¹ Пралален мере, тена икерен и вяра амаре прославеноне Девлескири о Исус Христос с лицеприятие. ² Соскето, ако дел ан тумаре синагогате мануш златноне ангрустяса тай шукаре шехиенца, а дел чорода оплесконе шехиенца, ³ тай дикен с почит карик колкесте, ковато си е шукаре шехиенца тай пенен: Ту беш ате шукаре танесте; а е чорореске пенен: Ту беш оте, или : Беш ме пиренде, ⁴ нана керен ли различия машкар туменде тай нана ачон ли пристрастна съдиес? ⁵ Шунен, любезна мере прала: нана избирингяс ли о Дел колкен, колато си чоре андо светска букя, барвале вяраса тай наследникия е тагарипнаске, ковато обещингяс калкенге, колато дехен Лес? ⁶ А туме опозорингиен е чорорес. Нали тумаре барвале угнетинен тумен тай влачинен тумен ко съдилища? ⁷ Нали он хулинен о почтено алав, колеса именувинен тумен? ⁸ Обаче ако изпълнинен о царско закони според о Писание: ,,Те дехес те ближнонес сар туте," лачес керен. ⁹ Но ако дикен ко муи, грехос керен, тай таро закони осъдинен тумен сар престъпникия. ¹⁰ Соскето, който пазинел о цело закони, а съгрешинел иек варесо, ка овел виновно андо всичко. ¹¹ Понеже Ковка, Ковато пенгяс: ,,Ма прелюбодействине", чука кай ако нана прелюбодействинес, а па мударес, ачилан престъпники е закониескоро. ¹² Чука хоратинен тай чука постъпинен , сар мануша, колато ка овен съдиме ко закони е свободаке. ¹³ Соскето о съдос си немилостиво карик калкесте, ковато на покажингяс милост. И милост тържествувинел упрал о съдос. ¹⁴ Сави полза, пралален мере, ако декой пенел, кай си лес вяра, а нанай лес дела? Ащи ли сайка вяра те спасинел лес? ¹⁵ Ако десаво прал или десави пен си нанге тай ачиле без ежедневно хабе, ¹⁶ тай декой тумендар пенел ленге: Жантуменге мириеса, дано овен такярде тай парварде, а нана ден лен со требел ленгере телоске, сави полза? ¹⁷ Чука и вяра, ако нанай дела, коркори пестар си мули. ¹⁸ А декой ка пенел: Тут си вяра, но ман си дела; ако ащи, покажине манге ти вяра без дела, но ме ка покажинав туке ми вяра таро дела мере. ¹⁹ Ту верувинес, кай иси само иек Дел. Лачес керес; о бесовяда верувинен тай издран. ²⁰ Обаче мангес ли те пенджарес, о суетно мануш, кай вяра, отделиме таро дела, си безплодно? ²¹ О Авраам, амаро отеци, нана оправдингяс ли пес чрез о дела, като принесингяс пе чавес о Исаак ко жертвеники? ²² Ту дикес, кай и вяра действинелас заедно лескере деловиенца тай кай таро деловя усъвършенствисали и вяра; ²³ тай изпълнисало о Писание, ковато пенел: ,, О Авраам верувингяс е Девлеске; тай давка вменисало леске за правда;" тай наречисало е Девлескоро амал. ²⁴ Дикен, кай чрез о дела оправдинел пес о мануш, а ма само чрез и вяра. ²⁵ Чука също и блудница и Раав нана оправдингяс ли пес чрез о дела, като приемингяс е пратеникиен тай бичалгяс лен бързо презал авере дроместе? ²⁶ Соскето, сарто о телос, отделиме таро духос, си муло, чука и вяра, отделиме таро дела, си мули.