¹ Yata neri nali cali nia Manasés itaquenai caina ya idaberi irrica yai José ina caica, iwali Maquir, caica ya idabaneri irri yae Manasés. Caicata icacanawa yai yanirii quei Galaad. Nia itaquenaina yai Maquir yaca nali cali yasu yai Galaad y Basán, ya cainá Maquir aberi asiali ipeliari. ² Ya calii nacaté nali nia nenaca nia weneica iwitaná Manasés irri nericate nali nia aberi weneica iwitaná, Abiezer, Helec, Asriel, Siquem, Hefer y Semida. Niacataté itaquenainami ya asiali Manasés, irri ya José, yasaida caina iyuwate namanuca. ³ Nese, Zelofead, irri ya Hefer, irri ya Galaad, irri yai Maquir, irri yai Manasés, camita ideniaté yenibe asianaiwa ideniate niawamita yenibena inanai. Yate naipidenaca nia yenibe inanai caicani Malaa, Noa, Hogla, Milka aiba Tirsa. ⁴ Niae namawienidawa Eleazar ya icuerica Dios icape iricu, Josué irri quei Nun, ina ya naimaca nali niae icuyeica nia: "yae Waiwacali ichulia Moisés yacanali aberi cali caicata nacai napicha niae wenanai". Namanica caide iyuwa Waiwacali imana, ya yaca nali niae inanai aberi nasu caweniri caicata nacai napicha yenanai yae naniri. ⁵ Diez (10) nawacuada pinaca calii yena nalii nericaté Manasés Galaad Basán iri nacai, cairicate iyaca alede abemale icha yae Jordán, ⁶ Caicatá yenibe yae Manasés nedaca aberi yena nasu caweniri caicatá nacai napicha niae yenibeca. Ya calii Galaad yasu yaca nali nia imaqueyicawa nena icha niae Manasés itaquenainá. ⁷ Manasés idawinaidaca yasu calii sisade Aser nese ale inumamide Micmetad, nere Siquem nere erii imusuataisecawa. Nese calii inumani iyaca alede nali niae iyeyica mawianita iri yae depowale Tapúa. ⁸ Yai calii Tapúa yacata yasute yae Manasés, quewa yae iyacalenaquei Tapúa iyerica alede cali inumami yasu Manasés, yacataté nasu niae Efraím itaquenainami. ⁹ Calii inumani yacata isecawa uni achumeri Caná nese. Yade yacalé manuinameri iyerica depowale icha yae achumeri uni iyeri bamichuami iyacale yai Manasés nasucate niae Efraín. Manasés yasu calii inumani yatate iya alede iwaliba bapiuwale uni achumeri imalacataicawa Lamaa nere. ¹⁰ Yae calii depowalé nasuacate niae Efraín, ya nacai calii siserica bapiowalé Manasés; yataté calii inumani yae lamaa. Alede yemale bapuiwalé, Aser yewata yana iwalí alede erri imosuataisecawa, Isacar. ¹¹ Caita Isacar Aser nacai, Manasés yataté yasunacai yae Bet Seán iyacale achumerina, Ibleam iyacalee nia iyeyeica Dor aiba yae yacalee achumerina, nia iyacalena Endor nia iyeyica Tanaac ryacalee achumerina, nia aibanai iyeiyica Meguido chae iyacalena achumeri iricu ina yaca maisabana yacalee manuiri yae Náfet. ¹² Quewa nia itaquenaina yae Manasés camitaté nadenia iwali wawasi yae yacalé manuiri, niaquinae cananeo nayacainataté mamacalata nenita calii inata. ¹³ Caicata nacai niae weneica neseyeica cachainicate nai cacawa, nachuliacate nia cananeo naibaidaca chainisiri iyu, camita quewa naucata macaita nese nia. ¹⁴ Nese, naimaca niae itaquenaina yae José iri yae Josué caica naimaca: ¿Caná yewa pia wali yatameda calii achumerina yena yae imaqueri pinacawa piami iricuba ewita manubaca wia, quewa macaita yapichá yae Waiwacali imanica wali cayaberi? ¹⁵ Josué imaca nali; quewacue pia yacale manuiri manubeiyi, piacuewa piata ale analimale yacue pichuniaca neniba yai calii piawatacuewa naicha niae ferezeos ya nacai aiba nasu niae refaías. Pimanicue yae, yacaina piri pinacue. ¹⁶ Naimaca niae José itaquenaimi: "Yae calii yemalewa camita ide nenica imanuica wali pina. Quewa macaita niae cananeos iyeyeica alede maisawalire yacale icha nade niaca. Carros napeliari inata siaru iyuiri, niata nacai iyeica iricu yae iyacalenaquei Bet Seán, caita nacai niade iyeyeica alede abederi calii Jezreel". ¹⁷ Nese Josué imaca nali nia iyeyeica José icape iricu, iri aiba Efraín Manasés aiba: "Piaca aberi yacále manuiri pideniacue chainisi. Pia camita yewa pidenia aberita yena yae calii nericaté piri. ¹⁸ Cali yema lewa analimeri piasu pinata nacai. Ewita quewa analimacani iwacutacue pimaca maisawacani yewacatenacue pidenia yasu wawasi imanuicataitacue piasucani ewita deculecani. Pimusuada pinacue nese niae cananeos, ewita nadeniaca nasu carru napeliarica iricuise sieru iyuiri. Ewita quewa cachainiyeica nia.