¹ Jliadaa jalredaoca-cá nalree jliaji Paperra Moise idananda njemí carro njaji inaki aimadan. Naoketa lri-rikoda lricaitecawa korrica pada inaiki amón njite-dalri, Moab njite dalri cantja nataita nawacaacawa nainai njaji Dio inaikite. ² Korri capoa pia nakitsindata njaji Iraelnai oopi ijãodati sho njite oni sho tsacja, icaamitsa nacaoñaca Balaam lricaité carro yaacoti matsiperritsa Irael nacojle. Mitsa jliaji wa Diote lricadenacja matsiaperri Irael nako. ³ Niini njemica ikjoetetsa coanca lriako jliaji yakoti yajĩcape panako njeta Iraelnai ioya pjiomi njaji korri perritsa Iraelnaica. ⁴ Niini panaya nakjote, jliaji sacerdote Eliasib, Tobia ikitsinda icatsa jliaji yajĩrri nanako njaji namtsietacawa wa-Diote iipana lrikope. ⁵ Eliasib imatsieta pawajle macatwajle Tobia ipa, ajĩ namatsietacawa lriko pia incienso, inaaniti, komana nanda ofrendasho, komana nanda diezmo sho, aceite njite jaiko tjeda yaana walriajãipe nacadajĩ pia mana Levitanai irso, icantacaperri irso, narso njajĩ iwapacaperri pantinoma, njite njaji nacadajĩ narso njajĩ sacerdotenai. ⁶ Mitsa cayo cádanako nanaitja, korri pioaca njoa nainai Jerosalén lriko. Ima trenta y do walria nako oonia Artajerjes italricanaaca lriko, Babilonia italricanaa noá piacawa talricanaati iderse. Njite apapia nakojlena, nocaite lrirso jliaji talricanaati lricadaa carro noawa, ⁷ niini nodiacawa Jerosalén lrikojle. Niini noijĩca jliaji maatsirri Eliasib inaitjalri lricadaacapoa Tobia irso pawajle, jliaji macatawajle pja Dio iipana lriko. ⁸ Njite kerroaca njoa pekirritsa niini nopekoca padanajle pjiomi njaji Tobias inanipe lrioya jliaji lrimatsietacawa lriko piana. ⁹ Nocaite narso namatsieta carro Dio nako pjiomi njaji namatsietacawa lrikona, njité-dalri nocadaa tsenacja niini njaji inaaniti Dio iipana lrikoda, njaji komana nacadajĩ ofrendasho njite njaji incienso. ¹⁰ Njite nacaite tsacja norso, njaji inaki korri natsa nadeeca ijãodati naope narso njaji Levitanai, cayoshopa njaji Levitanai njite njaji icantacaperri idejĩcapemi oopi naawa na-kiníkerre lrikojle. ¹¹ Niini nocaiteca nekjoete narso njaji caconaperri, noako narso: ''¿Coada korrin iwapa matsia jliaji Dio iipana?'' Nowaketana njite nocadaa nakoanaa nadejĩcawa lriko. ¹² Ikena pjiomi njaji Judánai nadeeca nja komaana nacadajĩ diezmo-sho, naa tsacja jaiko tjeda yaana njite aceite tsacja nacadaa carrona namatsietacawa lrikona. ¹³ Njite nocadaaca iwapacaope njaji namatsietacawa lrico njaji nacadajĩ pjiomi njaji sacerdote Selemias, idanacaita Sadoc njite nanacjoite njaji Levitanai, jliaji Pedaía. Njite nakitsindawa nocadaa Hanán, Zacur irri, Matania irri ima ajãdalri-shoca lridejĩca. Icatsa jliajĩ yajĩcadaca yaa njajĩ ĩjãodato narso njaji nakitsiñape. ¹⁴ Piwaada catsa njoa, pjia no-Diote, naicjaote njaji matsiaperri nonaitjalri no-Diote icjaote, pjiomi njaji nodejirri, wadee pjiataca njaji nonaitjalri. ¹⁵ Njadaa jalredaoca-ca, jliaji jalredaoca nawafeta carroa lriko nocapa njaji Judá lrikoperri napitsiocaca camjerro njetá carro naana njite nadee tsacja aima napania iinaca, nadeecana burro-nako, nadee tsacja aima jaiko tjedaa yaana, camjerro, higuera iinaca njite pjiomi pja coamperricatsa nadeeca aimasho. Nadeeca pjiomi njaji Jerosalén lrikojle nawafeta carroa lriko. Njite nocaite narso korrictasa matsiaca nawendeca ijaodati nawafeta carroa lriko. ¹⁶ Njaji atsianai inocaperri yofawa Jerosalén lriko Tiro lrikjoite perri, nadee nawende copje njite pjiomi pja, nawende carro tsacja nainai nawafeta carroa lriko narso njaji Judánai njite pjiomi narso njaji yacaalre rikópe. ¹⁷ Niini noemaca cjaida nakjoete njaji Judá yapiyawanai, noako narso: ''Koadao inaitja jliaji matsirri, imacadawalretaca jliaji jalredaoca wawafeta carroa lriko. ¹⁸ Icapiatsa nanaitjalrica njaji jinirrinaipemi oopi, cayoshopa pia wa-Diote icadaa maatsirri jiwaca wanako njite lrinako jliaji wayacalre; njite panaya shaa lricjaote jliaji inaitjalri ikerroataca wa Diote Irael nakojle imacadawalreta capoa jliaji jalredaoca wawafeta-carroda.'' ¹⁹ Niini dainoma kena nanako njaji yacaalre Jerosalén ipananoma nako, njite lripjeyatoa lriinitacawa jliaji jalredaoca pawafetacarroda, nonaa naitaca pjiomi njaji yacaalre ipananoma njite korritsa namjekó carrocani akjerreca jliyapao jliaji jalredaoca wawafeta carroda. Njite nocadaa padapena nanakjoite njaji noinaiperri nawapá carro pantinoma wadentja nacadaaca njeyapawa nadeecalre nawafeeta carroa lrico. ²⁰ Niini pjiomi njaji iwendecape njite njaji nadeecalre tsacja atsa naocawa padanajletsa yacaalre Jerosalén irso. Cayotsanjeyapacao papia o yamapia. ²¹ Mitsa nocaite narso koanca. Nocaite narso korri carroenatsa napieta nanaitjaca cayo, ima inaitja cadaa tsenacja nodieta caotsa shaa ajaiteji jiidati riko. ²² Nonaa namatsietacacawa na matsicana ioya njaji Levitanai, njite nawa nawapá carro njaji pantinoma fenetá carro matsia jliaji jalredaoca wawafeta carroda. Piwada tsacjaotsa njoa no-Diote lricjaote jliaji, kjenaa picapaca norso korricapoa pimacaca jliaji yaacoti pinaitjanda oopi. ²³ Nocapa pia tsacja jliadaa njaji judionai jitacape naninaiwa njaji inaitjepe Asdod lrikope, Amón lricope njite Moab lrikope tsacja. ²⁴ Njite pamoyoa nanacjoite njaji neenipe caakocana Asdodnai yako-lriko, korrinacja caakona Judánai yakolrikjoite, padatsa yakoti nayadatsa nja apanatsa inaiki naoya ²⁵ Niini nokoitaca njaji cayoperri, caaco njoa maatsi narso, noñaa pja padapena nanakjoite, notaa natsikolre. Nonaa nacaiteca yakoti ajadalri sho Dio nako, cayoji: ''Maatsaotsa iitonaipe nainowa, korrin tsacjaotsa jitaca irrinoa naitonaipe, corrin tsacja inonaiwa. ²⁶ Naicaote njaji imatsicanati jliapia jliaji Irael talricanaa Salomón inaitja imatsicanawa. Korri piatsa pacapa pada-pjaa talricanaati cayodalriji lricayosho jalredaoca lriko, Dio ipeyonda icapacan. Lricadaani jliá carro natalricanaa pjiomi njaji Iraelnai. Cayo cadanatsa njaji inaitjepe pada jiipai nacjoitepe, jlitalri lriinowa oopi nama lrinaitjaca lrimatsicanawa. ²⁷ ¿Capja iwaadaca njomica irso njite inaitja minicatsa njaji maatsirri, wa mjepatá carro jliaji fanirri Dio fetá carro wainowa njajiinaitjepe pada jiipai nakjoite perri?'' ²⁸ Njite pada lri-rri jliaji sacerdotenai yapiyawalri Joiada, Eliasib irri, lri tsimarrecan jliaji Sanbalat, Bet Horón njité dalri, oopi nomeenaca lriawa njite. ²⁹ Piwaada nanako no-Diote, ima namacadawalretaca jliaji sacerdotecalri, coshoca jliaji yakoti pinaitjalri sacerdotenai yaapiya njite nainai njaji Levitanai. ³⁰ Cayotsa nomatsieta-cana naoya pjiomi njaji nanaitjalri nanaitja capisho njaji apana inaiki. Njite wacafieta tsenacja matsia nadejicalre njaji sacerdotenai njite njaji Levitanai. Nacoamitsa nainaitja jliaji narsolritsa nanaitjaca. ³¹ Nomatsieta tsacja njaji inaiki coan cadanakocaotsa nadeeca ofrenda-sho nja tiyeena, njite tsacja coan-cadanakoca nadee tsacjaotsa napania nainitajĩ naniwaca. Pinaitja norso matsia no-Diote piwada cádanako njoa naicjaote njaji nonaitjalri.