1
Тай като ачило о диес на Петдесетница, он саворе сине иеке танесте.
2
Тай внезапно ачило шуми таро небес, сар о фучиба е силноне балвалакоро, тай изпълнингяс о цело кер, кате бешенас.
3
Тай явисале ленге чиба сар ягакере, колато разделиненас пес, тай бешло по иек секои лендар.
4
Тай он саворе изпълнисале е Святоне Духоса тай почнинде те хоратинен чужда чиба, според сарто о Духос делас лен способност те хоратинен.
5
А тогава андо Йерусалим прибивиненас юдея, благочестива мануша, всеконе народостар телал о небес.
6
Тай като шундило давка шуми, иек навалица кидисали; тай смутисале, соскето секо иек шунелас лен те хоратинен лескири чиб.
7
Тай саворе смаиме тай зачудиме, пененас песке: Аке, саворе калка, колато хоратинен, нанай ли галилеяния?
8
Тогава сар шунас лен те хоратинен секой амари собствено чиб, анде колате синям бянде?
9
Партяния, мидяния тай еламития, тай жителя тари Месопотамия, тари Юдея тай Кападокия, Понт тай Азия*,
10
Фригия тай Памфилия, таро Египет тай колка страни тари Ливия, колато граничинен с Киринея, тай посетителя таро Рим - тай юдея, тай о прозелити,
11
критяния тай арабия, шунас лен те хоратинен амаре чиба е великоне Божие деловиенге.
12
Тай он саворе смаисале тай андо недоумение пученас пес иек аврес: Со значинел давка?
13
А авер асанас ленге, тай пененас: Он макярде пес гудле моласа.
14
А о Петър, като изправисало е дешуиекенца, ваздингяс по гласос тай захоратингяс ленге тай пенгяс: Юдея тай туме саворе, колато живинен андо Йерусалим, нека ачол туменге знайно давка, тай внимавинен мере думенде.
15
Соскето калка нанай мате, сарто туме мислинен, понеже си едва о трето сахати е диесескоро;
16
но давка си пендо чрез о пророки о Йоил:
17
" Тай ко последна диеса, пенел о Дел, ка излеинав Ме Духостар всеконе тварате; тай тумаре чаве тай тумаре чая ка пророкувинен, тумаре юношия ка дикен видения; тай тумаре пуре ка сънувинен суне.
18
Още пе слугенге да, тай Пе слугиненге ка излеинав Ме Духостар анде колке диесенде, тай ка пророкувинен.
19
Тай ка покажинав чудеса ко небес упре тай знамения ки пув теле - рат, тай яг тай кълба тувестар.
.
20
о Кам ка ирингиол тъмнинате тай и луна ратесте, англал те авел о велико тай бележито диес Господно.
21
Тай всекой, ковато призовинел е алав е Девлескоро, ка спасинел пес".
22
Израиляня, шунен калка думес: о Исусес о Назарет, засвидетелствиме машкар туменде таро Дел чрез мощна дела, чудеса, тай знамения, колато о Дел кергяс чрез Лесте машкар туменде, сарто туме коркоре жанен,
23
Лес, предиме според и определено воля е Девлескири тай предузнание, туме разпнингиен тай мударгиен чрез о вас е беззакоиникиенгоро;
24
Като о Дел възкресингяс, като развържингяс о дука е мерибнаскере, понеже на сине възможно те овел долдо Ов латар.
25
Соскето о Давид пенел за Леске: " Винаги товав е Девлес англал манде; понеже Ов си отдясно манге, ме нанай те поклатинаман;
26
далкеске лошанел мо сърцес, тай развеселисали ми душа, а още ми плът ка прстоявинел анди надежда;
27
соскето нанай те мукес ми душа андо шеол, нито ка допуснинес Торо Свято Чавоте дикел изтление.
28
Ка сикавес манге о дром е животоскоро; Торо присъствиесте Иси пердо веселба."
29
Пралален, ащи те пенав туменге свободно за е патриархиеске о Давид, кай муло, тай сине пароме, тай лескоро мимори си аменде жи калке диесесте.
30
Тай чука, понеже сине пророки тай жанелас, кай о Дел совеля са обещисало леске, кай лесекере потомциендар по плът ка ваздел Христа, Лес те поставинел ко престоли Леске,
31
ов предвидинелас давка, хоратинел е възкресениеске на Христа, кай Ов нито сине мукло андо ади, нито Лескири плът диклас изтление.
32
Калке Исусес о Дел възкресингяс, колеске аме саворе синям свидетеля.
33
Тай чука, като възвисисало жи ки Божия десница, тай лилас таро Отца о обещано Свято Духос, Ов излеингяс давка, ковато туме дикен тай шунен.
34
Соскето о Давид нана възнесисало андо небеса; но коркоро ов пенел: ' Пенгяс о Дел мере Девлеске: Беш отдясно Манге,
35
жи кай положинав Те враговиен Тере подножиесте".
36
Тай чука, нека жанел лачес цело Израилево кер, кай кавка Исус, Колес туме разпнингиен, Лес о Дел кергяс Дел, таи Христос .
37
Като шунде давка, он, ужилиме ан пе сърценде, пенде е Петреске тай околе апостоленге: Со те керас, пралален?
38
А о Петрес пенгяс ленге: Покаинен тумен тай секой тумендар нека кръстинел пес андо алав Исус Христово за те простинен пес тумаре безеха; тай ка приеминен кавка дари, о Свято Духос.
39
Соскето туменге си о обещание тай тумаре чадовиенге, тай саворе далечноненге, кити о Дел, амаро Дел ка призовинел паш Песте.
40
Тай буте авере думенца заявинелас тай увещинелас лен, тай пенелас: Избавинен тумен далке извратеноне поколениестар.
41
Тай чука, калка, колато приеминде о поучение лескоро, кръстинде пес; тай ко също диес прибависале около трин хиляда жене.
42
Тай он постоянствиненас андо поучение е апостоленгоро, андо общение, андо преломяване е мареске тай андо молитвес.
43
Тай дар долгяс всеконе душа; тай бут чудеса тай знамения ачонас чрез о апостола.
44
Тай саворе вярваща сине заедно, тай сине лен всичко общо;
45
тай бикненас и стока тай по имоти, тах разделиненас о парес саворенге, според и нужда секаске.
46
Тай секо диес прекарвиненас единодушно андо храми тай пагенас маро пе керенде, тай приеминенас хабе лошаляса тай простосърдечиеса,
47
като хвалиненас е Девлес, тай печелиненас о благоволение саворе народоске. А о Дел секо диес прибавинелас карик ленде, колкен колато спасиненас пес.