1
نحب نفكركم يا لخاوة بالانجيل اللي بشرتكم بيه, و قبلتوه, و اللي راكم فيه ثابتين,
2
و بيه ثاني تتخلصوا, لو كان تعملوا بالكلام الي بيه بشرتكم. و الا راح يكون ايمانكم باطل!
3
من لول سلمت لكم الشيء اللي انا ثاني قبلتو: بلي المسيح مات على جال ذنوبنا حساب واش جا في لكتب,
4
و بلي راه تتدفن, و بلي قام من الموتى في ثالث يوم حساب واش جا في لكتب,
5
و بلي راه ظهر لبطرس و من بعد للثناش.
6
و من بعد ظهر لاكثر من خمسمياة اخ دفعة واحدة, معظمهم ما زالوا حيين لضرك. بالصح كاين فيهم اللي ماتوا.
7
و بعد هاذا ظهر ليعقوب, ومن بعد ظهر للرسل اجمعين.
8
و اخر واحد _كي اللي لواحد مرمي _ ظهر ليا انا. و ما انا غيراصغر الرسل, و مانيش حاط روحي نستاهل خلاص باه يسموني رسول,
9
على خاطر اضطهدت لكنيسية تاع الله.
10
و اذا انا على الشيء اللي راني عليه اليوم غير بالنعمة تاع الله. و نعمتو اللي انعم بيها عليا ما كانتش باطل, بالصح انا تعبت اكثر منهم الكل. و مش انا اللي جاهدت بالصح النعمة تاع الله الي كانت معايا.
11
و سواء انا و الا هما, هاذا هو الشيء اللي احنا نبشروا بيه و هذا هو اللي انتم بيه امنتوا. قيامة الموتى
12
بالصح اذا كنا نبشروا بلي المسيح قام من بين الموتى, كيفاه امالا كاين بيناتكم ناس يقولوا: " ماكانش قيامة تاع الموتى"
13
اذا كان الموتى ما يقوموش امالا حتى المسيح ما قامش!
14
و اذا كان المسيح ما قامش يكون تبشيرنا باطل و يكون ايمانكم ثاني باطل,
15
و نوليو احنا شهود تاع زور على الله, على خاطر شهدنا عليه بلي هو قوم المسيح و هو ما قوموش, كي عادوا الموتى ما يقوموش.
16
على خاطر اذا كان الموتى ما يقوموش حتى المسيح ما يكونش قام.
17
و اذا كان المسيح ما قامش يكون ايمانكم باطل. و انتم راكم باقيين في ذنوبكم!
18
و حتى اللي ماتوا وهما مسيحيين تهلكوا!
19
اذا كان الرجاء تاعنا في المسيح غير في هاذي لحياة برك, نوليو احنا اكثر وحايد في الشقاء نعانيو.
20
بالصح في الحقيقة المسيح قام من بين الموتى و هو الباكورتاع الموتى.
21
اذا كان الموت جاء على يد انسان واحد, حتى القيامة ثاني تجي على يد انسان واحد.
22
على خاطر اذا كان في آدم الناس الكل يموتوا, حتى في المسيح ثاني راح يحياو الناس الكل.
23
بالصح كل واحد و المنزلة تاعو: المسيح هو الاول, و من بعد الناس اللي هما للمسيح في الرجوع تاعو.
24
و من بعد تكون لاخرة وين يسلم المسيح الملك لله الآب, بعدما يقضي على كل سيادة و كل سلطة و كل قوة.
25
على خاطر لابد عليه يملك باه "يحط العديان تاعو كاملين تحت رجليه".
26
و يكون الموت هو اخر عدو يقضي عليه.
27
على خاطر حط كل شيء تحت رجليه. بالصح كي يقول: "بلي كل شيء تحط تحت رجليه" باين بلي يستثني الله الي كل شيء خاضع ليه.
28
و كي يحط كل شيء تحت رجليه, وقتها حتى الابن في ذاتو يخضع لله اللي كل شيء خاضع ليه, و يكون الله هو الكل في الكل.
29
و الا كيفاه يعملوا المعمودية على جال الموتى؟ اذا كانوا الموتى ما يقوموش خلاص, و علاش امالا يتعمدوا من اجلهم؟
30
و احنا علاش رانا نواجهوا الصعوبات في كل وقت؟
31
كل يوم نشوف الموت بعينيا غير باه تكونوا انتم هما الفخرة تاعي في المسيح يسوع ربنا.
32
لو كان كي حاربت الوحوش في افسس كان عندي هدف باه نرضي الناس, واش الفايدة تاعي؟ لو كان جاو لموات ما يقوموش, "خلي امالا ناكلوا و نشربوا واخرتها موت!".
33
ما تغلطوش ارواحكم: "الخلطة البالية تفسد لخلاق العالية".
34
فيقوا و ما تغلطوش, على خاطر كاين ناس ما يعرفوش ربي خلاص. نقول هذا الشيء باه تحشموا على ارواحكم! البدن تاع لقيامة
35
لو كان كاش واحد يقول: "كيفاه يقوموا لموتى؟ و بواش من بدن يجيو؟".
36
يا جاهل! الشيء اللي يتزرع ما يعاودش يحيا الا اذا كان مات.
37
و الشيء الي تزرعو هو غير حبة برك نقولوا مثلا حبة تاع حنطة و الا اي زريعة واحدة اخرى, ماهوش هاذاك النبات اللي راح ينبت و يظهر من بعد.
38
بالصح الله هو اللي يمدلها جسم كيما يحب هو. و كل زريعة تجيب النبات تاعها.
39
و الاجساد كلها ماهيش كيف كيف, الانسان عندو جسم, و الحيوان عندو جسم, و الحوت عندو جسم, و الطير عندو جسم.
40
و كاين اجسام تاع سماء, و كاين اجسام تاع لرض, تاع السماءعندها لبهاوة تاعها, و تاع لرض عندها لبهاوة تاعها.
41
بهاوة الشمس حاجة, و بهاوة القمرة حاجة, و بهاوة النجوم حاجة. كل هاذا و عندو لبهاوة تاعو.
42
و هكذاك يكون في قيامة الموتى: يتزرع جسم فاني و يقوم جسم يخلد.
43
يتزرع بالذل و يقوم بالعز, يتدفن بالضعف و يقوم بالقوة.
44
يتزرع جسم بشري و يقوم جسم روحاني. يكون جسم بشري و يولي جسم روحاني.
45
و مكتوب ثاني: "ولى آدم, الانسان لول نفس حية ", و كان آدم لخر روح يحيي.
46
بالصح الروحاني ما يكونش سابق على البشري, يجي في لول الجسم البشري, و عاد من بعد يجي الجسم الروحاني.
47
الانسان لول تخلق من التراب على خاطرو ارضي. و الانسان لخر اللي هو الرب جا من السماء.
48
و كيما اللي تخلق من التراب اهل لرض كلهم يكونوا كيفوهو, و كيما اللي من السماء اهل السماء كاملين يكونوا كيفوهو.
49
و كيما لبسنا صورة اللي جاي من التراب, نلبسوا ثاني صورة اللي جاي من السماء.
50
نقول لكم يا خاوتي: بلي الدم و اللحم ما يقدروش يورثوا الملكوت تاع الله. و الفاني ما يقدرش يورث لحياة الدايمة.
51
و هاذا سر نقول لكم عليه: ما نموتوش كلنا, بالصح كلنا نتبدلوا,
52
في لحظة في رمشة عين, كي نسمعوا البوق لخر, على خاطر راح ينفخوا في البوق, الموتى يقوموا بجسم الخلود, و احنا الحيين تتبدل الهيئة تاعنا.
53
على خاطر هاذا الجسم الفاني لازم يلبس اللي ما يفناش, و هاذا اللي يموت يلبس اللي ما يموتش.
54
و كي يلبس هاذا الفاني اللي ما يفناش, و يلبس اللي يموت هاذاك اللي ما يموتش. وقتها تتحقق الكلمة المكتوبة: "تبلع الموت في النصرة".
55
"وين شوكتك يا موت؟ وين غلبتك يا هاوية؟"
56
و شوكة الموت هي الذنوب, و قوة الذنوب تجي من الشرع.
57
بالصح الحمد لله اللي دايما ينصرنا بربنا يسوع المسيح.
58
امالا يا خاوتي لعزاز عليا, كونوا ثابتين, راسخين, متحمسين ديما في لخدمة تاع الله, و اعلموا بلي التعب تاعكم ما راحش يروح باطل.