¹ Njitédalri Josué iwakeeta pjiomi njaji Irael iipaneta Siquem ricó, njite lriwana njaji caaconaperri pekipenai, njaji Irael iipaneta iapiyawanai tsacja, njaji icaitecape pada naco tsacja, njite njaji tsolrodaonai iapiyawanai tsacja, njite neemawa Diu ipeyajle. ² Josué iaco nasho pjiomi: '' Cayo lricaiteca jliaji Diu Irael Minalri: Oopi, njaji iferrinaipem naofaa pia teeco ooni Eufrates pemajle. Taré, Abrahám njite Nacor jinirri, naa pia matsiaddalri nasho njaji curripeitsa Diuca. ³ Mitsa njuta jliaji jinirri Eufrate pemajle njite nudee carró jiipai Canaán ricojle, njite nocadaa jorre lrienipenaipe lrirrí Isaac nacjoite. ⁴ Njite Isaac isho nocadaa lrienipewa Jacob njite Esaú tsacja. Esaú isho nocadaa pia lrishó lriofáa carró awacadacawa Seri ricó, mitsa Jacob naapiya njaji lrienipe naawa Egipto ricojle. ⁵ Nomeenaca naicjaore Moisé njite Aarón, njurrapiteetá carrona maatsiperri caafiperri sho. Njite piena, njuta jia njite. ⁶ Nodee jinirrinaipem Egipto lricjoite, njite naocawa macapwan nacojle. Njaji egipto ricope napinietana carreta sho caballo nacope teeco Macapawan Iraidalri nacojle. ⁷ Natatjá cadanaco Diu iinai cjaida njaji jinirrinaipe, Lricadáa pia cadaocadalri idaanatáca jia egipcionai iuya. Lricadaa ooni iitacana naticomá carró. Icapa pia cuampiaca Nonaitjaca njaji egipcionai. Njite iápia iofaawa jalrapocolri ricó aimawalria jámolri. ⁸ Nodee pia jia njepaite ricojle njaji amorreonai, njaji iofaacapepia Jordán pemajle. Nainoacá pia icjoete mitsa nocadaa pia icaapi ricona, jiameetá carrona jitá cárro naoya njepaite, njite Nowayakeetana icapatsa. ⁹ Njite jliaji Balac Zipor irrí, Moab italricanaa, lrinaitja oowi Irael icjoete. Balac inaa naaca naoma jliaji Balaam, Beor irrí, lricaité carró iacoti matsidalri inacojle. ¹⁰ Mitsa corrim Njomica Balaam isho. Icaamitsa lricaiteca iacoti matsiadalri inacojle. Cayotsa nomanácota pia jia lrioya. ¹¹ Iyoeta pia Jordán iocá carró Jericó nacojle. Njite njaji Jericó italricananai inoaca icjoete, nainai nakitsiñapewa njaji amorreonai, fereseonai, cananeonai, hititanai, gergeseonai, heveonai, njite jebuseonai tsacja. ¹² Nocadaa jiametá carrona, jiá carró ianjée nanaco. Nomeenaca pia aini ipeyajle naicjaolre njaji yamadade talricanatinai amorreo ricópe nafietá carrona njite napitó carro iuya. Iwadacantja napitocao nafió capoa imatsetan iiwana, o iyawitjioco icjaote cantja. ¹³ Nocadaa isho jiipai corridalritsa imatsietanda cantja, nocadaa tsacja isho iyacalrewa corridalritsa inaitjandaca, njite panaya iofáaca nericoda. Inja tsacja nainaca njaji camjerro, nainaca njaji oliva tsacja corri perritsa iapanampeca. ¹⁴ Panaya iaca matsiadalri iMinalri isho, njite idenjí lrisho pjiomi icaolre ajadalri sho; ipeeco ioyao njaji corriperritsa Diuca nampe pia isho matsiadalri njaji iferrinaipem teeco Eufrate ricojle, njite Egipto lricó tsacja. Iá matsiadalri wa Minalri isho. ¹⁵ Mitsa corricadaa matsia icapa iaca matsiadalri wa Minalri ishó, iniwana jiwaacatsa coca ishocaotsa iá matsiadalri, iá cadaa matsiadalri nasho njaji iferrinaipem iaji isho matsiadalri teeco Eufrate ricojle pia, o amorreonai idiute isho cadaa, lriminanai pia jliaji jiipai iofáalrinacja irricoda. ''Mitsa njoa naapiya njaji noopaneta, waacaotsa matsiadalri wa Mi nalri isho''. ¹⁶ Mitsa njaji inaiki aimadan njeepa Josué, naaco lrisho: ''Corriotsa coancaojlica wamácaca jiaji wa Minalri waacarrontja matsiadalri nasho njaji corripetsa Diucana, ¹⁷ ima wa Minalri Diuca jliaji jitalri fáa njite njaji waferrinaipem tsacja Egipto lricjoite, njerrapiteetalri pia fáa niini, njite lricadaa wacapa catjinaa lrianjíike cjaidádalri, njite lriwapa fáa matsia inipolrico, njite lriwapa tsacja fáa matsia naoya njaji inaiki feyapalri icodapi. ¹⁸ Njite wa Minalri jita waoya wapeyajle njaji inaiki aimadan, njaji amorreonai iofáacape pia lriricoda jiipaica jliaji. Niini waacatsacjaotsa matsiadalri wa Minalri isho ima Jliacatsa wa Diute tsacja. ¹⁹ Mitsa Josué iaco nasho njaji inaiki aimadan: ''Curritsa itaitjenca iaca matsiadalri wa Minalri ishó, ima mamatsicanáadalrica jliaji Diu, cakerriacjédalrican, cutsa lrimaodacá carroca imatsicana iuya jiena capoa lrioya. ²⁰ Imacacadani iá carró matsiadalri na diute isho njai apaana inaiki, icaamitsaotsa lriemaca icjoete lrinaitjá carró isho maatsi. Lriwayakeetaotsa jia Lrinaitja cayaami isho matsia''. ²¹ Mitsa naaco tsenacja Josué isho njaji inaiki aimadan: ''Corrina; waacatsaotsa matsiadalri wa Minalri isho.'' ²² Njite Josué jiepana, lriaco nasho: ''Jiwacatsa ianjiacawa inacowaacatsa, iniwana capoa ishowao iácarro matsiadalri wa Minalri isho.'' Njite naaco Josué isho: ''Fawaacatsa ianjíi wanacowaacatsa''. ²³ Niini Josué iaco nasho: ''Panaya, imaca ioyao nadiute njaji apana inaiki iofaacape ipecolrico, idiácarro tsenacja jiepa icaolre ricjoite jliaji iMinalri, Irael iDiute. ²⁴ Naaco Josué isho njaji inaiki aimadan: ''Fáa, wacaotsa matsiadalri wa Minalri Diu isho. Wanaitjaotsa coanca lricaiteca fa.'' ²⁵ Josué inaitja pada iacoti naapiya njaji inaiki aimadan Siquen ricó, niini lriaca nasho njaji iacoti ianjicape panaco nanjíi carro coanca naofaacawa. ²⁶ Njite Josué idana njaji iacoti ianjiicape panaco lrirricodatsa jliaji paperra nerrocawao njaji iacoti ianjíicape panaco Diu iyaape. Njite Josué jipa pada jiipada macádalri lricadaa carró niini, apana jaico iapjite iemalriwa lricodapi jliaji panti Diu iorrococarroji mana niini. ²⁷ Josué iaco nasho: ''Jliaji jiipada, icatsa ianjiicada wanaco. Ima jlimica pjiomi njaji iacoti wa Minalri icaiterri washo. Coancaojli cadaotsa imaca lca Diu, lrianjíi watsa inaco.'' ²⁸ Njitédalri Josué iméenaca nadiawa njaji inaiki aimadan naofacawa ricojle. ²⁹ Jliapodamjite, cjeyetsa jalredaoca, mayami jliaji Diu ishodalriJosué, Nun irrí. Lrisho piakena 110 jamolri mayamini. ³⁰ Nadawani jlipaite jinaa iocacawao, Timnat Sera ricó, Efraín jipaitena awacadacawa ricó, inarroemjete jeeri isho lrisho jliaji awacada Gaas dalri. ³¹ Naapia matsiadalri Diu isho njaji Iraelnai caafi cádanacopia Josué, njite caafi cádanaco njaji pekipenai caaconaperri iofaacape pjá piatoa Josué jiapodam, njaji icapacape pjiomi Diu inaitjalri Iraelnai isho. ³² Njite njaji José iapipem, nadeerri Egipto lricjoite njaji Iraelitanai, nadawani Siquem ricó, lri ricoda jliaji jiipai Jacob iwentalri naoya njaji Hamor ienipem, Siquem jinirri. Cien palrataitape pia lricoada lriwentaca naoya, njite icapiatsa njepaiteca njaji José iipaneta. ³³ Njite mayami tsacja Eleazar, Aarón irrí. Nadawani Guibeá ricó, Lrirrí Finees iyacalre ricó, nanda lrisho, Efraín jipaite awacadacawa ricó.