¹ Тай пенгяс Пе ученикиенге: Нанай възможно тена авен о съблазнес; но горко колкенге, чрез коленде авен! ² По-лачес ка овел леске те окачинел пес иек баро воденично бар лескере меняте тай те овел чивдо андо морес, а ма те съблазнинел иек калкендар таро цикне. ³ Внимавинен туменге. Ако прегрешинел то прал, смъмрине лес; тай ако покаинел пес, простине леске. ⁴ Тай ефта дром андо диес ако съгрешинел против туте, тай ефта дром иринел пес карик туте тай пенел: Покаинаман, простине леске. ⁵ Тай о апостола пенде е Девлеске: Приде аменге вяра. ⁶ А о Дел пенгяс: Ако иси тумен вяра, кити синапово зърнос, ка пененас калке черницаке: Изкоренине тут тай насадине тут андо морес, тай ка шунел тумен. ⁷ А кова тумендар, ако иси лес слуга те оринел леске или те пасинел леске, ка пенел леске веднага, щом авел песке тари нива: Де те хас? ⁸ Напротив, нанай ли те пенел леске: Приготвине варесо те вечеринав, стегин тут, тай пошетине манге, жи кай хав тай пияв, тай палал далкесте ту ка хас тай ка пиес? ⁹ Нима ка благодаринел пе слугаске, кай кергяс со уло заповедиме? На верувинав. ¹⁰ Също чука тумеда, като керен всичко, ковато си туменге заповедиме, пенен: Аме синям безполезна слуги; кергям само давка, ковато улам длъжна те керас. ¹¹ Тай андо Поро пътуване карик о Ерусалим Ов накелас и граница машкар и Самария тай Галилея. ¹² Тай като делас иеке гавесте, ресле Лес деш прокажена, колато, като спиринде дурал, ¹³ пищинде силноне гласоса, тай пенде: Исусе Наставниче, смилине тут упрал аменде! ¹⁴ Тай като диклас лен, пенгяс ленге: Жан, покажинен тумен е свещеникиенге. Тай като жанас, очистисале. ¹⁵ Тай иек лендар, като диклас, кай си изцелиме, ирисало тай силноне гласоса славинелас е Девлес, ¹⁶ тай пело мосте ко пире е Исусеске, тай благодаринелас Леске. Тай ов сине самарияни. ¹⁷ А о Исус в отговор пенгяс леске: Нана очистисале ли деш? А кате си окола еня? ¹⁸ Нана араклиле ли авер те иринен пес тай те възден слава е Девлеске, освен кавка другоплеменики? ¹⁹ Тай пенгяс леске: Ухти тай жа туке; тери вяра изцелингяс тут. ²⁰ А о Исус, пучло таро фарисея кана ка авел о Божие тагарипе, в отговор пенгяс ленге: О Божие тагарипе нана авел чука, кай те забележинел пес; ²¹ нито ка пенен: Аке ате си! Или: Оте си! Соскето, аке о Божие тагарипе си андре анде туменде. ²² Тай пенгяс е ученикиенге: Ка авен диеса, като ка манген те дикен поне иек таро диеса е Човешконе Чавескере, тай нанай те дикен. ²³ Тай като пенен туменге: Аке, оте си! Или: Аке, ате си! Тена жан, нито те прастан палал ленде. ²⁴ Соскето, сарто и светкавица, като блеснинел таро иек крайос е хоризонтиескоро, светинел жи околе крайосте е хоризонтиескоро, чука ка овел о Човешко Чаво анде Пере диесесте . ²⁵ Но първо Ов требе те пострадинел бут тай те овел отхвърлиме калке поколениесар. ²⁶ Тай сарто ачило андо Ноева диеса, чука ка овел андо диеса е Човешконе Чавеске; ²⁷ ханас, пиенас, прандененас жи ко диес, като о Ной диняс андо ковчеги, тай ало о потопи, тай погубингяс лен саворен. ²⁸ Чука също, сарто ачило андо Лотова диеса; ханас, пиенас, киненас, бикненас, садиненас тай градиненас, ²⁹ а андо диес, като о Лот иклило таро Содом, яг тай сяра навалинде таро небес тай погубинде лен саворен; ³⁰ подобно калкесте ка овел андо диес, като о Човешко Чаво ка явинелпес. ³¹ Андо ковка диес, ковато аракльол ко покриви пе кереске, ако лескере вещя си кере, тена ухлел те лел лен; също ковато си ки нива, тена иринел пес напапале. ³² Помнинен е Лотиескере ромня. ³³ Който мангел те спечелинел по животос , ка нашалел лес; а който нашалел лес, ка опазинел лес. ³⁴ Пенав туменге, анде колке ракяте дуи ка овен иеке леглосте; иек ка лел пес, а окова ка мукел пес. ³⁵ Дуй жувля ка мелинен заедно; иек ка лел пес, а окоя ка мукел пес. ³⁶ Дуй ка овен ки нива; иек ка лел пес, а окова ка мукел пес. ³⁷ Отговоринен леске, тай пенен: Кате, Девла? А Ов пенгяс ленге: Кате си о трупос, оте ка киден пес о орела.