¹ Samuél iaco nasho njaji iraelitanai: ''Njumina pjiomi njaji iacoti icaiterri nosho, nucatjenina isho italricanaawa jlia carro ianjíi inaco. ² Panaya, alrinaji lriemaca ipeyajle jliaji italricanaa; ima pekirrina njoa, jaalrena nja notsicolre, njite iinaicatsa nja noenipe. Icapjentsa coanca noemaca iapiya noyempetica nacjoite atee panajiete. ³ Alri njoaji ipeyajle; icaitene noacona Dio ipeyajle njite lriniwananda ipeyajle tsacja. ¿Capja njotaca ioya ivacan imoyetacape jiipai? o ¿Njotaca ioya iboorrón? ¿Coca ioya noñaito iyaarro? ¿Cocao jliaji njorrapiteetalri? ¿Coca ioya pa njopa iyaarro lriwenta shopa njoa? Icaitena cocacá nja nomatsicanaa nodietá carró isho nocoadao." ⁴ Njite naaco lrisho: ''Cotsa picashataca fáa, corrin tsacja pjirrapiteetaca fáa, corrin tsacja piñaito cantja pada ioya lriyaarro.'' ⁵ Niini Samuél iaco nasho: ''Wa Minalritsa njite jliaji lriniwananda italricanao, icatsa njaji ianjirrica inaco icaite cádanaco corricatsa coca iokeeta maatsidalri nonaco.'' Njite naaco njeepaca Samuél: ''Wa Minalri ianjíi njaji wacaiterri pisho''. ⁶ Samuél icaite pja nasho, lriaco: ''Wa Minalri piatsa icadaa Moisé njite Aarón tsacja waapiyawanaiwa, njite jliá pia tsacja idee njaji jinirrinaipe njepaite ioya njaji Egiptonai. ⁷ Caishopa panaya, inoena jiwaacatsa, iemá carró wa Minalri lripeyajle, nocaité carró jimi njaji matsiaperri wa Minalri lrinaitjalri isho njite jinirrinaipem ishó tsacja. ⁸ Jacob ioca cayam Egipto ricojle, njite jinirrinaipem nawána cjaida. Niini wa Minalri imeenaca Moisé, Aarón tsacja, njaji ideerri piena jinirrinaipem Egipto ioya, cayojleji. ⁹ Mitsa naji jinirrinaipemi namawadaca pia na Minalri Dio ioya; cayo carro piena Dio icadaana Sísara icaapi ricó, tsolrodaonai iacapítama Hazor ricóda, lricadaa tsacana nacaapi ricó njaji Filisteonai, njite lricaapi ricó tsacja jliaji talricanaati Moab dalri; pjiomi njaji nainoaca piawa nacjoete njaji ipjeyadampe pia. ¹⁰ Nawana cjaida wa Minalri isho, naaco: ''Ooopi wanaitja maatsi, wamácaca jliaji wa Minallri, waoma capoenacja lrioya njaji Baalnai njite Astarot tsacja. Mitsa paanaya pimanácota fáa naoya njaji wacoema, pisoperri carro tsenacjaotsa fáa. ¹¹ Caicarroena wa Minalri imeenaca Jerobaal, Jefté, Samuél tsacja, njite lricadaa njameetá carro njaji icoema iofaacape iwaida nacó, njite corri piatsa coca itaita iemaca icjoete. ¹² Icapa cádanaco pia lrinoca icjolre jliaji Amonitanai italricanaa Nahas, iaco nshó: ¡Corrina! Matsia pjatoa wasocantja pada wa talricanao ianjiicadantja wanaco, iMinalri Dio cadaneena tja lriaji Italricanaa. ¹³ Pnaya, alrinaji italricanaa iniwananda ishowao, itatjanda ishowao njite wa Minalri icadaa jlia carró italricanata inacó. ¹⁴ Ifió cadaa iMinalri iiwana, idenjii cadaa lrisho, jiepa cadaalriaco, corricadaa imjepata njaji iacoti lrinaalri inaitjaca, matsiá watsa pjiomi, jia njite italricanaa tsacja, iMinalri Dio ishoperricaotsa jia matsia. ¹⁵ Mitsa corricadaa jiepa iMinalri iaco, iemacadaa nacjoete njaji iacoti Lrinaalri inaitjaca, wa Minalri icadaotsa lricaapi icjoete, cayoji lricadaa capisho nacjoete njaji jinirrinaipemi oopi. ¹⁶ Icapaotsa panaya jiwaacatsa jliaji iMinalri inaitjalriotsa icapatsa. ¹⁷ ¿Capja panayaca iniwacarroa trigo? Notatjaotsa cjaida wa Minalri iinai Lrimeenacá carro eeno njite iiyao tsacja. Njiteotsa icapa, ianjíi tsacjaotsa coshodalrica imatsicana imacadalrica Dio ipeyajle itatja cádanaco ishowao italricanao. ¹⁸ Ikeena Samuél itatjaca wa Minalri iinai; njite jliadaatsa Dio imeenaca naicjaolre eeno njite iiyao tsacja. Njité dalri nafiowa pekirritsa njaji inaiki Dio iiwana njite Samuél iiwana tsacja. ¹⁹ Niini pjiomi njaji inaiki naaco Samuél isho: ''Pitatja nanaco njaji pishoperri pi Minalri Dio iinai, wadee mayamica faa. Ima wamaimata pjaaca wa matsicanao wa matsicana nacojle, wa tatjá cádanaco pada wa talricanao. ²⁰ Njite Samuél jiepana, lriaco nasho: ''Mafiotsawa. Inaitjenina imatsicanao, mitsa namácatsa wa Minalri, idenji Lrisho icaolre ricjoite. ²¹ Maatsa njapodam njaji miperrimtsa, njaji corriperritsa itaita imanacotaca jia, ima corricatsa coadacana. ²² Lriipitana cjaidádalri icjaote, corriotsa wa Minalri imenatá carroca njaji lrinaikite aimadan, ima wa Minalri icatiimataacacao lricoadata cádanaco jia lrinaikite sho. ²³ Njite decja njoa, teeco noya jliaji nonaitja cantja maatsi Dio icjoete, yami cantja notatjaca inaco, ima nocananta catsaota shaa inaitja carro jliaji matsiadalri njite mayacandalri. ²⁴ Icamitsa ifio lriwana jliaji Dio njite ideeji lrisho ajadalri icaojlesho. Icapa pjiomi njaji lrinaitjalri icjaote. ²⁵ Mitsa corri cada yami inaitjaca jliaji matsidalri, lriwayaketa caotsa shaa njite jliaji italricana.