¹ Njite venti coatro jalredaoca nako lrinako minitsa keerri, nacaite narso njaji iraelitanai nawacaaca carro padenirri njite maijacacana, njeeta nanakoa natsayan maatsidalri-minatsa njite napeko njewida nanako talripe. ² Pjiomi njaji Iraelnai njenitacawa naoya njaji korripetsa Iraelnaica. Njeniko nemawa nacaité carro namatsicana njite pjiomi njaji maatsiperritsa nanaitjalri njaji napjeyapepia ³ Njaji inaiki neemawa pafetsa njite pamoyoa jalredaoca nako nalee jliaji Paperra na Minalri Dio yaako, njaji yajicape panako. Njite pamoyoa jalredaoca nako tsacja nacaite namatsicanaa na Minalri Dio irso njite nacoajawa lrirso. ⁴ Mjaji levitanai, Jesua, Bani, Cadmiel, Sebania, Buni, Serebia, Bani njite Quenani njenaniko nemawa pjerracarrona nako njite nawana cjaida na Minallri Dio irso. ⁵ Njite njaji levitanai, Jesua, Cadmiel, Bani, Hasabnia, Serebia, Hodia, Sebania njite Petaia, naako: ''Jiniki yemawa, yaa matsiadalri wa Minalri Dio irso panaya caidalriwetsa.'' ''Icaite matsia Lriipitana matsiadalri nako, jirreta lriipitana yeenonrsewa icaite cádanko njite yaa cádanako matsiadalri lrinako.'' ⁶ Icatsa Pjia wa Minalri, Icaamitsa Pjia. Pjia inaitja eenolrikojlé perr, eeno icao dalri pja, njite pjiomi njaji eeno yecoa nakope; pinaitja tsacja jiipai njite pjiomi njaji lri rikoda perri. Jliaji manoa njite pjiomi lri rikoda perri. Pia nacaficao narso, njite njaji eeno yecoa nacope naaca matsiadalri pirso. ⁷ Icatsa Pjia-ca wa Minalri, jliaji Dio iniwanalri Abram njite pjitani Ur lrikjoite caldeo lrikoda njite picada lriipitanawa Abraham. ⁸ Picapa capoa matsiaca lri caolre pipeyajle, niini pinaitja pada yaakoti lriinai picaite cádanako piacaotsa lrienipenaipe irso njepaite njaji cananeonai, njepaite njaji ititanai, amorreonai, ferezeonai, jeboseonai, njite njepaite njaji gergeseonai. Pinaitjenina cayoji picaite capisho pia ima korridalricatsa imatada cadaca pjia. ⁹ Picapjeni coanca njerrapitaca njaji wapjeyadapempia Egipto lriko njite pjimi koanca naiyaca Manoa irraiyaja icodapi riko. ¹⁰ Picañjata najishopa njite manaitja canaaperri Faraón ikjoete, pjiomi njaji lrirsoperri njite pjiomi njaji inaiki Egipto lrikope, Piajii capoa njerrapiteetaca njaji Iraelitanai. Mitsa Pjia picadaa najii carro kjaida dslrica pjia atee panashete. ¹¹ Njite, Pjienita jliaji Manoa nacapá werriko pjiomi, nataitá carro njeyapacawa lripamoyoaca lriko jliaji manoa metadalri riko, mitsa piñeetaca njaji ipinietacapena lritjewacaca lriko jliaji manoa, picadana ooni itjewacacá lrico jiipada capishontjana. ¹² Jaalrewe-riko pia napeyajle iyadaoca piwaketanda lrico, njite deepi rico pia napeyajle piwaketanda lriko tiyee picaná carro narso napowao nataitá carro nanjicawa camarrai werriko. ¹³ Awacada Sinaí rico piorroco naicjaolre eeno lrikjoite picadaa carro narso yacoti ajadalripe matsiaperri yajicape panako, pataitá carro panjica coanca paofacawa cayoji lrinaa capisho panaitjaca. ¹⁴ Picadaa najíi jliaji jalredaoca pjienitanda pirsowao Piwafetá carroda njite picadaa narso yakoti nanaitjá carro cayoji nacaaite capisho najíi carro koajica paofacawa, njite picadaa tsacja yakoti yajicape panako Pirsodalri Moise inakjoite. ¹⁵ Pia narso petje eenolrikjoite perri wadee caiwica narso maawitacai njite pia tsacja nairrao ooni jiipada lrikjoite dalri wadee metaca nacaolre. Picaite tsacja narso naa carro naofaa lri rikoda jliaji jiipai picaiterri narso yakoti ajadalri sho piacaotsa narso. ¹⁶ Mitsa njaji waferrinaipemi jiawalri perri njite njaji njapodamperrina korrin nanaitja matsia njite korrin nafio Dio iiwana majíica capoana, korrin njeepa njaji yakoti picadaji nanaitjá carrona. ¹⁷ Korrin naoma njemican njite korrin nawaopia nanako njaji matsiaperri pinaitjalri pia nacapao, icaamitsa tarraca nacaolre, njite namjepacan lriko nakepitanata narsowao pada naapiyawalrio idietacaodana njapodamrsewa njerrapiteta cawa lrikona. Mitsa, icatsa Pjia wa Diote pacjan dalri pi matsiaca sho niini korrin piwaadaca njaji na matsicanaa, merroa dalrica pjia njite kjena dalrica icapaca warso, merroadalritsa kjeya njite pacjandalri ipeyokjeti sho caidalritsa. Korrin pimaca-cana. ¹⁸ Korrin pimacacana, a cantja pipimacacana nanaitja caojli pia narsowao apana vaken tsipalra namjaitanda sho, njite naako lrinako: ''Icatsa idioteca jliaji jitalri shaa Egipto lrikjoite,'' caako cadana pinakona maatsitsa pekirritsa. ¹⁹ Njite Pjia, kjenaa picapaca narso, korrin pimacacana jalrapokolri riko. Korrin jlienaca naoya jliaji iyadaoca iwacaacalrio yaacada napeyajlewa inipolriko jaalre werrico, korrin tsacja jliaji tiyee iwacacalrio deepi riko icanalri naapowa deepi riko naa carroa. ²⁰ Pia narso Pi Caolrini matsiadalri lricanantá carrona njite korrin pi yaamitaca naoya nja peetje eenolrikjoite operri picadaalri naijawa, pia tsacja nairrao ooni wadee metaca nacaolre. ²¹ Coarenta walria oonia pikeñjawa-cana jalra pocolri riko njite korrin kokaca canacairri piaca narso. Korrin matsayan-canáa njite korrin camalrenaca njaipa. ²² Picadaa nanjíi carro nanako nja paana talricanaatinai njite nanaikite nako tsacja. Picadaa pja narso jiipai teeco-perri korricawa pacapa aima inaiki. Cayotsa njepaca narsowao Sehón jipaitemi, Hesbon italricanaa, Og jipaitemi tsacja, Basán italricanaa. ²³ Picadaa aima neenipewa cayoji jiwirsida eeno lrikojlé perri sho. Njite pideena lri rikoda jliaji jiipai picaiterri pia yaakoti ajádalri sho naferrinaipemi irso pia caotsa narso. ²⁴ Niini naacawa njaji inaiki aimadan, njepa narsowao jliaji jiipai njite napirsetaca njaji inaiki ninperri pia, njaji cananeonai. Picadaana Iraelnai icaapi riko njaji inaiki njite natalricanaa tsacja nanaitjá carro naapiya coan catsa naoma nanaitjacana. ²⁵ Njepa narsowao njaji yacaalre taimí perri njite njepaite matsiadalri. Njepa tsacja naapana pacjamperri inaaniti matsiaperri sho, irsocapena ooniapji njecanda tjewaca, irsocada oowapji, paniapji olivoapji njite aima paniati painjanda iinaca. Niini nainjaca njite kepinaacana, korrin canacaica narso njite joiwina Pi matsiaca pekirridalri icjaote. ²⁶ Icaamitsa nadiaca mjepacana njite neemaca Pikjoete. Namakoadata Piaco naoyao. Naino naoyao njaji profetanai pirsoperri, njaji icaitecapena nadiá carro naoma Pjia, caaco maatsina pinakojle. ²⁷ Niini Picada piacana nacoema icaapi riko njerrapiteeta carrona. Njite caidalritsa njerrapita cádanako njaji Iraelita nawana Picjaolre njite Pjimica narso eeno jlikjoite, njite aima walria Pjita piacana nacoema icaapi rikjoite kjenaa capoa picapaca narso. ²⁸ Mitsa nawafeta cayami mana napieta nanaitjaca maatsicanao Pirso, njite Pimacana nacoema icaapi rikona, niini nakoema kenacja njaji yaajirri nanako. Mitsa nadiá cádanako naoma Pjia, nawana Picjaolre, Pjimi narso eeno lrikjoite, njite aima walria kjenaa capoa picapaca narso Pimanakoetana. ²⁹ Picaite narso mana coanca narsotsa nanaitjaca nataitá carro njeepaca Piako. Mitsa njaji napadalretaacawa njite korrin njeepaca piako. Nanaitja maatsi nakjoete njaji yaakoti picadaji narso, njaji yakoti icadaalri matsiaca naofacawa koca cada shepani. Korrin njepani, icaamitsa namjepatacan korri capoa naoma njemican. ³⁰ Aima walria Pi tarrawataca naapiya njite picaitena pianjikje sho nanakjoite njaji pofetanai. Mitsa korrin njemica narso. Cayoshopa picadaacana nacaapi riko njaji apaana inaikinai nakodapi perri yofaawa. ³¹ Mitsa kjenaa capoa picapaca narso korrin piwayaketana piketem, korrin tsacja pimaodacaca naoya ima Dio-ca Pjia kjanadalritsa icapaca njaji inaiki. ³² Niini panaya, Pjia wa Diote, macadari, cjaidadalri, Pjia wa Diote korridalritsa koca itaita pikjoete, Pjia korridalritsa itekojleta piakoam njite caidalritsa pipeyoca fa, macadatsa macoada-sho catsa pipeyajle pjiomi njaji jirrapitakjeti ferrapitalrina inaco, njaca watalricananai tsacja, neenipe caconaperri tsacja, njaji sacerdotenai, wa ferrinaipemi njite pjiomi njaji Pinaikite na jalredaoca nakjoite njaji talricanaatinai Siria lricoperri atee panashete. ³³ Ima wanaitjanda icjaote picadaa ferrapitaca. Pinaitja matsia warso njite cadana fa wanaitja maatsi Pirso. ³⁴ Ima njaji watalricanaanai, neenipenai, sacerdotenai, njite pjiomi njaji waferrinaipemi korrin nanaitja cayoji nacaite capisho njaji yaacoti yajicape panako, korrin nanaitja cayoji pinaa capisho nanaitjaca, nacaite capisho njaji yaacoti Pinaitja cádanaco yaacoti naapiya icaitecape coanca narsotsa nanaitjaca. ³⁵ Korrin amiketsa, Pjia cádanaco italricanata pia nanako, matsia cádanako naofacawa pinaitja capoa matsia narso, lri rikoda jliaji jiipai macakoe capaniana cawa Picadanda narso, korrin nanaitja matsia Pirso njite korrin namaca naoyao jliaji maatsirri nanaitjalri. ³⁶ Panaya, nasoperrica fa lri rikodatsa jliaji jiipai picadaalri narso njaji waferrinaipemi wataitá carro waijaca matsia lripaniana lrikjoite njite njaji matsiaperri wataitalri warsoca lrinakjoite, ¡Narsoperrica fa fepaite rikotsa! ³⁷ Pjiomi naji fetalri fepaite rikotsa waaka narso njaji talricanaatinai Picadaji yanji wanako wanaitja capoa maatsi Pirso. Njaca yanji wananko njite wa vacan nakó tsacja koan catsa naomaca. Korrinatsa waji koanca wanaitjaca. ³⁸ Naicjaote njaji nocaiterrina, wadana lrinaco jliaji yaakoti wanaitjalri korridalritsa wataita fenaca yooya. Lri rikoda jliaji paperra wanaitjanda wcadanda inako lritjinao niini nerroa neepitana njaji talricanaatinai yeenipe, levitanai njite njaji sacerdotenai.''