Capítulo 16
Pataccom nema allapasquescama Jesucristo apquennemolhema
1
Coca colhuawe nac asmac'ac aleltennasancoc actemacja pataccom na lhta apquellanquesaicocja jam cacpota elapasquesec Jesucristo apquennemolhem'a m'a aquieto Jerusalen, ntasec etnancoc astacja lhta asqueleltennasecama apquellanquesacjo lhta ellanconwomoc Jesucristo apquennemolhema aquieto m'a Galacia.
2
Lhamacjo domingo ta eltacmelquescasancoc necja atcoc pataccom aquianmoma la apquenmacmecama cacpota mancaimalhquec ellanquesocjac asuacjo ta co jam.
3
Eliequiesamo ta apancawec na quetlhencap enenlhet apiesecsec anac jam cacpota etsacjac ma'a aquieto Jerusalen pataccom jata apquellanquesaicocja.
4
Ascaimelhco la co'o asqueleltema la asquetlhelhma'ac, co'o ta njan aniacjac ma'a,
5
coca amanie secjec jata aniacjac ma'a iocjalhma Macedonia, netamen jata awatac jam Corinto.
6
Alhec jatelha apiesecsec quetlhencap acuacmo apsaujecpo ta ieiam apualhoc, quetlhencap jato ca njan ncolleniemac apancawec jelpasmoma cacpota alhong mocjom mo'oc iocjalhma
7
Momac'ac atnec co'o iacuatacjo la astaicama amaica'a jam, ntasec alhec iama acuenactema jam apquelto la njan Engiapom Neten.
8
Asnec coca co'o colhuawe nac jenque'e aquieto Efeso acuacmo ta acnem ancoc actacmelaicama lhma Pentecostes,
9
mantec na enenlhet apquenmajai'a ellailhoc asqueltennaicama ania'a actacmanma jenque'e, coca apcacjanquec
na jelammelhaicama jenque'e.
10
Jata apuactamo la Timoteo jam, eltacmelcaso ta apquelanei'o cacpota ncoleccasama apualhoc ma'a, ncanec apto asmacmecama lheme Apuesque engancoc ma'a
11
Meltemesquesentanquec na coneng necsa aptaicama amaica jam, elpasem jato ca aimelhquelha la m'a cacpota elhiemoc metca acmasca jenque'e asnacja nac, asquelailhec co'o cacpota njan engellialheng'a jenque'e.
12
Awanje lhta asiatecamoc Apolos asqueltemo enmeiacjac lhemec napocja engelialheng'a m'a, coca mengiecjac ma'a, engiacjac jatoca metco la apquellanelha.
13
Eleljalhnamoc jata, eliennactes jata njan meliasqueiam anac, etnamoc jata njan apmacmosac'a, etengiamoc jata njan apiempeioc necsa apquellaniemjaicama,
14
etnamoc jata njan apquellamelaiacmo po'oc.
15
Apquelliawec quetlhencap apquetcac anac Estefanas aquieto Acaya, aptanco lhta apmaniaie apancawec apquenmaicamoc tacja ania'a actacmanma, colhua coca mocjom apquetlhencasquec aptaicamoc apquellasennaicama Jesucristo apquennemolhema m'a.
16
Ellajo ta m'a, ellajo ta njan aplhamacjo apquetlhelhma'ac ma'a necsa apquenmacmecama jam.
17
Awanje lhta co acpaijecja ewalhoc apqueluactamo lhta jenque'e acno nac Estefanas, Fortunato cacpota njan Acacio, apquelpaiescaje lhta ewalhoc ncanec aiose lhta ntema ewalhoc aniem'o moluetai'a quetlhencap,
18
malha lhta nja ntemac apnaclhatecjasquecta ewalhoc ca aptaiancolha lhta njan apquellanei'o quetlhencap jam. Ellajo ta quetlhencap jam.
19
Apquellapasquec atlheianma apualho'oc engelialheng'a apcacjanco nac jengque'e iocjalhma Asia nac, apquellapasquec na atlheianma apualho'oc Aquila cacpota njan aptawa' Pricila, apquellapasquec na atlheianma apualho'oc aquieplomo apuesai'a Apuesque engancoc aplhamacjo engelialheng'a apcacnecja na mota acjaiancolha ncawe nac ja'e.
20
Ca njan apquellapasac atlheianma apualho'oc quetlhencap aplhamacjo nac jenque'e engelialheng'a, quetlhencap jata njan elpaiwesacpoc jam aquieplomo apquelpetsesammap apmalhempen'oc apquelialheng'a
21
Co'o njan smac'ac ncolhenec ewalhoc quetlhencap jam, astalhescama ejenquec coca.
22
Apno la enenlhet mengiamelaiam la Apuesque engancoc, elentepques jata m'a. ¡Apquelhiacmec apuesque engancoc!
23
Asqueltawec co'o Apuesque engancoc ellamelemma' canjan etnanco mota apquetlhelhma quetlhencap,
24
co'o njan awanje asquellamelaiam quetlhencap aniem'o Cristo Jesus