¹ Тай диклом е зверос, ковато иклолас таро морес тай сине лес деш шинга тай ефта шере; тай ко шинга леске - деш коронес, тай ко шере леске - богохулна алава. ² Тай о зверос, колес диклом, препелас леопардиесте, тай лескере пире сине сар пире мечкакере, тай лескоро муи - сар муи лъвоскоро; тай о сап диняс лес пи сила, по престоли тай бари власт. ³ Тай диклом иек таро шере леске, сар смъртно раниме; но лескири смъртоносно рана оздравингяс; тай и цело пув, учудиме, гели палал о зверос; ⁴ тай поклонисале е сапеске, соскето диняс пи власт е звероске; поклонисале е звероскеда, като пенде: Кой си сар калке зверосте тай кой ащи воювинел против лесте? ⁵ Тай диняс пес леске муи те хоратинел горделиво тай богохулно; диняс пес леске още власт те действинел саранда тай дуи масек. ⁶ Тай путергяс по муи те изречинел хулес против о Дел, те хулинел Лескоро алав тай Лескири скиния, а тай колка, колато живинен ко небеса. ⁷ Тай позволисало леске те воювинел против о светиес тай те побединел лен; тай диняс пес леске власт упрал секоне родиесте тай племесте, чиб тай народи. ⁸ Англал лесте поклонисале соси жителя саворе, колато живинен ки пув, секой, колескоро алав на уло запишиме таро създание е светоскоро анди книга е животоске е закланоне Бакрескири. ⁹ Ако си манушес кан, нека шунел. ¹⁰ Ако декой ингалел андо плени, тай ов андо плени ка жал; ако декой мударел мечиеса, овда требе таро мечи те овел мудардо. Ате си нужно о търпение тай и вяра е светиенгири. ¹¹ Тай диклом авере зверос, ковато иклолас тари пув; тай сине лес дуи шинга, препенас бакрескеренде, а хоратинелас сар сап. ¹² Ов упражнинелас и савори власт е първоне звероскири анде лескере присъствиесте тай принудингяс и пув тай е живеещонен лате те поклонинен пес е първоне звероске, колескири смъртоносно рана оздравингяс. ¹³ Тай керелас баре знамения, жи оте, кай кергяс яг те ухлел таро небес ки пув англал о мануша. ¹⁴ Тай хохавелас и живеещонен ки пув чрез о знамения, колато сине леске позволиме е керел англал о зверос, като пенелас е живеещоненге ки пув те керен образи е звероске, ковато уло раниме таро мечи тай оживингяс. ¹⁵ Тай позволингяс пес леске те дел дихание е звероскере образиеске, тай е звероскоро образи те захоратинел; също чука те керел, кай те овен избита колка, колато нана кланинен пес е звероскере образиеске. ¹⁶ Тай принудинелас саворен, цикне тай баре, барвале тай чоре, свободна тай робя, те поставинел пес ленге белеги ки десница ленге или ленгере чекатенде; ¹⁷ за тенащи никой те кинел или те бикнел, освен ковка, ковато пиравел белегиеске о алав е звероскоро, или о число лескере алавескоро. ¹⁸ Ате си нужно мъдрост; ковато си разумно, нека сметнинел о число е звероскоро, соскето си число манушескоро; а лескоро число си шовшел пиндудеш тай шов.