¹ Kwa kuya atikya pu Jeso karu ku mana kuzira barutiwa bakye wu lyi kumi indi babiri, akudzwa kuwo kwenda kuka ruta indi kakutaza mi minzi. ² Papa pu Johani karu kuyavwa zisi za Jeso mwi torongo, aku tumina lyiyi shaba rutiwa bakye, ³ aku tikya kukye, ''I wee ikaru kuya, kapa tilyaye urwezi?'' ⁴ Jeso akuba zwara atikya, ''Na kwenda nika zire Johani zina monu indi kuyuvwa. ⁵ Baba pofo mati mwana, zihwere za tyenda, wi mbongo bachenisuwa, baba poro bati yuvwa nangweza, bafu bata mbuswa ndiku pewa wuparo nangweza, wurumiwa wa zirwa ku baba hongwe. ⁶ Imbuyoti inju muyeyi kwekye indahara panga shibbi.'' ⁷ Barwa bapa baka kyita zi njira zawo,Jesoaku akuxhitka ku hweta za Johan ku lyiywaba, ''Shikya mata chinga mulyi haraupa ka mwana- mupupo wati nyangasa mubbu? ⁸ Kono shikya mata chinga penji kuka mwana- murwa ya marara zi raro zezi twere - twere? Injahamu, iba rara zezi twere - twere bati para mu mayuwo ama shikati. ⁹ Ta shikya mata chinga pwenji ka mwana - Mu porofita? Eee, ndatikya kunwe, ku bbara mu porofita. ¹⁰ Yopa ndiya mata nera izakya, 'Mwana, ndati tuma bayeyi puwuso wee, ikaku panga injira piri yewe. ' ¹¹ Injahamu ndati kya kunwe, kwibata pakuwa ku mukazi kuqu yo mukuru kubbara Johani Mukorobezi. Muyeyi yomu bbibbirukwe nduyo mukuru mumu wuso i lyiiro. ¹² Kudzwa ku mayiba Johani ku lyeta apani, muwuso ilyiiro wati shanda ku wu hapana, mi bayeyi baba hapana bati yisa shuku kaka tiza. ¹³ Kowo ba porofita indi mirawo zata poroftwa tana Johani; ¹⁴ ati mati shaka kuzi tishira, i Elija ikaru kuti aye. ¹⁵ Yana mati ukuyu ayuvwe, ni musiye ayuvwe. ¹⁶ I kushikya ndaku fwenisa rusinga ropani? Tandi bapundi batikyi ku mi sika, basise kalitili bera = bera ¹⁷ mi ndiku tikya, 'Taku zipiri tungo, amu zane. Taku yimbiri ruyombo, ruku lyira amu lyire.' ¹⁸ Johani amayere ku lya mikamu indi kunwe i waine, baku tikya, 'Ana ma dimona.' ¹⁹ Mwana muyeyi mataya ku lya indi ku nwa baku tikya, 'lyaya, muyimizi hape shidakwa, mbiya aba shalyisi indi bababbi!' Kono yo mu sauka mati chenisuwa shizisi za kye.'' ²⁰ Jeso aku xhikika ku kalimera murenenyi muzi sisini zezi kuru zata pangahara, shuku tikya amaba bake. ²¹ ''Manguwe yewe, una wu shwamana yewe Korozani! Manguwe yewe, Betsaida! Kambe zi makazo zezi kuru zata pangahara mo Taire indi Sodoma izata rasisini kunwe, kambe bata baka kuzi raro za masaka indi mutwee. ²² Murandu a Taire indi Sodoma shayi chepe mu lyiba lyama menisizi kuni bbara. ²³ Yewe, Kapenauna, mati yanakana atikya shuku lyisuwe ku lyiiro? Yemwa, shulyetuwe peshi pwi zimba. Ati mo Sodoma ndimwatara sisini zi makazo zata rasisini mokunwe, ni zata karapo akyopa tanamushi. ²⁴ Kono ndatikya kunwe ishakube wutwere-twere mu lyuvu lya Sodoma kuni bbara.'' ²⁵ Pu kakanda kapa Jeso aku tikya, ''Ndati ku rumba, Tatyee, Shikati ulyiiro indi lyuvu, shuku tikya zitaba zwee mata zizishira baba sauka i bati yuvusisa, uku ziyera abana wee babadana. ²⁶ Eee, Tatye, shazopani zati dzekawo amesho aye. ²⁷ Izuto kozo zata pewa ku mye ku dzelyira ku Tatye; mi kuku yuyizire umwana tana Shee; mi kuku yuyizire Shee tana umwana mi tana kwekye ngaho yu mwana ama shara atikya amu yerezo. ²⁸ Nakuya kumye, kwenu naratse inina miziyo ye miremu, mbo indi nipe kutsutsu ruka. ²⁹ Ni yise ujokwe anga indi kulyi tuta kumye, shuku tikya ndina muxhumakawo indi umoyo yo muxamu - xamu, mi kuti ini shangane mi pupo enu kutsutsu ruka. ³⁰ Ujokwe anga mupuba indi miziyo anga mupuba.''