¹ Pu Jeso karu kusuka pwi kakumuko, ilyinji lyaku muqama. ² Ni mwene, ywi mbingo akuya kuwa pumaswa akyee, aku tikya, Shikati, ati mati shaka, mati kwana kundi chenisa.'' ³ Jeso aku wara lyanja lyekyee aku mupata, aku tikya, ''Ndati shaka. Chena.'' Papa ngaho aku chena kwi mbingwa akye. ⁴ Jeso akutikya ku kye, ''Mwana siya ku zira muyeyi tindi kaxeninee. Kwenda injira aye, akuliqe kuma purisita, akupe ipo yi Mushe amata hweta, shuwu pakyi kuwo.'' ⁵ Pukaru kuya koKapenauna, muyendisi akuya ku kyee, ku mukambira ⁶ atikya, ''Shikati, mu bberiki anga aranzire ku munzi makukutiri mi ana mu kumashira ku bbi.'' ⁷ Jeso akutikya kukye, ''Mbondiye indi mupwelise.'' ⁸ Muyendisi aku muyarumuna aku tikya, ''Shikati, kandi muchena atikya ukanjene mwi njuwo anga. Hweta ngaho lyiyi mubberiki anga mbwa pwere. ⁹ Indi myee ndu muyeyi yana pu murawo, ndina masore mwishi lyanga. A ku tikya ku yopa, 'Kwenda; aka kyita, yuyumwe, 'Kuya; 'Rasi zopani; aku zisi.'' ¹⁰ Pu Jeso karuku zu yuvwa, mata hakamara aku tikya kwi bata mwiqama, ''Shuku gisiza ndatikya kunwee, Kandi chire ku shangana yamati tishira akyopa mo Isiraele. ¹¹ Ndani zira, uwunji shawudzwa kuwu dzero indi kuw zimino, shaba kabe pwi tafure ni Abburahama, Isaka, indi Jakowo, mu muwuso akwi lyiiro. ¹² Kono abana wu muwuso shabara kiwa mukarema, kushaba kalira.'' ¹³ Jeso aku tikya ku muyendisi umasore, ''Kwanda! Tandi shumati tishira, kube akyopa.'' Mubberi akye aku pwara papa ngaho. ¹⁴ Pu Jeso karu kuya mwi njuwo a Pitorosi, aku mwana banyina mino akye baranzire lyi xqhebe laba pata. ¹⁵ Jeso aku pata manja awo, lyixqhebe lyaka kyita. Aku tambuka aku kalyisa ku mubberi shira. ¹⁶ Pu maxuhumu ngakuya, bayeyi baku lyeta ba banji ba maDimona. Aku hindika koyo mi pupo yemibbi aku pwelisa kowo baru ku mashira. ¹⁷ Shi njira yopani kwaku yizi lyizwa zata hwetuwa ku muporofita Isaya, atikya, ''Yeye malyi yisiza matu etu indi zi mashira zetu.'' ¹⁸ Papa Jeso pukaru ku mwana i lyinji lyamu zunguza, akupa shi hweta atikya bayendye kuru pati rurumwe lyu lyuwete lya Galilee. ¹⁹ Munoli baru kuya ku kyee ba ku tikya, ''Muruti, mbondi kwiqama koko ku kwenda.'' ²⁰ Jeso aku muqha pura, ''Ba mbwaba bana maqho, zinyina zina zu yuwo, kono mwana muyeyi muqu pwamati kambilka shushoro akyee.'' ²¹ Yuyumwe ku barutiwa aku tikya kukyee, ''Shikati, nditi shira ndika zikye tatye itanzi,'' ²² Jeso aku tikya kukye, ''Ndiqama, siya wafu bazikye bafu bawo.'' ²³ Pu Jeso karu kunjena mu woto, barutiwa bakyee baku muchera koo. ²⁴ Ni mwene, kwaku zukuka mupupo wamu kuru lyu lyiwate, mani uwoto waku mwanahara ku chekuwa ku makapa. Kono karu ku kwama. ²⁵ Barutiwa bakuya kum tambusa, atikya, ''Tiyaka, Shikati; ndufwa kyetu!'' ²⁶ Jeso aku tikya kuwo, ''Shikya punati ywapa, yenwe wutu tumero totu dana?'' Aku yima aku kalyimera mupupo indi lyu wate. Mi baku hakamara nanyina. ²⁷ Bayeyi baku komoka baku tikya, ''Murwa ya ngahare yini, yuku tikya mupupo indi lyi wate zatimuyuvwa?'' ²⁸ Pu Jeso karu kaya rupati urumwe mu lyuvu lya Gadarene, barwa babiri barana maDimona baku mushangana. Baru kudzwa mwizimba mi baru kukataza nanyina, atikya ku ikaru kutsura injira yopa. ²⁹ Ni mwene, baku shupura kwinje atikya, ''Shikya titeri kwisi nawe, mwana Urezya? Maya kukuti mbwilira kalyi chire kuwulya?'' ³⁰ Papa zungu zizinji za lyikulya, kashire nana kuwo. ³¹ Ma dimona ngaku dzera kuwuso kutoliya Jeso kanga tikya, ''Ati mati hindika, tikyama mu zungu zina.'' ³² Jeso aku tikya kungo, ''Nakwenda!'' Ngakuya kudzwa ngakwenda mu zungu; ka ni mwene, kozo zaku shezu muka pwi kakumuko kucchena mu lyuwate zaku fwa kozo. ³³ Ibaru kuzi lisa baku tiya kanjena mu munzi ka zuwura imbuzi kozo, tandi shata rasisini ku barwa barana ma dimona. ³⁴ Ni mwene, munzi kowo wa kuya ku mwana Jeso. Pubaru ku mu mwana, baku murungira ku siya muzawo.