¹ Тай палал о шесто диес Исус лилас Петър, Яков тай лескере пралес Йоан, тай ингалгяс лен иеке уче планинате коркоресте. ² Тай преобразисало англал ленде;Лескоро муи светингяс сар о кам, а Лескере шехя ачиле парне сар и светлина. ³ Тай аке, явисале ленге Мойсей тай Илия, колато хоратиненас пес Леса. ⁴ Тай Петър захоратингяс, тай пенгяс е Исусеске: Девла, лачес си те овас ате; ако мангес, ка керав ате трин шатрес Туке иек, е Мойсейеске иек тай иек е Илияске. ⁵ А жикай ов още хоратинелас, аке, светло облаки засенингяс лен; тай аке, таро облаки гласос, ковато пенгяс: Кавка си Моро възлюбено Чаво, анде Колесте си Моро благоволение, Лес шунен. ⁶ Тай о ученикя, като шунде давка, пеле упрал мосте тай бут дараниле. ⁷ А Исус приближисало паш ленде, допирингяс пес жи ленде тай пенгяс: Ухкиен, ма даран! ⁸ Тай он, като ваздинде яка, на дикле никас, освен Исус коркоро. ⁹ Тай като ухленас тари планина, Исус пенгяс ленге: Никаске ма съобщинен далке видениеске, жикай о Човешко Чаво на възкреснинел таро муле. ¹⁰ О ученикя Лескере пучле Лес: Соске тогава пенен о книжникя, кай Илия требе първо те авел? ¹¹ А Ов в отговор пенгяс: Наистина Илия авел тай ка възтановинел всичко. ¹² Но пенав туменге, кай Илия вече ало, тай на пенджарде лес, но керде леса со мангле песке. Също чука о Човешко Чаво ка страдинел лендар. ¹³ Тогава о ученикя ахалиле, кай хоратинел ленге за Йоан Кръстител. ¹⁴ Тай като але ко народос, приближисало жи Лесте иек мануш, ковато пело кочиенде англал Лесте тай пенгяс: ¹⁵ Девла, смилине тут упрал ме честе, соскето си епилептики тай зле страдинел; понеже перел анди яг тай често андо пани. ¹⁶ Тай анде лес паш Тере ученикиенде; но он нащине изцеринен лес. ¹⁷ Исус в отговор пенгяс: О, роде невярващо тай извратено, жи кана ка овав туменца, Жи кана ка търпинав тумен? Анен лес ате паш Манде. ¹⁸ Тай Исус смъмрингяс е бесос, тай ов иклило лестар; тай о чаво оздравингяс таро също сахати. ¹⁹ Тогава о ученикя але паш о Исус коркоресте тай пенде: Соске аме нащине гонинас лес? ²⁰ Ов пенгяс ленге: Ашал тумаре маловериеске. Соскето истина пенав туменге: Ако иси тумен вяра кити синапово сърнос, ка пенен калке планинаке: Местин тут атар оте, тай ой ка местинел пес; тай нищо нанай те овел туменге невъзможно. ²¹ А кавка роди на иклол, освен молитваса тай постиеса. ²² Тай като бешенас анди Галилея, Исус пенгяс ленге: О Човешко Чаво ка овел предиме андо васта е манушенге, ²³ тай ка мударен Лес; тай ко трето диес ка овел възкресиме. Тай он бут наскърбисале. ²⁴ А като але андо Капернаум, о събирачя е дуие драхменгере за ко храми приближисале паш о Петър тай пенде: Тумаро Учители на платинел ли о дуи драхмес? ²⁵ Ов пенгяс: Платинел. Тай като диняс кере, Исус изпреварингяс лес, тай пенгяс леске: Со мислинес, Симоне, О земна царе кастар киден данъки или налоги? Пе чавендар или таро чужда? ²⁶ А като пенгяс: Таро чужда, Исус пенгяс леске: Като си чука, ленгере чаве си свободна. ²⁷ Но за тена съблазнинас лен, жа ко езерос, чив въдица тай икал е мачес, ковато първо закачинел пес, тай като путрес о муи лакоро, ка аракес иек статири; ле лес тай де лес ленге Манге тай туке.