¹ A papia nacojle, jliaji Jonatán Saúl irrí, lriaco lrisho jliaji idenjicada lridanataacashopao: ''Pino waa wacapa peemajle, naofacaawa nawacacao njaji filisteonai''. Mitsa corrí Jonatán icaite jlinirrí isho kjerreca naawa. ² Saúl iofáa cadana Guibeá iocacawao, apana jaico iapjite granadas dalri iipitana Migrón ricó. Njite seiciento atsianai lriinaiperri iofáa tsoomi lrioya, ³ njite lriinai tsacja Ahías, Ahitob irrí, Finees irrí, Elí irrí, wa Minalri isacerdoten Silo rico, njite jlietacawa natsayan sho njaji sacerdotenai. Njaji inaiki aimadan corripiatsa nanjíi oopica Jonatán iawa naoya. ⁴ Njite anji Jonatán iomacaba tja jiyapaca, nawacaacalri niini njaji Filisteonai, jiipada yeenodalripeca niini yameemape, njite keepitaná perri tsacja. Peema iipitana Boses, njite jli peema Sene. ⁵ Jliaji pema yeenondalri jlinicoa atsia jliemjete jeerri isho Micmas jipaite jinaa iocacawao, njite jli pema yeenondalri jlinicoa inarroemjete jeerri isho, Geba icoemjete. ⁶ Niini Jonatán iaco lrisho jliaji idenjicada lridaanaita lrisho: ''Pino wayoeta nawacaacalri niinio njaji corrípetsa iyoá naatsiaca naco. Wadeetsantja wa Minalri ikitsindataca fáa, ima corritsa coca itaita idaanataca wa Minalri lri manacotá carro fáa naoya njaji aimadan o yamadan ioya.'' ⁷ Njite jliaji idenjicada lridaanaita lrisho, iaco lrisho: ''Pinaitja jliaji pisholri picaolre ricó. Waacatsa wapjeyajleo, njoa tsaotsa piinai nonaitjá carró njaji pinaalriotsa nonaitjaca.'' ⁸ Njite Jonatán icaite: ''Wayoetaotsa naicjaolre njate atsianai, wa cadaotsa nacapá carro fáa. ⁹ Nacaite cadaa washo: ''Atsa iwapa fáa waa carró icjaolre'' niini weema catsaotsa wawápana, corriotsa waa carroca naicjaolre. ¹⁰ Mitsa nacaite cadáa: ''Ino waicjaolre'', waa pedacaotsa naicjaolre: ima wa Minalricaotsa icadaa washona wacaapi ricó. Icatsaotsa wanjíishopaca coanca. ¹¹ Njite nacadaa cádanaco Filisteonai iwapacapena icapana, naaco: ''Icapa, namotokenao njaji hebreonai nadawaacalri njiteo''. ¹² Niini njaji filisteonai nawana naicjaolre njaji Jonatán njite lrisho jliaji idenjicada lridaanaita lrisho, naaco nasho. ''Inoena waicjaolre, wacañjatá carró icapa pada''. Niini Jonatán iaco lrisho jliaji idenjicada lridaanaita lrisho: ''Pinoatsa tsoomitsa nooya ima wa Minalri icadaacana Iraelnai icaapi ricona.'' ¹³ Jonatán jirrawa cayecjatsa naicjaolre, njite tsoomitsa lrioya jliaji idenjicada lridaanaita lrisho. Njaji Filisteonai inocape Jonatán icjaolre, lriinona; njite njaji inocape njapodjete jliaji idenjicada lridaanaita lrisho, jliá iinona. ¹⁴ Nainita cádanaco nainoacacao njaji Jonatán njite jliaji idenjicada lridaanaita lrisho, naino vente atsianai tsoapji ricotsa. ¹⁵ Jorre nafiócao njaji Filisteonai iwacaaca cápewa, njaji iemacape nakínkerre ricó njite njaji iofaacape yacalre ricó. Njaa tsacja njaji tsolrodaonai njite njaji tsolrodaonai idawaacacapewa, nafió tsacjao. Njite cananíca jiipaí cjaida, njite nafiocawa pekirrídalri sho. ¹⁶ Niini njaji iwapacape icapa, Saúl icadanji Guibeá Benjamín ricó, nacapa coanca njeeco mapocotao njaji tsolrodao aimadan Filisteo ricope, njeecojecao macadatsa. ¹⁷ Njite Saúl iaco nasho njaji inaiki aimadan lriinaiperri: ''Iniwetaacao icapá carro cocaca canacai wanacjoite.'' Naniweeta cádanaco coshoapaca namaimaca, nacapa canacaica Jonatán njite jliaji idenjicada lridaanaita lrisho. ¹⁸ Saúl iaco Ahías isho: ''Idee Dio iarcan caijleji'' (Jliawalri pia a jliaji arca nainai njaji Iraelitanai.) ¹⁹ Caaco cádanacotoa Saúl lriapiya jliaji sacerdote, paa namatsicaacacao njaji Filisteonai naofacaawa ricó. Niini Saúl iaco sacerdote ishó, ''Corritsa pidee carrocan.'' ²⁰ Saúl njite njaji inaiki aimadan lriinaiperri, nawacaacawa naacarro nainoacawa. Njite njaji Filisteonai nainoacawa njawaaca waacatsa, njite corrítsa naanji coancana. ²¹ Njaji hebreonai iacape nainai njaji Filisteonai nawacaalri niinio, naadia tsenacja naicjaolre njaji nakitsiñape Iraelitanai Saúl iinaipe njite Jonatán tsacja. ²² Njite njaji atsianai Iraelitanai njaji idawaacalrio yeenondalripe nacó tsoomi Efraín ioya, njemi napitocao njaji Filisteonai, njite naa napinietana oowi ricó. ²³ Wa Minalri imanacota pia nja Iraelitanai jliadáa pia jeecoapi, njite teeco pia napinietana oowi ricó Bet Avén icjaolre. ²⁴ Njite njaji Iraelitanai mjaida nadaki ricó jliadáa pia jeecoapi ima Saúl inaa pia nacaiteca pada iacoti cayoji: ''Maatsidalricaotsa jliaji atsia injalriotsa deepi ipjeya, lripjeya toa noinoca njaji nocoema''. Niini corri piatoa coca inja nanacjoite. ²⁵ Niini pjiomi njaji inaiki aimadan njeewao awacada ricó nincawa mapaa jiipai ricotsa. ²⁶ Njeewa cádanaco awacada rico njaji inaiki, nacapa coanca mapaa imotocawa jiipai ricjoite, mitsa corri coca jipa iperroa nafio capoa lriiwana jliaji iacoti maatsidalri Saúl inaalri nacaiteca. ²⁷ Mitsa Jonatán corri pia jlimi coanca jlinirrí inaa nacaiteca iacoti maatsidalri njaji inaiki aimadan. Niini Jonatán iapjoeta lrimolrocón mapaa ricó. Jlipa lricaapisho lriperró carron njite cjaida lricapaca. ²⁸ Cayo cádanaco paada nanacjoite njaji inaiki aimadaniaco lrisho. ''Jliaji pjinirrí Saúl lrinaa nacaiteca pada iacoti maatsidalri njaji inaiki, cai lriaco: ''Maatsidalrica jliaji atsia injalriotsa jliadaa jeecoapica jliaji'', mjaida cadaanena njaji inaiki corricapoa coca nainja''. ²⁹ Njite Jonatán jiepani, lriaco: '' Njonirri inaitja maatsi nasho njaji inaiki aimadan. Picapa coanca cjaida tsenacja nocapaca nopérro capoa jatjamtsa mapaa. ³⁰ ¿Omaminantja nainjacada coancatsa njaji inaiki aimadan nanacjoite njaji njetjáji nacoema ioya? Njite jorre pjantja wainoca nja Filisteonai''. ³¹ Jliada jalradaoca naino njaji Filisteonai Micmas ricjoite ate Ajalon she. Njite mjaidaketsa njiaji inaiki aimadan. ³² Caicarro nakjeyapita naaca njepa njaji nacoema iyarropem njite njepa tsacja oveja, bueyes, cordero njite nainona jipai rico. Naiñacarona njaji inaiki aimadan nairrana fietsa. ³³ Jliapodamina nacaite Saúl isho cayoji: "Nanaitjaca matsi Dio icjoete njaji inaiki aimadan ima naiñaca irranatifie". ³⁴ Njite Saúl iaco: "Oopi inaitja maatsi". Panaya, icabocoeta idee nosho pada jipada macadalri caijleji". Njite lricaitepja nasho: "Iao napecolrico njaji inaiki aimadan njite icaite nasho, "Icoanatsa ideca buey njite oveja, íinona atsaji njite iñja. Mapietatsa inaitjaca matsi Dio icjoete iñjaji cantja irranatifie". Caicarro nacoanatsa njaji inaiki aimadan nadeeca njaji buey lricjaolre jliada deepi njite niinitsa nainona. ³⁵ Saúl inaitja pada altar Dio isho, icatsa lrinitandaca lrinaitjaca altar Dio isho. ³⁶ Njitedalri saúl iaco nasho: "Washa wapinieta njaji Filisteosnai jlia deepica jliaji fetakje naoya pjiomi naiarro ate kjerre catsa jalreniji. Corrim watsa wacada caafi apada nanacjoite". Naaco njepacani: "Pinaitjena coanca matsiapja piaji". Mitsa jliaji sacerdote jliaco nasho: "Washa watatja Dio inei coancaotsa wanaitjaca". ³⁷ Caicarro Saúl itatjaca Dio inei cayoji, "¿Pjantja nopinietacatsa njaji Filisteonai? ¿Pjantja picada Israel icapi ricona? Mitsa jliada jalredaoca corrim Dio jiepacani. ³⁸ Caicarro Saúl icaite nasho cayoji: " Ino jia caconaperri yacalre aimadan isho; njite icapatja cjaiterrica jliaji inaitja matsi opica. ³⁹ Ima cafidalrica jliaji Dio imanacota cada Israel, ninintja noenipe jonatan cada jliaji inaitjalri matsi, mayami caotsani". Mitsa corrim pada atsia shepani nanacjoite njaji inaiki aimadan. ⁴⁰ Jliapodamina lricaite pjiomi Israel isho cayoji: "Pema iemacawa jia, njite njoa norri jonatan iapiya pema tsacjaotsa wemacawa." Njite naco njepaca Saúl njaji inaiki aimadan: "Pinaitjena coaji pjaca matsia piaji." ⁴¹ Caicadana Saúl icaiteca Dio isho, Israel iminalri cayoji: "picañjata wacapa tumim nacjoite." Njitedalri lriniwanaca Jonatan njite Saúl, caicarro namanacotaaca cao njaji inaiki aimadan wadee lriniwna cana. ⁴² Njite Saúl iaco nasho: "Icapa pedena cjaiterrica wanacjoite njoa cada o norri Jonatan." Caicarro naniwanaca Jonatan. ⁴³ Saúl icaite Jonatan isho cayoji: "Picaite nosho jliaji pinaitjalri" Jonatan jiepacani, lriaco: "Njotaca noperroa maapa jliwidana sho jliaji jaicoapo njopanda nocapi rrcó. Alri njoaji; Mayami naotsa njoa." ⁴⁴ Njite Saúl iaco lrisho: "Dio watsa iino njoa, corri cadaa mayami pjia, Jonatan." ⁴⁵ Njite naaco Saúl isho njaji inaiki aimadan: ''¿Capja Jonatan ishotsa mayamica, jliaji icadaalri jiamacjeti Irael isho? Corriotsa cayoca. Caafidalrica jliaji wa Minalri niini corriotsa pacja lri tsicolrée jliwida nacope jiwacaotsa jiipai ricó ima lridenjica Dio jiida sho oopica.'' Cayotsa njaji inaiki aimadan iyomjetaca Jonatan mayamicalri ioya. ⁴⁶ Njite yaami Saúl ipinietaca njaji Filisteonai, njite nadiawa njaji Filisteonai njepaite ricojle. ⁴⁷ Saúl iniita caojli italricanaataca Irael nacó, lriinoacawa nacjoete njaji lricoema a kjerre catsaji. Lriinoaca Moab icjoete, Ammon nai icjoete, Edom, nacjoete njaji talricanaatinai Soba ricóperri pia, njite nacjoete njaji Filisteonai. Kjerre shecaawa catsa lriinoacawa, lrimatsikeeta nja lricoema. ⁴⁸ Lricjaidatacawa njite jliameta pia njaji Amalecitanai. Lrimanacota nja Iraelitanai naoya njaji iomacape pia iaca iñaitona maatsicalri ricó. ⁴⁹ Icapiatsa njaji Saúl ienipe: Jonatan, Isúi njite Malquisúa. Njite njaji lriitonaipe, icapiatsa njaji: Merab, sho pjeerroti, njite Mical, iweedoati. ⁵⁰ Ahinoam pia roipitana shoaji Saúl iino; Ahimaas iito. Njite Abner pia lriipitana jliaji lritsolrodaoperre icapitama, Ner irrí; Saúl jinirri weerri tsa. ⁵¹ Cis pia lriipitana jliaji Saúl jinirrí; Njite Ner, Abner jinirrí, Abiel irrí. ⁵² Cjaidape pia njaji oowicalri nanaitjalri pia nacjoete njaji Filisteonai Saúl jiawajli. Saúl icapa cádanaco ape atsia cjaideete mafio cádalritsa, icaamitsa lriinaicani.