¹ 1 След като свършингяс саворе Пере речия карик о люде, колато шуненас Лес, о Исус диняс андо Капернаум. ² А десаве стотникиескоро слугас, ковато сине леске мило, боледувинелас жи мерибнасте. ³ Тай като шунгяс е Исусеске, бичалгяс жи Лесте десаве юдейска старейшинес те помолинен Лес те авел тай те изцелинел лескере слугас. ⁴ Тай он але паш о Исус, тай молиненас пес Леске усърдно, като пененас: Ов заслужинел те керес леске давка; ⁵ соскето дехел амаре народос, тай ов построингяс аменге и синагога. ⁶ А като о Исус пирелас ленца тай нана сине вече дуре таро кер, о стотники бичалгяс жи Лесте амален те пенен Леске: Господи, ма кер туке трудос, соскето нана синиом достоино те дес телал ме сряхате; ⁷ далкеске да на счетингиом ман достоино те авав паш Туте; пен само дума, тай мо слугас ка оздравинел. ⁸ Соскето меда синиом мануш, поставиме под власт, тай иси ман подчинена манге войникия; тай пенав иекеске: Жа, тай ов жал; тай авереске: Ела!, тай авел; тай ме слугаске: Кер кавка!, тай керел лес. ⁹ Като шунгяс давка, о Исус почудингяс пес леске, ирисало тай пенгяс е народоске колато пиренас палал Лесте: Пенав туменге, нито андо Израил араклом дики вяра. ¹⁰ Тай като о бичалде ирисале андо кер, аракле е слугас оздравяло. ¹¹ А сиго палал далкесте о Исус гело иеке градосте, наречиме Наин; тай Леса пиренас Лескере ученикия тай иек баро множество. ¹² Тай като приближисало жи ки градско порта, аке, изнесиненас мулес, иек чаво пе даяке, която сине вдовица; тай ласа сине баро множество таро градос. ¹³ Тай о Дел, като диклас ла, смилисало упрал лате тай пенгяс лаке: Ма ров. ¹⁴ Тогава приближисало тай доприсало жи ко носилос; а о носачия спиринде. Тай пенгяс: Чавеа, пенав туке, ухти. ¹⁵ Тай о муло ваздисало тай бешло, тай почнингяс те хоратинел. Тай о Исус диняс лес лескере даяке. ¹⁶ Тай дар долгяс саворен, тай славиненас е Девлес, тай пенен: Велико пророки ваздисало машкар аменде; тай: О Дел посетингяс Пере люден. ¹⁷ Тай давка, ковато пененас, разнесисало за Леске ки цело Юдея гай ки цело околност. ¹⁸ Тай о ученикия е Йоанескере известинде леске всичко давка. ¹⁹ Тай о Йоан викингяс дуиен пе ученикиендар, тай бичалгяс лен ко Дел те пенен: Ту ли синян Ковка, Ковато иси те авел, или аверес те жарас? ²⁰ Тай като але Лесте о мануша, пенде: О Йоан Кръстител бичалгяс амен жи Туте те пенас: Ту ли синян Ковка, Ковато иси те авел, или аверес те жарас? ²¹ Тай ко също сахати Ов изцелингяс мнозинатаро болестия тай язвес, тай зла духовя, тай мнозиненге подарингяс зрение. ²² Тогава в отговор пенгяс ленге: Жан тай съобщинен е Йоанеске кавка, ковато диклен тай шунгиен, кай коре задикен, куца запирен, прокажена очистинен пес тай кашуке зашунен; муле възкресинен тай е сиромасиенге проповединел пес о благовестие. ²³ Тай блажено ковка, ковато нана съблазнинел пес ашал Манге. ²⁴ А като геле песке о бичалде таро Йоан, о Исус почнингяс те хоратинел е народоске таро Йоан: Со иклилен те дикен анди пустиния? Тръстика ли тари балвал разлюляно? ²⁵ Но со иклилен те дикен? Манушес ли анде ковле шехиенде урявдо? Аке, о великолепно урявде тай колка, колато живинен разкошно, си андо тагаренгере дровци. ²⁶ Но со иклилен те дикен? Пророкиес ли? Ва, пенав туменге, тай по бут таро пророки. ²⁷ Кавка си ковка, за колеске си пишиме: " Аке, Ме бичалав Ме вестителес англал Тере мосте, ковато ка устроинел Мо дром англал Туте". ²⁸ Пенав туменге: Машкар о биянде таро жувля нанай по-баро таро Йоан; обаче, о по-цикно андо Божие тагарипе си по-баро лестар. ²⁹ ( Тай саворе люде тай о бирникия, като шунде давка, признавинде е Девлескири правда, соскето кръстиндесас пес е Йоанескере кръщениеса. ³⁰ А о фарисея тай о законникия осуетинде е Девлескири воля спрямо песте, понеже нана кръстинде пес лестар.) ³¹ А состе те уподобинав е манушен калке поколениестар? Тай состе препен? ³² Он препен чавенде, бешле ко пазари, колато пищинен иек авереске, тай пенен: Башалгям туменге, тай нана келгиен; ридаингям, тай нана руниен. ³³ Соскето о Йоан Кръстител ало, ковато нито маро хал, нито мол пиел, а пенен: Бяс иси лес. ³⁴ Ало о Човешко Чаво, ковато хал тай пиел, тай пенен: Аке мануш лакомо тай винопиицос, амал е бирникиенге тай е грешникиенге. ³⁵ Но пак и мъдрост оправдинел пес пе саворе чадовиендар. ³⁶ Тай иек таро фарисея поканингяс Лес те хал леса; тай Ов диняс андо фарисеево кер тай бешло ки софра. ³⁷ Тай аке, иек жувли таро градос, която сине грешница, като ахалили, кай бешел ки софра андо фарисеево кер, ангяс алабастрено съдос мироса. ³⁸ Тай като зачили палал ко пире Леске, тай ровелас, почнингяс те обливинел Лескере пире асвенца. После коселас лен пе баленца, чумиделас лен тай макелас лен е мироса. ³⁹ А като диклас давка о фарисеи, ковато поканингясас Лес, пенелас анде песте: Кавка ако сине пророки, ка жанелас коя тай сави си и жувли, която допиринел пес жи Лесте, кай си грешница. ⁴⁰ А о Исус в отговор пенгяс леске: Симоне, иси ман варесо те пенав туке. А ов пенгяс: Учителю, пен! ⁴¹ Десаво си заемодавцос исине лес дуи длъжникия; о иек дължинелас панч шел динария, а окова пинда. ⁴² Тай понеже нана сине лен соса те платинен леске, ов простингяс е донгеда. Тай чука, кова лендар ка задехел лес по бут? ⁴³ В отговор о Симон пенгяс: Мислинав, кай ковка, колеске простингяс по бут. А Ов пенгяс леске: Право отсъдингян. ⁴⁴ Тай като ирисало карик и жувли, пенгяс е Симонеске: Дикес ли калке жувля? Диниьом ан те кересте, тай ту пани Ме пиренге нана динян; а ой асвенца пергяс Ме пире, тай пе баленца кослас лен. ⁴⁵ Ту целувка нана динян Ман; а ой, отсар диниьом, нана престанингясн те чумидел Ме пире. ⁴⁶ Ту маслоса нана помажингян Мо шеро; а ой мироса помажингяс Ме пире. ⁴⁷ Далкеске пенав туке: Простинен пес лаке бут безеха (соскето ой дехингяс бут); а каске хари простинел пес, ов хари дехел. ⁴⁸ Тай пенгяс лаке: Простинен пес туке те безеха. ⁴⁹ Тай калка, колато бешенас Леса ки софра, почнинде те пенен машкар песте: Кова си Кавка, ковато безеха да простинел? ⁵⁰ Тай пенгяс е жувляке: Тере вяра спасингяс тут; жа туке мириеса.