¹ Ni mamere atikya ni siye kwisi zisi zenu zezi chena pu wuso wa bayeyi atikya bazi mwene, nakana amuku shaka ku shangana ichimwe ku Shenu yani kwi lyiiro. ² Ushiyaka muyeyi yo muhungwee, tsukana nuku lingura itoro mbita pumaso aye tandi mubatisama ibatilipa mu zinjira zama Sinagogee, atikya bayeyi baba rumbe. Injahamu ndatikya kunwe, kali bashangana izawo. ³ Yewe ushiyaka yo muhungwee, usiye ku tishira lyanja lyee lyimosho kuyiba shilya makhamu lya tisi. ⁴ Atikya ipo aye uyi perwe kurupati. Mi shenu yamati mwana kurupati mbwa kupe. ⁵ ''Ushi rapera, siya kuba tandi ibati limwana, shuku tikya ba shaka ku rapera bayi minwe mu mayira ama sinagogee atikya bayeyi baba mwene. Shiku gisiza ndatiky kunwe, kali bashanga izawo. ⁶ Mi yenwe, nishi rapera, ni njene. Ya ziya mumbero miurapere Shenu, yuna ku rupati. Cware Shenu ya mati mwana kurupati mbwa ku share. ⁷ Ushi rapera, usiye ku shushira shushira iza hati yaka tandi wu lyuvu shubarasi, shuku tikya bati yanakana atikya mbwa bayuvwe shamayi awo nga menji menji. ⁸ Cware, ni siye kuba tandiwo, Shenu uyizire izuto kozo zinati shaka kanicire kuzi ringira. ⁹ Cware ni rapere tandi akyani: 'Shetu ya mu lyiiro, lyina lye libe atikya lyichena. ¹⁰ Ka muwuso enu wuye. Zinati yanakana zibe akyo mulyuvu tandi muzina mina mulyiiro. ¹¹ Utipe namushi zu lyuwa tandi mayiba kongo. ¹² Patira zi bbisa zetu, tandi shiti tatira ibati panga wubbi. ¹³ Siya kuti lyeta mushi tyeyo, kono tiyaka kuyo mubbi.' ¹⁴ Ati mati patira bayeyi zi bbisa zawo, Shenu ya ku lyiiro indi nwe mbwani patire. ¹⁵ Ati amuku patira zibbisa zawo, indi Shenu kanuni ani patire zi bbisa zenu. ¹⁶ Nishi liyimina zulyuwa, siya ku panga tandi bana pwi njinjo tandi ibalipa, shuku tikya bati nyanisa wuso atikya ba mwanahare ku bayeyi atikya amabalye. Shuku gisiza ndatikya kunwe, kalibata shangana izawo. ¹⁷ Kono yenwe, nishiri yimina zulyuwa, niraxa amazi indi kuywa kuwuso ¹⁸ Atikya kusiye kuqe ku bayeyi atikya naliyiminizulyuwa, tana Shenu yakuru pat; mi Shenu ya mati mwana mukuli ziza mbwani tsipe. ¹⁹ ''Nisiye kuli bishira shufumu mu lyivu, muna bapuka ni makarabbeni zati shinya, indi babezi bati bbura nduku yiba. ²⁰ Kwaha, libishira shufumu shenu ku lyiiro, kokuku bapuku ni makarabbeni ingati sinya, koku ku abezi bati bbura nduku yiba. ²¹ I kuna shufumu chwe, ndikuna indi umoya aye. ²² I lyisho ndilyati mwenishira mumbiri. Cware, atikya i lyisho lyee lyina naqa, mu mbiri kowo mbowu yire wucena. ²³ Mi ati lyisho lyee libbi, mumbiri aye mbowu yire wubbi. Cware, mbowu yire ngaho karema. Cware, ati rumwenyi runa kuwo karema, karema kapa kakuru atikya? ²⁴ Kuqu yuteri ku bberishira ma shikati abiri, mati kwana ku twaya yuyumwe nduku shaka yuyumwe, nakana akwixi yuyumwe nduku kara ku yuyumwe. Amuku kwana ku bberi shira Urezya indizi tsuwa. ²⁵ Cware ndatikya kunwee, ni siye kubbirayera ni wuparo wenu, shisha nilya indinwe; kapa mu mbiri enu, shishani rara. Kaku tikya wuparo mukuru kubbara zu lyuwa, indi mu mbiri ku bbara zirara. ²⁶ Ni lyaya zi nyini zi lyiiro. Ka zutu lyumu indi ku vuuna indi ku kunga nisa, Kono Shenu ya kwi lyiiro matizi yaka. Kaku tikya yenwee nina butokwa kuzo. ²⁷ I yani kokunwee yuteri ku yekeza atikya akaye kuru kokuna kapa kuyekeza ku wuparo wakye kakace? ²⁸ Shikya shati ni bbiraeza puku rara? Ni yanakane mwendye mwi shumwe, shinga kura. Amanga ku bberika, mi maqu ziraro. ²⁹ Ehee ndatikya kunwee, nanga i Solomoni pu shuroo shakye ama rare tandi nwee. ³⁰ Ati Urezya aku cheka mutsodzo, iwati para namushi indi lyakuca nduku wikyama mwati pisa, zi lyare zaku ni cheka, yenwee wi tumero iche? ³¹ Cware siya ku bbiraera ko tikya, 'Shikya shandilya' kapa Shishandi nwaa?' kapa ' Shiraro kya shandi rara?' ³² Wu lyuvu basite ni ku shaka izuto zo pani, mi Shenu ya kwi lyiiro ayi zire atikya nati zi shaka. ³³ Kono ni shakye itanzi muwuso i lyiiro indi ku chena kwakyee, Mi kozo izuto zopani shazi pewe kunwee. ³⁴ Cware, ni siye ku bbiraera za lyakuca, lyakuca shalyilyi mwene iza lyoo. Lyiba ni lyiba lyina wubbi wa lyoo.