¹ Тай като викингяс е дешудон, диняс лен сила тай власт упрал саворе бесовиенде, тай те изцелинен болестия. ² Тай бичалгяс лен те проповединен е Божие тагарипе тай те изцелинен е насвален. ³ Тай пенгяс ленге: Ма лен нищо за ко дром- ни тояга, ни торба, ни маро, ни парес, нито те овен тумен по дуи гада. ⁴ Тай анде коле кересте ден, оте бешен, тай отар тръгнинен дроместе. ⁵ Тай ако декой нана приеминел тумен, като икльон колке градостар, тресинен о прахос тумаре пирендар за свидетелство против ленде. ⁶ Тай он тръгнинде, тай жанас ко гава, тай проповединенас о благовестие, тай изцелиненас всекате. ⁷ А о четверовластники о Ирод шунгяс всичконаске, ковато ачолас, тай сине андо недоумение; соскето десаве пененас, кай о Йоан възкръснингяс таро муле; ⁸ авер па; кай о Илия явисало; а авер, кай иек таро старовременна пророкия възкръснингяс. ⁹ Тай пенгяс о Ирод: е Йоанес ме обезглавингиом; но кой си Кавка, за Колеске шунав салка букя? Тай мангелас те дикел Лес. ¹⁰ Тай като ирисале о апостола, разкажинде е Исусеске со извършиндесас; тай Ов лилас лен тай оттеглисале коркоресте анде уединоне танесте карик иеке градосте, наречиме Витсаида. ¹¹ А о множества, като ахалиле давка, геле палал Лесте; тай Ов посрещнингяс лен с готовност, тай хоратинелас ленге е Девлескере тагарипнаске, тай изцелинелас колкен, колато сине лен нужда таро изцеление. ¹² Тай като почнингяс о диес те превалинел, о дешудуи приближисале тай пенде Леске: Размук е народос, за те жан андо околна гава тай колибес те нощувинен тай те аракен песке хабе, соскето ате синям уединоне танесте. ¹³ Но Ов пенгяс ленге: Ден лен туме те хан. А он пенде: Нанай амен по бут таро панч маре тай дуи маче, освен ако на жас тай кинас хабе саворе каалке люденге? ¹⁴ ( Соскето сине около панч хиляда мруша). Тай пенгяс Пе ученикиенге: Траден лен те бешен купчинкенде по около пинда жене. ¹⁵ Он керде чука тай традинде саворен те бешен. ¹⁶ А Ов лилас о панч маре тай о дуи маче, диклас карик о небес тай благословингяс лен; тай като паглас лен, диняс е ученикиен те товен англал о народос. ¹⁷ Тай хале, тай саворе наситисале; тай ваздинде о къшея, колато ачиле лен, дешудуи кошя. ¹⁸ Тай иеквар, като Ов молинелас пес коркоресте, тай о ученикия сине Леса, пучляс лен: Според о народос кова синиом Ме? ¹⁹ А в отговор он пенде: Иек пенен, кай синян о Йоан Кръстител; а авер - о Илия; авер па, кай иек таро старовременна пророкия възкръснингяс. ²⁰ Тогава пенгяс ленге: А според туменде кой синиом? О Петър в отговор пенгяс: О Божие Помазаники*. ²¹ А Ов заръчингяс ленге тай заповедингяс тена пенен давка никаске, като пенгяс: ²² О Човешко Чаво требе бут те страдинел, те овел отхвърлиме таро старейшинес, о главна свещеникия тай о книжникия, те овел мудардо тай ко трин диес те овел възкресиме. ²³ Пенгяс още саворенге: Ако мангел декой те авел палал Манде, нека те отречинел пес пестар, нека пиравел по кръстос секо диес тай нека следвинел Ман. ²⁴ Соскето който мангел те спасинел по животос, ка нашалел лес; а който нашалел по животос ашал Манге, ов ка спасинел лес. ²⁵ Понеже сави полза е манушеске, ако спечелинел цело светос, а нашалел или ощетинел пес? ²⁶ Соскето, ако лажал декой Мандар тай Ме думендар, ов о Човешко Чаво да ка лажал лестар, като ка авел ан Пере славате тай анди слава на Отца, тай е святоне ангеленгири. ²⁷ А пенав туменге и истина, иси декой таро ате стояща, колато нисар нанай те вкусинен мериба, жи кай на дикен о Божие тагарипе. ²⁸ Тай около охто диес след като пенгяс давка, Ов лилас Песа Петър, Йоан тай Яков тай качисало ки планина те молинел пес. ²⁹ Тай като молинелас пес, о види Лескере москоро изменисало, тай Лескоро облекло ачило парно тай бляскаво. ³⁰ Тай аке, дуй мруша хоратиненас песке Леса; он сине о Моисей тай о Илия, ³¹ колато явисале анди слава тай хоратиненас Лескере мерибнаске, която предстоинелас те изпълнингьол андо Ерусалим. ³² А о Петрес тай колка, колато сине леса, налегнингяс лен соиба; но като ухтиниле, дикле и слава Лескири тай е дуие мрушен, колато бешенас Леса. ³³ Тай като он разделиненас пес Леса, о Петрес пенгяс е Исусеске: Наставниче, лачес си те овас ате; тай нека те керас трин скиниес, Туке иек, е Мойсейеске иек, тай иек е Илияске, без те жанел со хоратинел. ³⁴ Тай жи кай пенелас давка, ало облаки, тай засенингяс лен; тай о ученикия дараниле, като дине андо облаки. ³⁵ Тай ало таро облаки гласос, ковато пенгяс: Кавка си Моро Чаво. Лес шунен! ³⁶ Тай като престанингяс о гласос, о Исус араклило коркоро. Тай он замълчинде тай презал колке диесенде нана пенде никаске нищо далкестар, ковато диклесас. ³⁷ Тай ко следващо диес, като ухлиле тари планина, ресло Лес баро множествос. ³⁸ Тай аке, иек мануш таро народос пищингяс: Учителю, молинаман Туке те дикес ме чес, соскето си манге единствено чадос. ³⁹ Духос долел лес тай ов изведнъж запищинел, тай о духос сгърчвинел лес чука, кай ов запенинел пес, тай като згърчинелес, едвам напуснинел лес. ⁴⁰ Тай помолингьом Тере ученикиен те гонинен лес, ама нанащине. ⁴¹ О Исус в отговор пенгяс: О, роде невярващо тай извратено! Жи кана ка овав туменца тай ка търпинав тумен? Ан те чавес ате. ⁴² Тай жи кай още авелас, о бесос тръшнингяс лес тай сгърчингяс лес силно; а о Исус смъмрингяс е нечистоне духос, изцелингяс е чес тай ирингяс лес лескере дадесте. ⁴³ Тай саворе удивиненас пес е Девлеске ко величие. А жи кай саворе чудиненас пес всичконаске, ковато керелас, Ов пенгяс Пе ученикиенге: ⁴⁴ Вложинен ан тумаре каненде калка думес, соскето о Човешко Чаво ка овел предиме манушескере вастенде. ⁴⁵ Но он нана ахалиле давка слово; ов сине покриме лендар; за тена ахалон лес; а даранас те пучен Лес далке словоске. ⁴⁶ Тай ваздисало машкар ленде препиране кова лендар ка овел по-баро. ⁴⁷ А о Исус, като диклас со си ко сърцес ленге, лилас иеке чавес, поставингяс лес паш Песте тай пенгяс ленге: ⁴⁸ Който приеминел калке чавес анде Мере алавесте, Ман приеминел; тай който приеминел Ман, приеминел Калкес, ковато бичалгяс Ман; соскето, ковато си най-цикно машкар саворенде туменде, ов ка овел баро. ⁴⁹ А о Йоан захоратингяс, тай пенгяс: Наставниче, диклам иеке манушес те гонинел бесовиен анде Тере алавесте тай забранингям леске, соскето на пирел аменца. ⁵⁰ А о Исус пенгяс леске: Ма забранинен леске; соскето, ковато нанай против туменде, карик туменде си. ⁵¹ Тай като навършиненас пес о диеса те възнесинел пес, Ов ирингяс По муи карик о Ерусалим. ⁵² Тай проводингяс англал Песте пратеникиен, колато геле тай дине иеке самарянсконе гавесте те приготвинен за Леске. ⁵³ Но нана приеминде Лес, соскето Лескоро муи сине ириме карик о Ерусалим. ⁵⁴ Като дикле давка, Лескере ученикия о Яков тай о Йоан пенде: Господи, мангес ли те заповединас те перел яг таро небес тай те изтребинел лен сарто кергяс о Илия? ⁵⁵ А Ов ирисало, тай смъмрингяс лен; тай пенгяс:'' Туме нана жанен саве духосте синиен; соскето о Човешко Чаво нана ало те погубинел човешка души, а те спасинел.'' ⁵⁶ Тай геле авере гавесте. ⁵⁷ А като пиренас ко дром, иек мануш пенгяс Леске: Ка следвинав тут, кате да те жас. ⁵⁸ О Исус пенгяс леске: Е лисицен иси лен леговище тай о небесна птицес - гнездовя; а о Човешко Чаво нанай кате шеро те подслонинел. ⁵⁹ А авереске пенгяс: Пир палал Манде. А ов пенгяс: Господи, позволине манге първо те жав те паронав ме дадес. ⁶⁰ Но Ов пенгяс леске: Мук е мулен те паронен пере мулен; а ту жа тай разгласине о Божие тагарипе. ⁶¹ Пенгяс аверда: Ка авав палал Туте, Господи; но първо позволине манге те сбогувинаман ме домашноненца. ⁶² А о Исус пенгяс леске: Никой, ковато тогяс по вас ко ралос тай дикел напапале, нанай за ко Божие тагарипе.