¹ Njite Nahas Amonita dalri lriawa lriinoacá carró Jabes Galaad ricoda icjoete, mitsa pjiomi njaji atsianai Jabes ricope naaco Nahas ishó: ''Pinaitja pada iacoti waapiya njite pishoperricaotsa fáa.'' ² Mitsa Nahas amonita dalri jiepana: ''Icaamitsa icadaa cadaa njotaca itji atsia jliemjete pjiomi jia nonaitja iacoti iapiya, maatsidalri jiwá carroatsanaco pjiomi njaji Iraelnai.'' ³ Niini njaji pekipenai caconaaperri Jabes ricoperri, naaco njeepacan: ''Picadaa washo siete jalredaoca, wataitá carro wameenacacá iacoti nasho pjiomi naofacawa ricó njaji Iraelnai. Niini corricadaa coca itaita imanacotaca fáa pioya icaamitsa pinaitaotsa waapiya cayoji pioma capisho.'' ⁴ Njaji ideecaperri iacoti naocawa Guibeá ricojle, Saúl iofaalri nirsheo, njite nacaite njemi pjiomi njaji iraelitanai coanca njeyapacao. Iacamitsa njemataca naiyacayao pjiomi njaji inaiki aimadan. ⁵ Saúl idiá cadana iucaowa lrikinkerre ricjoite naapiya nja lri vacan imoyetacaperri jiipai, lriaco nasho: ''¿Cuadao naiya njaji inaiki aimadan?'' Niini nacaite jlimi coanca naaco njaji njai atsianai Jabes ricópe. ⁶ Saúl jimi cádanaco coanca naacope njaji inaiki, Dio iwawaita iorroco cjeyanaadatsa Saúl nacó, njite keeroaca Saúl pekirritsa, ⁷ jlipa yaamana vaaca imoyetacape jiipai, lriinona, lricadowaana njite lrimeenaca pjepadape nainai njaji ideecape iacoti pjiomi iraelitanai ishó. Njite lrinaa nacaitecana cayoji: ''Coca cadaa corri imoto iawa Saúl iinai njite Samuél iinaitsacja naicoacá carro, cayoatsa wanaitjaca nja ivacan imoyetacape jiipai''. Njite Dio ifainaa ifietaca njaji inaiki aimadan, niini nawacaacawa pjomi njaji atsianai pada capisho atsia. ⁸ Saúl iniweeta njaji Iraelitanai Bezec ricó niini namaimaca pjiomi treciento mil atsianai, njite njajii Judá ricope treta mil. ⁹ Naaco nasho njaji ianjicape idee iacoti: Cayoatsa iaco nasho njaji atsianai Jabes Galaad ricope: ''Tjeewenaotsa, jamo cádanacoenaotsa jeerri namanacotaotsa jia.'' Niini njaji ideecaperri iacoti nacadaa nanjí jliaji iacoti nasho njaji atsianai Jades ricópe niini cathiimana. ¹⁰ Njaji atsianai Jabes ricope naaco nasho njaji Nahas ricópe: ''Corritsa coan wanaitjaca icjoete, niini tjewenaotsa inaitja coancatsa ioma inaitjaca waapiya''. ¹¹ Tjewaijle, Saúl jieneta madalripoco naoyawaaca njaji inaiki aimadan. Niini deepitoa njeewao nainó carro njaji amonitanai nawacaalri niinio, njamana owi ricó, njite tjewaijle napineetana, namacana yeenon keena jeerri. Njaji iomjé perri naoya corritsa nacadaa nawacaacawa. ¹² Njite njaji inaiki aimadan iaco Samuél isho: ''¿Cocao jliaji icaiterri? ¿Saúl watsa italricanaata wanaco? idee njaji atsianai wainó carrona.'' ¹³ Mitsa Saúl iaco nasho: ''Corriota coca mayami paanaya, ima wa Minalritsa imanacota njaji Iraelnai''. ¹⁴ Niini Samuél iaco nasho njaji inaiki aimadan: "Washa waawa Gilgal ricojle, wawalridaritá carro jliaji talricanaatiapan nirse." ¹⁵ Njite naawa Gilgal ricojle njaji inaiki aimadan nacadaa carro natalricanaawa Saúl Dio ipeyajle. Naino maaficalri niini Dio ipeyajle nacaiteshopa matsiacatsa pjiomina. Njite Saúl naapiya njaji Iraelitanai nacatiima-taacawa pekirritsa.