¹ 1Njite Booz iá iofaawa yacaalre ipananoma icodapi. Cayo cadana, jliaji nakitsinda tairri Booz icaiterri inaco itsomitani. Booz iaco lrisho: ''Pjia nokitsindaji, pino piofaa nocodapi.'' Jiali atsia itsoomitani njite lriofá lricodapi. ² Njite Booz iinai Die caaconaperri yacaalre ricope njite lriaco nasho: ''A ino iofaawaji.'' Njite naofaa niini. ³ Njite Booz iaco lrisho jliaji lrikitsindaji: ''Shoaji Noemí, shoaji idiacadawa Moab jiipaite ricjoite, rowendeca jlipaitem jliaji wakitsin Elimelec. ⁴ Nowaopia nocaite carro pjia lrinaco: ''Piwentani nacapá werrico njaji iofacapeo anji njite nacapá werrico tsacja njaji caconaaperri noyacalre ricope. Pioma cadaa pidietaca pishowaono, pidietano. Mitsa corri cadaa pioma pidietacano, picaite njomi noanjíi carro, ima corri pacapa pada noanjínda itaita cada idietacano icaamitsa pjia, njite pinacojledaca njoa.'' Njite jliaji aape iaco Booz isho: ''Njoaotsa idieta noshowaoni.'' ⁵ Njite Booz iaco lrisho: ''Coancaojli cadaotsa piwenta Noemí ioya jliaji jiipai, pisho tsacja pjitaca piinoa Sho Rut Moab darro, lriinom jliaji Elimelec irrim cuirri, pishó carro pienipe roapiya itaitacada ishoca jliaji jiipai lrishowao lriipitana naco jliaji mayamdalrim.'' ⁶ Njite jliaji nakitsinda iaco Booz isho: ''Corri notaita nodietaca noshowaono, corri nooma nomatsicaca jliaji noshonda noenipe isho. Pjia watsa nocadaa isho jliaji noshowalrepe piatja pjia carroatsa idieta pishowaono, ima njoa corrinatsa notaita nodietacano noshowao.'' ⁷ Njite cayo pia oopi njaji Iraelitanai nadieta cádanaco nashowao cocacatsa o naacadanaco nashowaaca inaaniti. Njite nataita shopa nanjiica jliepacatsa jli iacoti jli pada lrishotsa jlitaca lrioyao Iri tsapaton lriá carro lrisho jliaji inaitjacada iacoti Iriapiya; Cayomitsa nanaitja pia talricanaati ipeyajle oopi Irael ricó. ⁸ Njite jliaji nakitsinda tsoomidalritsa naoya iaco Booz isho: ''Washa piwenta pishowaono.'' Icamina jlita lritsapaton lriá carro Booz ishó. ⁹ Njite Booz iaco nasho njaji caconaaperri pekipenai njite nasho njaji inaiki pjiomi ninperri: "icapawerrico pjiomi jliadaa jecoapica jliaji njoa iwenta pjiomi jlipaitem njite nja lrishompe pia jli Elimelec, pjiomi Quelión njite Mahlón iyapempia tsacja Noemí icaapi ricjoite. ¹⁰ Njite ronaco sho Rut Moab njité darro, Mahlón cuirri iinom. Njoa watsa jitano noinowano, njite jliaji noenipe nosholriotsa roinai, jlia watsa ianjíi lrinaco jliaji jiipai lriyadam jliaji atsia mayamdalrim, nawaada carrotsan njaji lrikitsiñape njite pjiomi njaji inaiki lri ricóda yacaalreca jliaji. Icatsa jia icapalrica coanca wamatsietaca iacoti jliadaa jecoapica jliaji.'' ¹¹ Njite pjiomi njaji inaiki yacaalre ipananoma ricope njite njaji caconaaperri pekipenai naaco: ''Fa ianjíi coanca inaitjaca. Wa Minalri watsa inaitja rsoaji iinarro jiewalri piipana lrico cayoji Raque njite Lea sho, neenipe nanacjoite njaji yaamamade namaimataacawa Irael iipaneta. Njite matsia watsa pjia Efrata ricó njite nanjinda caotsa pjia pjiomi Belén ricó. ¹² Wa Minalri icadaotsa jorre pienipe roapiya rsoaji iempeti cayoji lrisho capisho pia jli Fares, Tamar ienipe Judá iapiya. ¹³ Ikena Booz ideeca rso Rut, cayopia jlitaca Irinoano. Nadakitaca ipoam, Dio icadaa kewedancano, njite romotoeta pada iempeti. ¹⁴ Njaji inaitjepe naaco Noemí isho: ''Waa matsiadalri wa Minalri isho, ima lricadaa pisho pada pidakeerri iwapacaoda pjia. Naanjíi watsa lriipitana pjiomi njajii inaiki Irael rico lriicjaote jliaji lrinaitalri. ¹⁵ Lricadaa tsenacjaotsa cjaidaca pjia, jlia watsa ikitsindata pjia pekirro kenaotsa pjia, ima rsoaji pirriinomi, rsoaji ipeyocada pjia, rsoaji matsiadarro pja siete cadamtja pienipe, oopina romotoeta jli iempeti.'' ¹⁶ Niini Noemí jipa jirreta jli kirraitalri roteda naco, rowapá carroni. ¹⁷ Njite njaji inaiki rocodapi perri nacadaa lriipitanao, naaco: ''Pada iempeti imoto Noemí isho.'' Niini nacadaa lriipitanao Obed. Icapienao Isaí Jinirriocan, jliaji David jinirri. ¹⁸ Icapiatsa njaji Fares inacjoite perri: Fares irrica Hezrón, ¹⁹ Hezrón irrica Ram, Ram irrica Aminadab, ²⁰ Aminadab irrica Naasón, Naasón irrica Salmón, ²¹ Salmón irrica Booz, Booz irrica Obed, ²² Obed irrica Isaí, njite Isaí irrica David