¹ Тай палал о панч диес о първосвещенники о Анания ухлило десаве старейшиненца тай иеке адвокатиеса, ко алав Тертил, колато подине е управителеске жалба против о Павел. ² Тай като викинде лес, о Тертил почнингяс те обвининел лес, като пенелас: Понеже чрез туте, честити Феликсе, лошанас баре спокойствиеске тай понеже чрез тери предвидливост поправинен пес злини анде калке амаре народосте, ³ то аме пердоне благодарностиенца по секакво начини тай признавинас давка. ⁴ Но за тена отекчинав тут по бут, молинав тут те овел тут снизхождение тай те шунес амен накратко; ⁵ понеже араклам, кай кавка мануш си заразители тай размирники машкар саворе юдеиенде ки вселена, още водители да е назарейсконе ересаке; ⁶ ковато опитисало о храми да те осквернинел; но аме уловингям лес тай манглам те съдинас лес амаре закониесте; ⁷ но о хилядники о Лисий ало тай баре насилствоса изтръгнингяс лес амаре вастендар, тай заповедингяс лескере обвинителенге те авен паш туте.] ⁸ А ту, като коркоро изпитинес лес, ка ащи ахалос лестар всичко давка, за соске обвининас лес. ⁹ О юдея да потвърдинде, като пенен, кай давка си верно. ¹⁰ А като о управители кимнингяс е Павелеске те лел и дума, ов отговорингяс: Понеже жанав, кай от бут бреша ту улан съдия калке народоске, ме на драго сърцес хоратинав анде мере защитаке; ¹¹ соскето ащи те научинес, кай нанай по бут таро дешудуи диеса, отсар възлизингиом ко поклонение андо Ерусалим. ¹² Тай нана аракле ман нито андо храми, нито андо синагогес, нито андо градос, те препиринаман декаса или те размиринав е народос. ¹³ Тай он нанащи те докажинен англал туте давка, за колеске обвининен ман акана. ¹⁴ Но давка изповединав англал туте, кай според о учение*, ковато он наречинен ерес, чука служинав амаре даденгере Девлесте, като верувинав всичко, ковато си ко закони тай си пишиме андо пророкия, ¹⁵ тай кай надявинаман ко Дел, кай ка овел възкресение праведноненге тай неправедноненге, ковато он коркоре да приеминен. ¹⁶ Далкеске меда стараинаман те овел ман всякога непорочно съвест тай спрямо о Дел, тай спрямо о мануша. ¹⁷ А палал о изтичане е буте брешенге алом те анав милостиниес ме народоске тай принося. ¹⁸ А като принесинавас лен, он аракле ман андо храми очистиме, без те овел навалица или размирие; ¹⁹ но исине десаве юдея тари Азия, колато требваше те представинен пес англал туте тай те обвининен ман, ако исине лен варесо против манде. ²⁰ Или он коркоре нека пенен сави неправда аракле анде манде, като зачилом англал о синедриони, ²¹ освен само кавка вики, ковато издиниом, като бешавас машкар ленде: Поради о учение за е възкръсениеске е муленгоро съдинен ман авдиес. ²² А о Феликс, като пенджарелас доста лачес кавка учение *, отложингяс о делос, тай пенгяс: Като ка ухлел о хилядники о Лисий, ка разрешинел тумаро делос. ²³ Тай заповедингяс е стотникиеске те пазинен е Павелес, но те ден лес известно свобода тай тена спиринен никас лескере амалендар те прислужвинел леске. ²⁴ Палал неколко диеса о Феликс ало пе ромняса и Друзила, която сине юдейка, тай бичалгяс те викинен е Павелес, колестар шунел е вяраке андо Христа Исуса. ²⁵ Тай като ов хоратинелас за правда, за себеобуздание тай за е бъдещоне съдоске, о Феликс даравно отговорингяс: За акана жатуке; тай като ка аракав време, ка викинав тут. ²⁶ Машкар далкесте, ов надявинелас пес, кай ка получинел парес таро Павелес; далкеске по-честичко викинелас лес, тай приказвинелас леса. ²⁷ Но като навършисале дуи бреш, о Феликс уло заместиме таро Порций Фест; а понеже мангелас о благоволение е юдеиенгоро, о Феликс муклас е Павелес андо оковес.