmoiekha nellanekamok ngkollatsekama.
7
Ka ngkanek stemo nak ko'o hengke'e: Eniapom Neten, asvak ko'o hengke'e asmahai'a alanak apkeltemakha alanak lheiap, ka aktemo nak na aktalhesammalhka Vakkahak helheianma ko'o», lhna aptemak.
8
Lhnak na aptemak mokhom ma'a mankoleklemo apvalhok Eniapom
Neten apkellaiangko m'a kaselha nengaikamok anak, kanhan apnaqtoskama
apkennapekamok, kakpota nhan kaselha nelvanlhema akiaqmoiekha
apkellanekamok ngkollatsekama, koka ley anak nkeltemave mota m'a.
9
Lhnak na
aptemak hengke'e: «Asva'ak ko'o hengke'e kakpota alanak apkeltemakha alanak
lheiap», lhna aptemak.
Apmaskeskangkek na apkellaikamo mota apnaqtoskama m'a, apekkanvekho
alhnankok nema akmeskama Eniapom Neten ma'a.
10
Hai, apmahai'a etnek
hengelpokkanma Eniapom Neten kakpota antangkok apkennemolhema m'a
aniem'o Jesucristo apkaiangko lhta apankek apiokha kakpota ematong lhema
aktema koka m'a.
11
Have aptaiangkolha nak sacerdotes lhamakho aknem apkellangkongvekha mota apnaqtoskama apkennapekamok Eniapom Neten, koka mankavanke kolꞏhatsoskasangkok ngkollatsekama malha apkelpatmekama enenlhet'avok.
12
Cristo koka apkaiangko panke apiokhoho lhema aktema koka kakpota ematong ma'a, malha kaselha nengaikamok anak kakpota
elꞏhatsoskasangkok na ngkollatsekama malha apkelpatmekama m'a enenlhet'avok
lhmankek ham. Netamen apnekho nhan ma'a akieto akiennakha apoktong
Eniapom Neten,
13
apkelelhvekho nhan ma'a akvakmo ta apkakheskeskaktamo
ta koneng apmangkok Eniapom Neten apkellammelhmakha la m'a.
14
Vanlha
lhta lhema kaselha nengaikamok anak Eniapom Neten altemeskeskamo apkeliamolhma apankavek metka nnelha apkellelto la apkelpokkenammap
kakpota nkoltemeskesangkok na Eniapom Neten apkennemolhema.
15
Lhnak na aptemak Espiritu Santo hengke'e:
16
«Lhta aptak apveske, netamen aknem anak ma'a alanak hata lhema annemo mo'ok engvalho'ok nemmahai'akha antangkok ko'o kanhan enenlhet'avok, anengkenek hata apvalho'ok ley ehenkok kanhan alietnaikama apaqto'ok
17
Mankolheianvakhek hata evalhok meleliehekho askellaskamakha kanhan kaselha ngkollatsekama apkellanekamok», lhna aptemak ma'a.
18
Aptemeskesaikama lhta apankek mangeleliehekho ennengko'o hengaskamakha Eniapom Neten, mankaimelhkak mokhom angellanangkok kaselha nengaikamok
akiaqmoiekha la m'a.
19
Ketlhengkap elialheng'a, kolhva koka envanka'ak angelentalhnengvomok
metka nellai'a akieto av'alhok pa'at akpokkenammalhka nkoie' aniem'o m'a
ema apankok Jesus.
20
Apmatnangke lhta nhan ma'a, ka apmaihekho lhta
aphalhtemommap ietamopai'a m'a aktaiekho alhnankok amai akmaiangko
akiennaktemakha enneniek.
21
Kolhva nhan apnek apveske sacerdote engankok
aptemo nhan apveske m'a Eniapom Neten apnemakha.
22
Ntasek angelteteskakhok
Eniapom Neten engvalhok iokhalhmek ankek, mongeliaskamek nahan akiokho
nkoie' ngkanek malha alalhnai'o engelvalho'ok, alalhnai'o nhan eniempeiok
aniem'o m'a iemmen aktaqmanma nkoie.
23
Angetlhengkesek hata netlhenaikama
aktemakha mongeliaskeiam anak kanhan alelꞏhalhnekama engelvalho'ok
hengelpasmok hata Eniapom Neten, mongeliaskamek na apaivoma akto have
niapak ankek ma'a. Metka alpeivekha atlhenaikama engvalho'ok ennengko'o
ngkanek apeneskangke lhta apaivoma Eniapom Neten, have apmopvana ania'a.
24
Angeliatalhkak nelasekhammalhko kakpota angellanangkok kaselha altaqmelo.
25
Mongelvatesankek na nengaqnekha neltaqneskasekamok anak Eniapom Neten,
angeliatekhok na emmo'ok ngkanek ketse nkaimelhkak akvai'a ta aknem.
26
Mangkolatsema anlhengkesek mangeleliehekho hengaskamakha Eniapom
Neten ngkanek nengeliangvakme lhta akto have niapak ankek ma'a. Ka
nellanengko la m'a ngkollatsekama, aqhemo ngkotnek nengaqhema nak
nentoskama nengaikamok akiaqmoiekha la m'a.
27
Vanlha koka ngkotnek
nelelꞏhalhanma akiavai'a nengai'a akvakmo ta aknem apkeliekpelkemelha
nentaiangkolha Eniapom Neten, nkonaqtevaksek hata talha apkellelto nak
apkellammelhmakha m'a.
28
Apto la enenlhet apiekai'a ley Moises, etlhenek na
apkanet nlho ka la nhan apkanet'olhema apkelvetaiangko m'a, ematnekhak hata
m'a metka nema akietnai'a napa'at.
29
Tep ankek hata ngkotnek akietemo nkek
nema akiaqmongkasekha aptemakha enenlhet apto la aptaqnongkoma Espiritu
hengamelaiam aniapom, apto la nhan apvannaikama Eniapom Neten apketka,
aptaqnongkoma nhan ema apanko lhta apiangkenammalhka kakpota nkotneskesek
apokkenammap ma'a. Ka ema apanko lhta akiangkenammalhka kakpota
ngkovomok ma'a annemo mo'ok apvalho'ok apkenmahai'akha ta etnangkok ma'a
Eniapom Neten kanhan enenlhet'avok
30
Neliavek ennengko'o aptemo lhnak na nek apaivoma Eniapom Neten hengke'e «Aiaqmongkasekhak hata ko'o apkeltemakha apkellanekamok ngkollatsekama,
have niapak ankek ma'a».
Lhnak nanek na nnemak aktemo hengke'e:
«Eliekpelkok hata apveske apkeltemakha apkennemolhema apanke», lhna nnema
aktemo m'a.
31
¡Aii, nientelhek anke ta ngkotnek apiaqmongkasekha apkeltemakha Eniapom
Neten apto metnenvaiam annelha!
32
Koka kotlheianvakho ta mota apvalho'ok ketlhengkap apketlhevaiangko lhta
malha apommatema aniem'o m'a ania'a aktaqmanma. Apkellengaiangko lhta
nhan akientalhnema aniem'o apkellammelhmakha,
33
apkeltaknommakpe lhta nhan,
apnaqtevasemmakpe lhta napaqtavek enenlhet'avok, koka nheklhe lhta mota
apkelpasmoma ketlhengkap apkellengaiangko la akientalhnema malha aktaiangko
lhta nhan ketlhengkap ma'a.
34
Apkelietnai'ave lhta nhan napaqta'a aplhatmommap
la'a, nkelpaihekhe lhta nhan apvalho'ok neksa nemo alꞏhatsoskeskama kaselha
apanko'ok ngkanek apkeliavek ketlhengkap nnaiangkek kaselha apanko'o metka
akmaskengvaiam ma'a neten
35
Ntasek etlhengkesek meliaskeiam Eniapom Neten,
netamen hata m'a etlhevangkok akiavai'a akianmoma m'a.
36
Elelꞏhalhen hata metka
apkelpekheskama ellanangko mota nhan apkellanemakha etnangkok Eniapom
Neten, netamen etlhevangkok hata kaselha apeneskamo lhta aplheianma ellangkok
hata m'a.
37
Ka ntemak na aklheianma Vakkahak Eniapom Neten apaivoma
hengke'e:
«Ketse nkaimelhkak apvektanlha aplhenammap evatak hata m'a, mankovanka nkek
hata aknem ma'a
38
Enenlhet apto la apeivomo eloka ta mota aniem'o mei'askeiam,
mankolkek hato ka m'a evalhok aptaqho la neptamen», ntemak ma'a.
39
Ennengko'o koka manlhok ma'a enenlhet'avok anak apkeleltaqhemo
neptamna'ak, apketlhenengvaiam anak ma'a. Ennengko'o koka nengelelto malha
apkellelto nak apkelvonkasemmap tep aniem'o mongeliaskeiam