¹ Далкеске аме синям длъжна те внимавинас по бут колкеске, ковато шунгям, тена нашалас лес декана. ² Соскето, ако о словос, хоратиме чрез о ангела, окажисало верно, тай секо престъпление тай непокорство получинел справедливо отплата, ³ то сар ка избегвинас аме, ако пренебрегнингям иек дики велико спасение? Спасение, ковато, отначало прогласиме таро Дел , потвърдисало машкар аменде калкендар, колато шундесас Лес; ⁴ като съсвидетелствингяс ленге о Дел чрез о знамения тай чудеса, чрез разноне великоне деловиенде тай чрез о раздаване е Святоне Духоскоро според Пери воля. ⁵ Соскето ма ангеленге подчинингяс Ов о бъдещо светос, за колеске хоратинас; ⁶ но декой заявингяс декате, като пенгяс: "Со си о мануш, тай те помнинес лес, или човешко чаво, тай те посетинес лес? ⁷ Ту кергян лес само хари по-телуно таро ангела, славаса тай честяса увенчингян лес, тай поставингян лес упрал о деловия Те вастенгере; ⁸ всичко подчинингян телал о пире леске". А като подчинингяс леске всичко, нана муклас нищо неподчинено леске; акана обаче още на дикас те овел леске всичко подчинено. ⁹ Но дикас е Исусес, Ковато уло кердо хари по-телуно таро ангела, кай си увенчиме славаса тай честяса ашал о претърпяно мериба, тай е Девлескере благодатаса те вкусинел мериба секоне манушеске. ¹⁰ Соскето сине уместно Ковка, ашал Колеске си всичко, тай чрез Колесте си всичко, като привединел буте чавен анди слава, те усъвършенствинел чрез о страдания о Начинатели ленгере спасениескоро. ¹¹ Понеже Ковка, Ковато освещинел, тай колка, колато освещинен пес, саворе си таро Иек; далкеске Ов нана лажал те наречинел лен прала, ¹² като пенел: "Ка възвестинав То алав Ме праленге; ка хвалинав Тут машкар о събрание". ¹³ Тай пак: "Ме Лесте ка уповинав ман". Тай пак: "Акеталом Ме тай о чаве, колато диняс Ман о Дел". ¹⁴ Тай чука, понеже о чаве си същества тари общо плът тай рат, то Ов, подобно ленде, лилас участие адно също, за те унищожинел чрез о мериба колкес, колес иси власт упрал о мериба, демек о бенг, ¹⁵ тай те избавинел саворен колкен, колато ашал и дар таро мериба презал пе целоне животосте уле подложиме ко робство. ¹⁶ (Соскето наистина Ов на помагингяс е ангеленге, но помагингяс е Авраамовоне потомствоске.) ¹⁷ Далкеске требеше те препел андо всичко Пе праленде, за те овел милостиво тай верно първосвещеники анди служба е Девлеске, за те извършинел умилостивение е безехенге е люденгере. ¹⁸ Понеже тай Коркоро Ов пострадингяс сар изкушиме, ащи е изкушаваноненге те помагинел.