¹ О Павел, е Божие воляса апостоли на Исуса Христа, тай о прал о Тимотей, жи ки Божие кангери, която си андо Коринт, тай жи саворе светиенде, колато си ки цело Ахая. ² Благодат тай мири туменге таро Дел, амаро Отеци, тай Дел о Исуса Христа. ³ Благословиме о Дел тай о Отец амаре Девлескоро о Исус Христос, Отеци е милосърдиеске тай Дел е пердоне утехакоро, ⁴ ковато утешинел амен анде секакво амари скръб, за те ащи амеда те утешинас калкен, колато араклон анди сави да те овел скръб, утехаса, коласа амеда коркоре утешинас амен таро Дел. ⁵ Соскето, сарто аме изобилно страдинас е Христаске, чука амари утеха изобилствинел чрез Христа. ⁶ Но ако наскърбинен амен, давка си тумаре утехаке тай спасениеске; или ако утешинен амен, давка си тумаре утехаке (тай спасениеске), ковато създел анде туменде търпеливо понасиба е същоне страданиенге, колато понасинас амеда. ⁷ Тай и надежда амари за туменге си зорали; понеже жанас, кай сарто синиен участникия андо страдания, чука синиен анди утеха. ⁸ Соскето мангас те жанен, пралален, е скръбяке, която сполетингяс амен анди Азия, кай улам изключително притесниме, аври амаре силатар, чука кай отчаисалам дори амаре животоске; ⁹ даже аме коркоре счетингям, кай приемингям мерибнаскири присъда анде аменде, за тена уповинас амен аменде, а ко Дел, Ковато възкресинел е мулен. ¹⁰ Тай Ов избавингяс амен таро дики паше мериба, тай още избавинел, тай надявинас амен Лесте, кай пак ка избавинел амен; ¹¹ сарто тумеда чрез молитва помагинен аменге, чука кай мнозина те благодаринен амаре алавестар е дарбаке, дариме аменге чрез о молитвес е мнозиненге. ¹² Соскето амари похвала си кайка, о свидетелство амаре съвестякоро, кай аме живингям андо светос, а най-бут машкар туменде, святостияса тай искреностяса англал о Дел, ма плътсконе мъдростияса, а е Божие благодатаса. ¹³ Соскето на пишинас туменге авер, освен давка, ковато четинен тай признавинен, тай ковато, надявинаман, кай жи ко крайос ка признавинен ¹⁴ ( сарто отчасти признавингиен), кай синям похвала туменге, сарто тумеда аменге, андо диес амаре Девлеске о Исус. ¹⁵ Далке увереностиаса възнамеринавас те авав първо паш туменде, за те овел тумен двойно полза, ¹⁶ като презал туменде накав анди Македония; тай пак тари Македония авав туменде, тай тогава туме те изпратинен ман за Юдея. ¹⁷ Лачес, като сине ман давка намерение, лекоумно ли постъпингиом? Или мо намерение уло манушескоро* намерение, тай те пенав ту: Ва, ва, ту: Нака, нака? ¹⁸ Но сарто о Дел си верно, чука амаро словос карик туменде на уло "ва" тай "нака". ¹⁹ Соскето о Божие Чаво, о Исус Христос, Ковато уло проповедиме машкар туменде амендар ( мандар, о Сила тай о Тимотей), на ачило "ва" тай "нака", но анде Лесте ачило "ва"; ²⁰ понеже саворе Божия обещания анде Лесте си "ва", тай анде Лесте "амин", за е Божие славаке чрез аменде . ²¹ А Кавка, Ковато утвърдинел амен заедно туменца андо Христа, тай Ковато помажингяс амен, си о Дел: ²² Ковато запечатингяс амен, тай диняс анде амаре сърценде о Духос андо залоги. ²³ Но ме призовинав е Девлес свидетелеске мере душаке, кай за те пощадинав тумен, въздържингиом ман те авав андо Коринт; ²⁴ соскето на господарувинас упрал тумаре вярате, но синям помощникия тумаре лошалаке; понеже, кити е вяраке, туме бешен зорале.