¹ Постоянствинен андо братолюбие. ² Ма бистрен о гостолюбие; понеже чрез лесте декой, без те жанен, приеминде на гости ангелес. ³ Помнинен е панлен, сар кай синиен ленца заедно панле, о страдаща, понеже синиен умеда андо телос. ⁴ О прандеба нека овел на почит саворенге тай о легло неосквернено; соскето о Дел ка съдинел е блудникиен тай е прелюбодеициен. ⁵ Ма впримчинен тумен андо сребролюбие: задоволинен тумен колкеса, ковато си тумен, соскето коркоро о Дел пенгяс: "Нисар нанай те мукав тут тай нисар нанай те бистрав тут"; ⁶ чука кай дързостно пенас: " О Дел си манге помощники; нанай те дарав; со ка керел манге о мануш?" ⁷ Помнинен колкен, колато уле туменге наставникия, колато хоратинде туменге о Божие словос; тай като садикен тумен анди сетнина ленгере начиниесте животоске, подражинен ленгере вярате. ⁸ О Исус Христос си о също ибло, авдиес тай жи ко векос. ⁹ Ма увлечинен тумен ко разна чужда учения; соскето си лачес о сърцес те укрепинел пес благодатаса, а ма наредбенца ястиенге, колендар на получинде полза колка, колато водиненас пес* лендар. ¹⁰ Амен иси олтари, колестар нанай право те хан о служеща анди скиния. ¹¹ Соскето тарен пес аври таро стани о теловя е животноненгере, коленгоро рат о първосвещеники денгярел андо светилище сар жертва е безехенге. ¹² Далкеске о Исус, за те осветинел е народос чрез Поро Собствено рат, пострадингяс аври таро градска портес. ¹³ Тай чука, нека иклас амеда паш Лесте аври таро стани, като понесинас позори за Леске. ¹⁴ Соскето ате нанай амен постояно гради, но родас о бъдещо. ¹⁵ Далкеске чрез Лесте нека принесинас е Девлеске непрестанно хвалебно жертва, демек плоди тари вуща, колато изповединен Лескоро алав. ¹⁶ А ма бистрен те керен благодеяния тай те споделинен околенца тумаре блага; соскето салка жертвес си угодна е Девлеске. ¹⁷ Овен послушна тай покоринен тумен тумаре наставникиенге (соскето он дбинен тумаре душенге сар отговорна за ленге), за те изпълнинен давка бдене лошаласа, а ма въздишкенца; соскето те бдинен въздишкенца, нанай те овел полезно туменге. ¹⁸ Молинен тумен аменге; соскето синям уверена, кай си амен чисто съвест тай мангас те постъпвинас всичконасте честно. ¹⁹ А особено молинав ман туменге те керен давка, за те овав туменге по-сиго ириме. ²⁰ А о Дел е мириескоро, Ковато чрез о рат е иеке вечноне заветиескоро ваздингяс таро муле е великоне Пастириес е овценге, амаро Дел о Исус, ²¹ дано усъвършенствинел тумен андо секо лачо варесо, за те керен Лескири воля, като изработвинел анде туменде кавка, ковато си угодно англал Лесте, чрез о Исуса Христа, Колеске те овел слава андо вечна вековя. Амин. ²² Тай молинав тумен , пралален, тена овел туменге паро кавка увещателно словос; соскето накратко пишингиом туменге. ²³ Те жанен, кай амаро прал о Тимотей си мукло, колеса, ако ресел сиго, ка авав те дикав тумен. ²⁴ Поздравинен саворе тумаре наставникиен тай саворе светиен. Поздравинен тумен калка, колато си тари Италия. ²⁵ Благодат те овел саворенца туменца. Амин.