¹ Тай шунгиом таро храми силно гласос, ковато пенелас е ефта ангеленге: Жан тай излеинен ки пув о ефта чашес е Божие гневиескере. ² Тай о първо гело тай чоргяс пи чаша ки пув; тай появисали канили тай люто рана колке манушенге, колато пиравенас о белеги е звероскоро тай колато кланиненас пес лескере образиеске. ³ О второ ангели чоргяс пи чаша андо морес; тай ов ачило ратесте, сар мударде манушестар, тай сичко живо андо морес муло. ⁴ О трето ангели чоргяс пи чаша андо реки тай андо водна изворя; тай ленгоро пани ачило ратесте. ⁵ Тай шунгиом о ангели е паниенгоро те пенел: Праведно синян Ту, Пресвято, Ковато синян, тай Ковато улан, соскето отсъдингян чука; ⁶ понеже он проливинде рат светиенгоро тай пророкиенгоро, то Туда динян лен те пиен рат. Он заслужинен давка. ⁷ Тай шунгиом (авер таро) олтари те пенел: Чука, Господи, Боже Всемогъщи, истинна тай праведна си Тере присъдес. ⁸ О четвърто ангели чоргяс пи чаша упрал о кам, колеске позволингяс пес те тарел е манушен ягаса. ⁹ А като пекле пес о мануша тари бари жега, похулинде о алав е Девлескоро, Колес си власт упрал калке язвенде, тай нана покаисале те отден Лес слава. ¹⁰ О пето ангели чоргяс пи чаша упрал о престоли е звероске; тай лескоро тай лескоро тагарипе потъмнингяс , тай о мануша данделенас пе чиба дукатар, ¹¹ тай похулинде е Небесноне Девлес ашал о дука тай о ранес ленгере, тай на покаисале пе деловиенге. ¹² О шесто ангели чоргяс пи чаша упрал и бари река Ефрат; тай шукило лакоро пани, за те приготвинел пес о дром е тагаренге тари изток. ¹³ Тай диклом те иклон таро муи е сапеске тай таро муи е звероске , тай таро муи е хохавне пророкиеске трин нечиста духовя, прилична жабенде; ¹⁴ соскето он си бесовска духовя, колато, като керен знамения, жан ко тагара е целоне вселенакере, за те киден лен за е войнаке андо велико диес е Всемогъщоне Девлескоро. ¹⁵ (Аке, авав сар чор, Блажено ковка, ковато бдинел тай пазинел пе шехя, за тена пирел нанго, тай те дикен лескере лажипнадес.) ¹⁶ Тай кидинде лен ко тан, ковато на еврейски пенел пес Армагедон*. ¹⁷ Тай о седмо ангели чоргяс пи чаша андо въздухи; тай таро храми иклило силно гласос таро престоли тай пенгяс: Свършисало. ¹⁸ Тай иклиле светкавицес тай гласовя, тай гръмовя, тай ачило баро труси, небивало, от сар съществувинен о мануша ки пув, савка труси, дики силно. ¹⁹ Тай о велико градос разделисало трине частиенде, тай о градовя е народоскере пеле; тай о Дел спомнингяс песке е великоне Вавилониеске, за те дел лес и чаша е моласа Пе яростноне гневиеса. ²⁰ Тай секо острови нашло, тай о планини нана араклиле. ²¹ Тай едро градушка, пари около иек таланти, перелас таро небес упрал о мануша; тай о мануша похулинде е Девлес ашал и язва тари градушка, соскето и язва ули твърде бари.