¹ Jeso aku njena muwato, ku lyuwuka, akuya mu munzakye'e. ² Ni mwene, baku mulyetiza muyeyi yo mukukutira mumbiri aranzyire pu lyi checha. Ku mwana ku tishira kwawo, Jeso aku tikya ku murwa yopa,'' Mwananga igisa. Zibe zwe zapaturwa.'' ³ Ni mwene, babamwe ibaba noli baku hwetizana mwikyo lyawo, 'Murwa yo matinya zurusa.'' ⁴ Jeso aku yiba miyanakano awo, aku tikya, ''Shikya punati yanakana shibe mwi moyo enu? ⁵ Sheshi tere ichire, ku tikya, zibezwe za patirwa, 'hali ku tikya,' tambuka shukwenda? ⁶ Shazopa shani yibe atikya mwana muyeyi ana iqumu lyuvu i yi kupatira zibe, ...'' aku tikya kuyo muku kutira mu mbiri, ''Yima, isa lyichecha lye, ukwenda kwi njuwo aye.'' ⁷ Muyeyi yopa aku tambuka akwenda kwi njuwo akye. ⁸ Pu lyi ywaba lyaru ku mwana zopa, bata ywapa indi kwi dzamina Urezya, yibatapa iqumu ku bayeyi. ⁹ Pu Jesu kalyi tsura papa, aku mwana murwa yamati berwa Mateu asise pwikaraki umusharisi. aku tikya kukye, ''Ndiqama.'' Aku tambuka aku mwi qama. ¹⁰ Jeso karu ku sikama mwi njuwo nuku lya, ni mwene, ba tyerisi indi ba qwezabbi batiya kulya ni Jeso indi barutiwa wakye. ¹¹ Ba Farisi pubaru ku mwana akyo, ba ku tikya barutiwa bakye, ''Shikya pu muruti enu matilya ni basharisi indi ba qwezabbi?'' ¹² Pu Jeso karuku zu yuvwa, aku tikya, ''Bayeyi babaqhi mumu mbiri awo amaba ku shaka zi naka, tana bati mashira. ¹³ Nati swanera kwenda ni ka lyitutye zi ndati toroka: 'Ndati lyopeza zuxuma indi shita bero.' Amandi yere kuya kubera baba chena kuku baka, kono maqhezabbi.'' ¹⁴ Cware barutiwa ba Johani bakuya kukya baku tikya, ''Shikya yatswe tati lyiyimina zu lyuwa kono barutiwa wee amaba kulyi yimina?'' ¹⁵ Jeso aku zwara, ''Kana abana wu muyeyi yamati rpwura bati kwana ku lyira yamati rowura ashina nawo? kono mayiba ishangaye pwisha ya matirowura isha kuku suwa kuwo, mi ishaba lyi yimine zu lyuwa. ¹⁶ Ku njemwa muyeyi yamati bika kagaugau ku shiraro sheshi piya pu shiraro shakare, shuku tikya shikamba shashi khware shiraro sheshi piya. ¹⁷ Nangweza bayeyi amaba ku kwana ku tyera i waine yi mpiya mutu kwatana tushi kabi totu kooro. ba ku kyopa, zikatana zati khwaruka, mi waine yi tyeshire peshi nduku tikya, indi tu katana twati sinyeha, cware, bati bika i waine mutu kwatana totu piya, mi kozo kuti zamameruwe.'' ¹⁸ Pu Jeso karunku hweta zopani kozoo, ni mwene, kwakuya malinda zikanga akuya kuwa peshi lyakye. Aku tikya kukye, ''Mwananga yo mukazi mafu, ukuya yubike lyanja lywee pwi lyiro lyakye, mi kuti apare.'' ¹⁹ Cware Jeso aku yima aku mwi qama, indi barutiwa bakye. ²⁰ Ni mwene, murwakazi ikaru ku twanga wutuku wuku dziya marwapa shi mwaaka yilyi kumi indi biri akuya mulyuqo lya Jeso aku pata ku shiraro sha Jeso. ²¹ Shuku tikya mata yizira yuyumwe atikya punda ku pata ku shiraro shakye ndati pwara.'' ²² Kono Jeso aku xhwapuka aku mwana, aku tikya, ''mwananga yo mukazi, bani qumu; ku tishira kwe kwaku yaka; murwakazi yopa aku pwe lyusuwa ku dzwa papa ngaho. ²³ Pu Jeso karu kuya mwi njuwo amalinda zikanga, aku mwana ibaru ku wulisa tuworo woro mi i lyinji lyaru ku tolyiya. ²⁴ Aku tikya, ''Na kwenda kuna, mukana yo amafwe, kono mati kwama. ''kono baku musheka sheka. ²⁵ Pu lyiywaba lyaru dzwera pwenje, aku njena mwikyo aku mukotura shilyanja lyakye, mukana aku tambuka. ²⁶ Imbuzi yopa yiqa yaku yira yira zi baka zopa. ²⁷ Pu Jeso kalyi ku tsura kopa, barwa ba biri baba pofu baka mwi qama. Baku dzera ku wuso ku shupura atikya, ''Ti yuvura zuxuma, Mwana Davida!'' ²⁸ Pu Jeso akaru kuya njuwo, baba pofo baru kuya ku kyee. Jeso aku tikya kuwo, ''Nati tishira atikya ndati kwana kwisi zopani? Baku tikya ku kye, Eyee, Shikati.'' ²⁹ Pu Jeso karu kupata amesho awo aku tikya, ''Kube akyopa kokunwe tandi shina ti tishira,'' ³⁰ Amesho awo ngaku ya zuka. Jeso shuku gisiza mayi aku tikya kuwo, ''Ni mwene kukuyamati swanera ku yiba zopani.'' ³¹ Kono barwa bapa baka kyita mi baka sumuka imbuzi yopa shikiriti kocho. ³² Pu banyana bapa baru kwenda shire, ni mwene murwa yu hati hweta yana mupupo ama dimina aku lyetuwa ku Jeso. ³³ Pu madimona ngaruku dzusuwa kukye, munyana yahara ku hweta aku hweta lyi ywaba lyaku hakamara lya ku tikya, ''Zopa kazi chire ku monuwa mo Isiraele!'' ³⁴ Kono ba Farisi baru ku tikya, ''Yee nduyo muru kuma dimona, nanga kunga hindika.'' ³⁵ Jeso akwenda mu minzi indi mirenenyi kuyo. Ku dzera kuwuso ku ruta mu msinagogee, kupa wu rumiwa wumu wuso indi kuyaka ibati mashira indi matuku kongo ingati chichana chichana. ³⁶ Pu karu ku mwana lyi ywaba, akuba nika xumakawo, shuku tikya bata ratse indi ku fwana ku shushira mulyiqo. Tandi zungu zozu ku yamatizi lyaya. ³⁷ Aku tikya ku barutiwa bakye, ''Ku vuna ukunji nanyi, kono ibati vuna bache. ³⁸ Cware papani ngaho ni kambire ku Shikati uyu ku vuna, akya aka tumine ba bberiki muku vuna kwakyee.''